ବାଙ୍ଗିରିପୋଷି,୪ ।୨(ଡି.ଏନ.ଏ.) ମୟୂରଭଞ୍ଜ ଜିଲା ବାଙ୍ଗିରିପୋଷି ବ୍ଲକ ଅଧୀନ କାଳିଆମି ପ୍ରକଳ୍ପ ଉ.ପ୍ରା. ବିଦ୍ୟାଳୟରେ ସ୍ଥାୟୀ ପ୍ରଧାନ ଶିକ୍ଷକ ନିଯୁକ୍ତି ପାଇଁ ଛାତ୍ରୀଛାତ୍ର ଓ ଗ୍ରାମବାସୀ ଦାବି କରିଛନ୍ତି। ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି ନିର୍ଦ୍ଦେଶ ଦେଇ ଶିକ୍ଷା ବିଭାଗ ଅଧିକାରୀ ମନମାନୀ ଚଳାଇଥିବା ପ୍ରତିବାଦରେ ସୋମବାର ସେମାନେ ବିଦ୍ୟାଳୟ ଫାଟକରେ ତାଲା ପକାଇ ଦେଇଥିଲେ।
ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟଠାରୁ ମାତ୍ର ୧.୫ କି.ମି. ଦୂରତାରେ ଥିବା ଏହି ବିଦ୍ୟାଳୟ ୧୯୫୮ରେ ସ୍ଥାପିତ ହୋଇଥିଲା। ବର୍ତ୍ତମାନ ଏଠାରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୦୩ ଛାତ୍ରୀଛାତ୍ର ପଢ଼ୁଥିବା ବେଳେ ପ୍ରଧାନ ଶିକ୍ଷୟିତ୍ରୀଙ୍କୁ ମିଶାଇ ଜଣେ ଶିକ୍ଷକ ଓ ୨ ଶିକ୍ଷୟିତ୍ରୀ ଶିକ୍ଷାଦାନ କରୁଛନ୍ତି। ୮ଟି କ୍ଲାସର ପିଲା ମାତ୍ର ୨ଟି ଶ୍ରେଣୀ ଗୃହରେ ବସୁଛନ୍ତି। ବିଦ୍ୟାଳୟର ଅଫିସ ଗୃହ ନ ଥିବାରୁ ବାରଣ୍ଡାରେ ଚେୟାର, ଟେବୁଲ ପକାଇ ଅଫିସ କାର୍ଯ୍ୟ ଚାଲିଛି। ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀ ବନ୍ଦିତା ସିଂହଙ୍କୁ ଗୋଷ୍ଠୀ ଶିକ୍ଷା ଅଧିକାରୀ ମାନଗଡ଼ ମୁଣ୍ଢାକଟା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟକୁ ବଦଳି କରିଛନ୍ତି। ଏହାର ପ୍ରତିବାଦରେ ଏସ୍ଏମ୍ସି କମିଟିର ସଭ୍ୟାସଭ୍ୟ ଧର୍ମଜୟ ସିଂ, ବିଜୟ କୁମାର ବିନ୍ଧାଣୀ,ଗଣେଶ ମହାନ୍ତ, ପ୍ରତାପ ବିନ୍ଧାଣୀ, ବୁଧୁରାମ ମାହାଲିଙ୍କ ସମେତ ବହୁ ଗ୍ରାମବାସୀ ବିଦ୍ୟାଳୟ ପ୍ରବେଶ ଫାଟକରେ ତାଲା ପକାଇ ଦେଇଛନ୍ତି। ସ୍ଥାୟୀ ପ୍ରଧାନ ଶିକ୍ଷୟିତ୍ରୀ ନିଯୁକ୍ତି ସହ ପ୍ରଧାନ ଶିକ୍ଷୟିତ୍ରୀଙ୍କ ବଦଳି ବାତିଲ କରିବାକୁ ଗ୍ରାମବାସୀ ଅଡ଼ି ବସିଛନ୍ତି। ଏ ସଂକ୍ରାନ୍ତରେ ଗୋଷ୍ଠୀ ଶିକ୍ଷା ଅଧିକାରୀ ଗୌତମ କୁମାର ପାତ୍ରଙ୍କୁ ପଚାରିବାରୁ ବିବାଦର ସମାଧାନ ହୋଇଯାଇଛି। ପ୍ରଧାନ ଶିକ୍ଷୟତ୍ରୀ ସିଂ ଦାୟୀତ୍ୱ ହସ୍ତାନ୍ତର କରି ନ ଥିବାରୁ ଏସବୁ ଅସୁବିଧା ହୋଇଥିଲା ବୋଲି କହିଛନ୍ତି। ଅନ୍ୟପଟେ ସ୍ଥାୟୀ ପ୍ରାଧାନ ଶିକ୍ଷକ ନିଯୁକ୍ତି ଦିଆ ନ ଗଲେ ଆନ୍ଦୋଳନ ତୀବ୍ର ହେବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
