ଦାରିଙ୍ଗବାଡ଼ି,୩ା୧୧ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଗଦାପୁର ପଞ୍ଚାୟତଠାରୁ ବହୁ ଦୂରରେ ରହିଥିବା ମାଣ୍ଡିପଙ୍କା ଗ୍ରାମକୁ ପଞ୍ଚାୟତ ଭାବେ ଗଠନ କରାଯିବାକୁ ଅଞ୍ଚଳବାସୀ ଦାବି ଉଠାଇବା ସହ ଟେଲି କମ୍ୟୁନିକେଶନ ସଂଯୋଗ ଦାବି କରିଛନ୍ତି।
ପ୍ରକାଶ ଯେ, ମାଣ୍ଡିପଙ୍କାରେ ଆମ୍ବଟାକୁଆ ଖାଇ ୨ ଜଣଙ୍କ ମୃତ୍ୟୁ ଓ ୬ ଜଣ ଗୁରୁତର ହେବା ପରେ ସାରା ରାଜ୍ୟରେ ଚହଳ ସୃଷ୍ଟି କରିଛି। ଘଟଣା ଘଟିବା ସଙ୍ଗେ ସଙ୍ଗେ ଏହାକୁ ଜିଲା ପ୍ରଶାସନ ଗୁରୁତର ଭାବେ ନେଇ ନିଜେ ଜିଲାପାଳ ଅମ୍ରିତ ଋତୁରାଜ ଦାରିଙ୍ଗବାଡ଼ି ଓ ବ୍ରାହ୍ମଣୀଗାଁ ଗସ୍ତ କରି ତଦନ୍ତ କରିଛନ୍ତି। ଆମ୍ବଟାକୁଆ ନୁହଁ, ବାସି ଖାଦ୍ୟ ଖାଇବା ଦ୍ୱାରା ଖାଦ୍ୟରେ ବିଷ ପ୍ରକ୍ରିୟା ସୃଷ୍ଟି ଯୋଗୁ ୨ ଜଣଙ୍କ ମୃତ୍ୟୁ ହୋଇଥିବା ସରକାର ରିପୋର୍ଟ କରିଛନ୍ତି। ଆଦିବାସୀ ଅଧ୍ୟୁଷିତ ଅଞ୍ଚଳରେ ଲୋକଙ୍କୁ କାମ ମିଳୁ ନ ଥିବା ଓ ଚାଷ ପାଇଁ ଜଳର ଅଭାବ ସହ ବିଭିନ୍ନ ସମସ୍ୟା ରହିଛି। ଘଟଣା ପରେ ବାଲିଗୁଡ଼ା ଆଇଟିଡିଏର ପ୍ରକଳ୍ପ ପ୍ରଶାସକ କରୁସିନ୍ଧୁ ବେହେରା ଶନିବାର ମାଣ୍ଡିପଙ୍କାରେ ପହଞ୍ଚି ସ୍ଥିତି ପରଖିଛନ୍ତି। ସେ ମୃତକଙ୍କ/ଗୁରୁତରଙ୍କ ପରିବାର ଏବଂ ଗ୍ରାମବାସୀଙ୍କୁ ଭେଟି ଗ୍ରାମରେ ବିଭିନ୍ନ ସମସ୍ୟା ସମ୍ପର୍କରେ ଲୋକଙ୍କ ସହ ଆଲୋଚନା କରିଛନ୍ତି। ଏହି ସମୟରେ ଗ୍ରାମବାସୀ ପ୍ରକଳ୍ପ ପ୍ରଶାସକଙ୍କୁ ଗ୍ରାମରେ ରହିଥିବା ସମସ୍ୟାଗୁଡିକ ମଧ୍ୟରେ ବଡ଼ ସମସ୍ୟା ହେଲା ସେମାନେ ପଞ୍ଚାୟତ କାର୍ଯ୍ୟାଳୟକୁ ପ୍ରାୟ ୧୦ କିଲୋମିଟର ଯିବାକୁ ପଡୁଛି। ଚାଉଳ ଆଣିବା ଓ ବିଭିନ୍ନ କାର୍ଯ୍ୟରେ ଯାତାୟାତ ସମସ୍ୟା ହେଉଛି। ତେଣୁ ଉକ୍ତ ପଞ୍ଚାୟତର ମେରାମହା, ବୁଦୁଲି,ସୁନ୍ଦରପାଙ୍କା, ଖ୍ରୀଷ୍ଟପୁର ଓ ରାଜପୁରକୁ ନେଇ ପଞ୍ଚାୟତ ଗଠନ କରାଯିବାକୁ ସେମାନେ ଦାବି ଜଣାଇଛନ୍ତି।
ସେହିପରି ଶୁଦ୍ଧ ପାନୀୟଜଳ ବସୁଧା ଯୋଜନାରେ ଯୋଗାଇଦେବା ସହ ମୋବାଇଲ ନେଟ୍ଓ୍ବର୍କ, ପଣସ ସାହି ସମେତ ଅନ୍ୟ ସାହିକୁ କଂକ୍ରିଟ ରାସ୍ତା ନିର୍ମାଣ ଦାବି କରିଛନ୍ତି। ସମସ୍ତ ଅଭିଯୋଗକୁ ଏକ ରିପୋର୍ଟ ପ୍ରସ୍ତୁତ କରି ଜିଲା ପ୍ରଶାସନକୁ ଅବଗତ କରିବି ବୋଲି ଆଇଟିଡିଏର ପ୍ରକଳ୍ପ ପ୍ରଶାସକ କୃପାସିନ୍ଧୁ ବେହେରା କହିଛନ୍ତି। ସେହିପରି କଂଗ୍ରେସର ବରିଷ୍ଠ ନେତା ଶ୍ରୀକାନ୍ତ ଜେନା ମଧ୍ୟ ପ୍ରକଳ୍ପ ପ୍ରଶାସକଙ୍କ ସହ ଆଲୋଚନା କରିଥିଲେ।