ନାଉଗାଁ ,୩ା୧(ସ୍ବ.ପ୍ର.): ନାଉଗାଁ ବ୍ଲକ ଅନ୍ତର୍ଗତ ଓଷକଣା ପଞ୍ଚାୟତରେ ଦେବୀ ନଦୀବନ୍ଧ ପାର୍ଶ୍ୱରେ ବସବାସ କରୁଥିବା ଜନବସତି ନିକଟରେ ଏକାଧିକ କଂକ୍ରିଟ ରାସ୍ତା ନିର୍ମାଣ କରାଯାଉଛି। ଉକ୍ତ ରାସ୍ତା କିଏ ନିର୍ମାଣ କରୁଛି ଓ ଏଥିପାଇଁ କେତେ ଅର୍ଥ ବ୍ୟୟ ବରାଦ କରାଯାଇଛି, କିଏ ଚୁକ୍ତି କରିଛି ସେ ବିଷୟରେ କେହି କହିପାରୁନାହାନ୍ତି। ଏହି ସଂଯୋଗୀକରଣ ରାସ୍ତାଗୁଡିକ ଜଳସମ୍ପଦ ବିଭାଗ ଅଧୀନରେ ରହିଛି। ମାତ୍ର ଏଠାରେ ଚାଲିଥିବା କାର୍ଯ୍ୟ ବିଷୟରେ ବିଭାଗ ମଧ୍ୟ ଅବଗତ ନ ଥିବା ଜଣାପଡ଼ିଛି। ଏନେଇ ବିଭାଗର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ସ୍ଥାନୀୟ ବାସିନ୍ଦାଙ୍କ କହିବା ମୁତାବକ, କେତେଜଣ ଠିକାଦାର ମନମୁଖିଭାବେ ନିମ୍ନମାନର କାର୍ଯ୍ୟ କରି ବିଭାଗ ପାଖରୁ ଅଧିକ ଟଙ୍କାର ବିଲ୍ ହାତେଇ ନେଉଛନ୍ତି। ବିନା ସୂଚନା ଫଳକରେ ଠିକାଦାର ଓ ଯନ୍ତ୍ରୀ କାର୍ଯ୍ୟ କରି ହାତ ଚିକ୍କଣ କରୁଛନ୍ତି ବୋଲି ଲୋକେ ନାମ ଗୋପନ ରଖି ପ୍ରକାଶ କରିଛନ୍ତି। ସେହିପରି ଗତ କିଛି ଦିନ ତଳେ ତଳିଆ ଅଞ୍ଚଳକୁ ନଦୀ ପାଣି ନ ପଶିବା ପାଇଁ ଦେବୀ ନଦୀ ବନ୍ଧ ପାର୍ଶ୍ୱରେ ଘେରି ବନ୍ଧ ନିର୍ମାଣ କରାଯାଇଥିଲା। ତେବେ ବିଭାଗୀୟ ଯନ୍ତ୍ରୀଙ୍କ ସୂଚନା ମୁତାବକ ଏହି ଘେରି ବନ୍ଧ ପାଇଁ କୌଣସି ଟେଣ୍ଡର ହୋଇ ନ ଥିବାବେଳେ ଚିଠା ମାଧ୍ୟମରେ ଠିକାଦାର କାର୍ଯ୍ୟ କରୁଛନ୍ତି। ଏଥିପାଇଁ ବିଭାଗ ତରଫରୁ ୧୦ ଲକ୍ଷ ଟଙ୍କା ବ୍ୟୟ ବରାଦ କରାଯାଇଥିବା ସମ୍ପୃକ୍ତ ଯନ୍ତ୍ରୀ ପ୍ରକାଶ କରିଛନ୍ତି। ଗୁରୁତ୍ୱପୂର୍ଣ୍ଣ ବିଷୟ ହେଲା, ଘେରି ବନ୍ଧ ପାଇଁ ଲକ୍ଷାଧିକ ଟଙ୍କା ବ୍ୟୟ ହୋଇଥିଲେ ମଧ୍ୟ ଅସରାଏ ବର୍ଷା ପରେ କାର୍ଯ୍ୟରେ ଲାଗିବା ପୂର୍ବରୁ ଏଠାରୁ ମାଟି ଧୋଇଯାଇଛି। ଘେରି ବନ୍ଧରେ ମାଟି ଓ ପରେ ମୋରମ ପକାଇବାର ନିୟମ ଥିବାବେଳେ ଠିକାଦାର ପୂର୍ବରୁ ଥିବା ଘେରିବନ୍ଧ ଉପରେ କେବଳ ଅଳ୍ପ କିଛି ମାଟି ପକାଇ ନିର୍ମାଣ ନାମରେ ବିଲ୍ କରିଥିବା ସାଧାରଣରେ ଅଭିଯୋଗ ହୋଇଛି । ଏ ବିଷୟରେ ବିଭାଗୀୟ ଯନ୍ତ୍ରୀ ଦେବୀ ମିଶ୍ର କହିଛନ୍ତି, ଏସବୁ କାର୍ଯ୍ୟ ସମ୍ପର୍କରେ ତାଙ୍କ ପାଖରେ କୌଣସି ସୂଚନା ନାହିଁ।