ବଇଣ୍ଡା,୧।୪ (ପରିକ୍ଷିତ ସାହୁ) ଭଡ଼ାଘରେ ଚାଲିଥିବା ବଇଣ୍ଡା ଅବକାରୀ ଥାନା ଭଙ୍ଗାଯିବା ପରେ ନୂଆ କାର୍ଯ୍ୟାଳୟ ସ୍ଥାପନ ପାଇଁ ନିଷ୍ପତ୍ତି ନିଆଗଲା। ୩୩ ଲକ୍ଷ ଟଙ୍କା ବ୍ୟୟରେ ଏଥିପାଇଁ କୋଠା ନିର୍ମାଣ ହେଲା। ହେଲେ ୨ ବର୍ଷ ତଳୁ କାର୍ଯ୍ୟ ଶେଷ ହୋଇଥିଲେ ମଧ୍ୟ ଥାନା ଉଦ୍ଘାଟନ ହେଉନାହିଁ। ଅଧିକ ସଂଖ୍ୟକ କର୍ମଚାରୀଙ୍କୁ ନିଯୁକ୍ତି ଦିଆଯାଉନାହିଁ। ଏଣେ ଗଁା ଗଁାରେ ଚୋରା ମଦ ବେପାର ବଢ଼ୁଥିବାରୁ ଅବକାରୀ ବିଭାଗର ଆଭିମୁଖ୍ୟକୁ ନେଇ ସନ୍ଦେହରେ ପଡ଼ିଛନ୍ତି ଅନୁଗୋଳ ଜିଲା କିଶୋରନଗର ବ୍ଲକବାସୀ।
କିଶୋରନଗର ବ୍ଲକରେ ଥିବା ୨୩ ପଞ୍ଚାୟତରେ ଚୋରା ମଦ କାରବାର ରୋକିବାକୁ ବଇଣ୍ଡା ଅବକାରୀ ଥାନା ସ୍ଥାପନ ହୋଇଥିଲା। ଭଡ଼ା ଘର ସାଙ୍ଗକୁ ଜଣେ ଏଏସ୍ଆଇ ଓ ୨ ଜଣ କନଷ୍ଟେବଳରେ କାର୍ଯ୍ୟ ଚାଲିଥିଲା। ୫୫ନଂ. ଜାତୀୟ ରାଜପଥ ପ୍ରଶସ୍ତୀକରଣ ପାଇଁ ୨୦୧୬ରେ ଏହି ଥାନା ଘରକୁ ଭାଙ୍ଗି ଦିଆଯାଇଥିଲା। ଏଥିସହ ଜାମୁନାଳୀଠାରେ ବଇଣ୍ଡା ଅବକାରୀ ଥାନା ସ୍ଥାପନ ନିମନ୍ତେ ଜମି ଚିହ୍ନଟ ହୋଇଥିଲା। ଏହାପରେ ୩୩ ଲକ୍ଷ ଟଙ୍କା ବିନିଯୋଗରେ ନୂଆ କୋଠା ନିର୍ମାଣ ୨୦୨୦ ଜୁନରୁ ଶେଷ ହୋଇଛି। ୨୦୨୧ ଜୁନରେ ଏହାକୁ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରାଯାଇସାରିଛି। କିନ୍ତୁ ଅବକାରୀ ବିଭାଗ ପକ୍ଷରୁ ଏହାକୁ କାର୍ଯ୍ୟକ୍ଷମ କରାଯାଉନାହଁି। ଫଳରେ ବଇଣ୍ଡା, ହଣ୍ଡପା ଓ କିଶୋରନଗର ଥାନା ଅଞ୍ଚଳରେ ଚୋରା ମଦ କାରବାର ବୃଦ୍ଧି ପାଇବାରେ ଲାଗିଛି। ହଣ୍ଡପା ଓ କିଶୋରନଗର ଥାନା ଅଞ୍ଚଳରେ ୨୦୨୧ ଏପ୍ରିଲରୁ ୨୦୨୨ ଫେବୃୟାରୀ ମଧ୍ୟରେ ୧୦୫ ଜଣଙ୍କୁ ଗିରଫ କରାଯାଇଛି। ୧୪୧ଟି ମାମଲା ରୁଜୁ ହୋଇଛି। ୩୩୮୦ ଲିଟର ଚୋରା ଦେଶୀ ମହୁଲି ମଦ, ୧୩୦ ଲିଟର ତାଡି, ୨୫ ଲିଟର ବିଦେଶୀ ମଦ ଜବତ କରାଯାଇଛି। ୪୧ ହଜାର କେଜି ମହୁଲ ପୋଚ ନଷ୍ଟ କରାଯାଇଛି। ଅସାଧୁ ବେପାରୀମାନେ ଗଁା ଗଁାରେ ବାଇକ୍ ଯୋଗେ ମଦ ପହଞ୍ଚାଉଛନ୍ତି। ଏପରି କି ଗ୍ରାମାଞ୍ଚଳର ତେଜରାତି, ଜଳଖିଆ, ପାନ ଦୋକାନ ଆଦିରେ ଚୋରା ମଦ ରଖି ବିକ୍ରି କରାଯାଉଥିବା ଅଭିଯୋଗ ହେଉଛି। ଥାନା କାର୍ଯ୍ୟକ୍ଷମ ହେଉ ନ ଥିବା କି ଅଧିକ କର୍ମଚାରୀ ନିଯୁକ୍ତ ହେଉ ନ ଥିବାରୁ ନିୟମିତ ଭାବେ ଚଢ଼ାଉ କରାଯାଉନାହିଁ। ତୁରନ୍ତ ଏଥିପ୍ରତି ଅବକାରୀ ବିଭାଗ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହୋଇଛି। ଏ ସମ୍ପର୍କରେ ବଇଣ୍ଡା ଅବକାରୀ ଅଧିକାରୀ ବଲବୀର ଗଡନାୟକ କହିଛନ୍ତି, ନୂତନ କୋଠାକୁ ବିଦ୍ୟୁତ୍ ସଂଯୋଗ ପାଇଁ ବିଭାଗ ପକ୍ଷରୁ ଆବେଦନ କରାଯାଇଛି। ପାଚେରି ନିର୍ମାଣ ସରିଲେ ଥାନା କାର୍ଯ୍ୟକ୍ଷମ ହେବ।