ଭୁବନେଶ୍ୱର:ରାଜ୍ୟ ସରକାରଙ୍କ ରପ୍ତାନି ପ୍ରୋତ୍ସାହନ ଏବଂ ବିପଣନ ନିର୍ଦ୍ଦେଶାଳୟ(ଡିଇପିଏମ୍) ପକ୍ଷରୁ କାର୍ଯ୍ୟକାରୀ କରାଯାଉଥିବା ରେଟ୍ କଣ୍ଟ୍ରାକ୍ଟ ସିଷ୍ଟମ ପୂର୍ବଭଳି ଜାରି ରହିବ। ରାଜ୍ୟ ସରକାର ଶିଳ୍ପ କ୍ଷେତ୍ରକୁ ଏ ନେଇ ଏକ ଭର୍ଚୁଆଲ ସମ୍ମିଳନୀରେ ପ୍ରତିଶ୍ରୁତି ଦେଇଛନ୍ତି। ରାଜ୍ୟରେ ଗଭର୍ନମେଣ୍ଟ ଇ-ନାମ(ଜିଇଏମ୍) ଢାଞ୍ଚାରେ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଠାରୁ ସାମଗ୍ରୀ କ୍ରୟ କରିବା ନେଇ ସରକାର ଯୋଜନା ରଖିଥିଲେ। ଏହାକୁ ଶିଳ୍ପଜଗତ ପକ୍ଷରୁ ତୀବ୍ର ବିରୋଧ କରାଯାଇଥିଲା। ଏହି ଯୋଜନା ବିରୋଧରେ କ୍ଷୁଦ୍ର ଶିଳ୍ପଗୁଡିକର ଯୁଗ୍ମ କାର୍ଯ୍ୟାନୁଷ୍ଠାନ କମିଟି ପକ୍ଷରୁ ଅନିର୍ଦ୍ଦିଷ୍ଟ କାଳ ଯାଏ ଧାରଣା ଦିଆଯିବା ନେଇ ଚେତାବନୀ ଦିଆଯାଇଥିଲା। ରାଜ୍ୟର କ୍ଷୁଦ୍ର ଶିଳ୍ପଗୁଡିକର ସ୍ବାର୍ଥକୁ ଧ୍ୟାନରେ ରଖି ପୂର୍ବଭଳି ଡିଇପିଏମ୍ ରେଟ୍ ସିଷ୍ଟମ ଲାଗୁ କରିବା ସହ ଅନ୍ୟ ସମସ୍ୟା ଉପରେ ସରକାର ଧ୍ୟାନ ଦିଅନ୍ତୁ ବୋଲି ଶିଳ୍ପଗୁଡିକ ବିଭିନ୍ନ ଦାବି ରଖିଥିଲେ। ଡିଇପିଏମ୍ ରେଟ୍ ସିଷ୍ଟମ ପୂର୍ବଭଳି ବଜାୟ ରହିବାକୁ ଥିବାରୁ ଏହା ରାଜ୍ୟର ଏମ୍ଏସ୍ଏମ୍ଇଗୁଡିକ ଲାଗି ଆଶ୍ୱସ୍ତି ବୋଲି କୁହାଯାଉଛି।
ସରକାରଙ୍କ ଏଭଳି ନିଷ୍ପତ୍ତିକୁ କ୍ଷୁଦ୍ରଶିଳ୍ପ ପକ୍ଷରୁ ସ୍ବାଗତ କରାଯାଇଛି। ମୁଖ୍ୟମନ୍ତ୍ରୀଙ୍କୁ ବିଭିନ୍ନ ଶିଳ୍ପ ସଂଘ ପକ୍ଷରୁ ଧନ୍ୟବାଦ ପ୍ରଦାନ କରାଯାଇଛି। ସଂଘଗୁଡିକ ପକ୍ଷରୁ ମିଳିତ ପ୍ରେସ୍ ବିବୃତିରେ କୁହାଯାଇଛି, ନିଷ୍ପତ୍ତି ଦ୍ୱାରା ରାଜ୍ୟର ୧୦୦୦ରୁ ଊର୍ଦ୍ଧ୍ୱ ଏମ୍ଏସ୍ଏମ୍ଇକୁ ବନ୍ଦ ହେବାରୁ ରକ୍ଷା କରାଯାଇପାରିଛି। ସେହିଭଳି ୧ ଲକ୍ଷ ନିଯୁକ୍ତି ରକ୍ଷା ଦିଗରେ ଏହା ସହାୟକ ହେବ। ଭର୍ଚୁଆଲ ବୈଠକରେ ରାଜ୍ୟ ଏମ୍ଏସ୍ଏମ୍ଇ ବିଭାଗ ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ, ବିଭାଗର ଅନ୍ୟ ବରିଷ୍ଠ ଅଧିକାରୀ ଏବଂ ଶିଳ୍ପ ପ୍ରତିନିଧିମାନେ ଉପସ୍ଥିତ ଥିଲେ। ସୂଚନାଯୋଗ୍ୟ, କ୍ଷୁଦ୍ରଶିଳ୍ପ ସଂଘଗୁଡିକ ବିଭିନ୍ନ ଦାବିରେ ୨୧ ନଭେମ୍ବରଠାରୁ ଧାରଣା ଦେଇଥାନ୍ତେ। ମାତ୍ର ରାଜ୍ୟ ସରକାର ଦାବିକୁ ମାନି ନେଇ ଥିବାରୁ ଧାରଣା ପ୍ରତ୍ୟାହାର କରାଯାଇଥିବା କ୍ଷୁଦ୍ର ଶିଳ୍ପ ସଂଘ ଓସିଆ ସଭାପତି ସ୍ମରଜିତ ମହାନ୍ତି, ଓୟେଆ ସଭାପତି ମିହିର କାନୁନ୍ଗୋ, ଓସ୍ମେ ମହାସଚିବ ସାତ୍ତ୍ୱିକ ସ୍ବାଇଁ ଏବଂ ୟୁପିଏମ୍ଏ ସଭାପତି ଭାଗୀରଥି ନନ୍ଦ ମିଳିତ ପ୍ରେସ୍ ବିବୃତିରେ ସୂଚନା ଦେଇଛନ୍ତି।