ନାଉଗଁା,୩୦ା୧(ସ୍ବ.ପ୍ର.):ଜଗତ୍ସିଂହପୁର ଜିଲା ନାଉଗଁା ବ୍ଲକ ଦେଇ ପ୍ରବାହିତ ହେଉଛି ଦେବୀ ନଦୀ। ଶିଖର ପଞ୍ଚାୟତ ପାରିଶିଖରଠାରେ ଦେବୀନଦୀ କୂଳ ଖାଉଥିବାରୁ ଜଳସେଚନ ବିଭାଗ ପକ୍ଷରୁ ପଥର ପ୍ୟାକିଂ ଓ ବୁରୁଜ ନିର୍ମାଣ କାର୍ଯ୍ୟ ଜାରିରହିଛି। ଏହି ନିର୍ମାଣ ପାଇଁ ସରକାରଙ୍କ ପକ୍ଷରୁ ୯ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟ କରାଯାଉଛି। ନଦୀ ମଧ୍ୟରେ ୭ ଶହ ମିଟର ପଥର ପ୍ୟାକିଂ ସହ ୬ଟି ବୁରୁଜ ନିର୍ମାଣ କରାଯିବ। ପଥର ପ୍ୟାକିଂ ଓ ବୁରୁଜ ନିର୍ମାଣ ପାଇଁ ଠିକାଦାରଙ୍କ ପକ୍ଷରୁ ହାଇଓ୍ବାରେ ପ୍ରତିଦିନ ଓଭର ଲୋଡିଂ କରି ପଥର ନଦୀବନ୍ଧରେ ପରିବହନ କରାଯାଉଛି। ଫଳରେ ନଦୀବନ୍ଧ ଦୁର୍ବଳ ହେବାରେ ଲାଗିଛି। ସରକାରଙ୍କ ନିୟମାନୁସାରେ ପରିବହନ କରୁଥିବା ହାଇଓ୍ବାରେ ୧୫ରୁ ୨୦ଟନ୍ ପଥର ବୋଝେଇ ହୋଇ ଆସିବା କଥା। କିନ୍ତୁ ହାଇଓ୍ବାରେ ୩୦ରୁ ୪୦ ଟନ ପଥର ବୋଝେଇ ହୋଇଆସୁଛି। ଏଥିଯୋଗୁ ନଦୀ ବନ୍ଧ ରାସ୍ତା ବହୁ ସ୍ଥାନରେ ଫାଟି ଗଲାଣି। ପରିବହନ ବିଭାଗ ପକ୍ଷରୁ ହାଇଓ୍ବାଗୁଡିକରେ ହାଇ ସିକ୍ୟୁରିଟି ନମ୍ବର ପ୍ଲେଟ ବାଧ୍ୟତା କରାଯାଇଥିବା ବେଳେ ଅଧିକାଂଶ ଗାଡ଼ିରେ ପୁରୁଣା ଓ ହାତଲେଖା ନମ୍ବର ପ୍ଲେଟ ଦେଖିବାକୁ ମିଳିଛି। ତେଣୁ ପରିବହନ କରୁଥିବା ଗାଡିଗୁଡିକର ଫିଟ୍ନେସ, ଇନ୍ସ୍ୟୁରାନ୍ସ, ଲାଇସେନ୍ସ ଆଦି ଅଛି କି ନାହିଁ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ପଥର ଗାଡିଗୁଡିକ ରାତିରେ ଆସି ସକାଳେ ନଦୀ କୂଳରେ ପହଞ୍ଚୁ ଥିବା ସ୍ଥାନୀୟ ବାସିନ୍ଦା ମତବ୍ୟକ୍ତ କରିଛନ୍ତି।
ସୂଚନାଯୋଗ୍ୟ, ଦେବୀ ନଦୀର ବାମ ପାର୍ଶ୍ୱଟି ଜଗତ୍ସିଂହପୁର, କଟକ, ପୁରୀ ଜିଲାର ସୀମାନ୍ତ ଅଞ୍ଚଳରେ ରହିଛି। ସେହିପରି ଦେବୀ ନଦୀ ବନ୍ଧଟି ନିମାପଡା, ଜଗତ୍ସିଂହପୁର, ନିଆଳି ଜଳ ସେଚନ ବିଭାଗ ଅଧୀନରେ ରହିଛି। ଯେହେତୁ ବନ୍ଧଟି ସୀମାନ୍ତ ଅଞ୍ଚଳରେ ରହିଛି କୌଣସି ବିଭାଗର ଅଧିକାରୀମାନେ ଏଥିପ୍ରତି ଦୃଷ୍ଟି ଦେଉନାହାନ୍ତି। ପଥର ବୋଝେଇ ଗାଡି ବିଶେଷକରି ନିଆଳି ଓ କାକଟପୁର ଥାନା ଦେଇ ଆସୁଥିବା ବେଳେ ପୁରୀ ଓ କଟକ ଆଞ୍ଚଳିକ ପରିବହନ କାର୍ଯ୍ୟାଳୟ ଅଧୀନରେ ରହୁଛି। ପଥର ବୋଝେଇ ଗାଡି ଆସିବା ସମୟରେ କୌଣସି ତନଖି ହେଉ ନ ଥିବା ଅଭିଯୋଗ ହେଉଛି। ଏ ସଂକ୍ରାନ୍ତରେ ପୁରୀ ଓ କଟକ ଆଞ୍ଚଳିକ ପରିବହନ ଅଧିକାରୀଙ୍କ ସହ ଯୋଗାଯୋଗ କରାଯାଇଥିଲେ ହେଁ ସମ୍ଭବ ହୋଇପାରିନାହିଁ। ଏ ସମ୍ପର୍କରେ କାକଟପୁର ଜଳସେଚନ ବିଭାଗର ଯନ୍ତ୍ରୀ ତପନ ନାୟକଙ୍କୁ ପଚାରିବାରେ ଯେଉଁ ବାଟ ଦେଇ ହାଇଓ୍ବାରେ ପଥର ପରିବହନ ହେଉଛି ସେହି ବନ୍ଧ ସବୁ ନଷ୍ଟ ହେଉଛି। ସେହି ବନ୍ଧରେ ମୋରମ ପକାଇବାକୁ କାମ କରୁଥିବା ଠିକାଦାରଙ୍କୁ କୁହାଯାଇଛି। ଠିକାଦାର କେତେକ ସ୍ଥାନରେ ମୋରମ ପକାଇଥିବା ବେଳେ ପରେ ପୁଣି ମୋରମ ପକାଇବ ବୋଲି କହିଛନ୍ତି। ସେହିପରି ପଥର ପରିବହନ କରୁଥିବା ହାଇଓ୍ବାଗୁଡିକ ଓଭର ଲୋଡିଂ ଯୋଗୁ ନଦୀବନ୍ଧର ଏପରି ଅବସ୍ଥା ହୋଇଛି ବୋଲି ସେ କହିଛନ୍ତି।