ଚନ୍ଦାହାଣ୍ଡି, ୨୨।୫(ଡି.ଏନ୍.ଏ.) : ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ସଦର ମହକୁମାରେ ୧୨ ଦିନ ଧରି ଚାଲିଥିବା ଧନୁଯାତ୍ରା ଶୁକ୍ରବାର ବିଳମ୍ବିତ ରାତିରେ ସରିଛି। ଅନ୍ତିମ ଦିବସରେ ମନ୍ତ୍ରୀ କୃଷ୍ଣ ବଳରାମଙ୍କୁ ନେଇ ମଥୁରା ରାଜଦରବାରରେ ପ୍ରବେଶ କରିଛନ୍ତି । ମଥୁରାବାସୀ ମଧ୍ୟ କୃଷ୍ଣ ବଳରାମଙ୍କୁ ଭବ୍ୟ ସ୍ବାଗତ କରିଛନ୍ତି। ରାଜ ପ୍ରସାଦ ଦ୍ୱାରରେ କୃଷ୍ଣ ବଳରାମଙ୍କୁ ମାରିବାକୁ କଂସ କୁବଳୟା ହସ୍ତୀକୁ ଜଗାଇଥିବା ବେଳେ କୃଷ୍ଣ ତାକୁ ମାରି ମହଲରେ ପ୍ରବେଶ କରିଛନ୍ତି। ଚାଣୁର ମୁଷ୍ଟିକ, ସୁନାଶ ଓ ଅନ୍ୟ ମଲ୍ଲଙ୍କ ସହ ଯୁଦ୍ଧ କରି କୃଷ୍ଣ ସେମାନଙ୍କୁ ପରାସ୍ତ କରିଛନ୍ତି। ଶେଷରେ ଏକାକି ଅନୁଭବ କରି କୃଷ୍ଣଙ୍କ ଶରଣ ପସିଛନ୍ତି କଂସ ମହାରାଜ। ଶେଷରେ ମଞ୍ଚରୁ ପଡି କଂସଙ୍କ ମୃତ୍ୟୁ ହୋଇଛି। ପ୍ରତିଶୃତି ମୁତାବକ କୃଷ୍ଣ ଆଉଥରେ ଉଗ୍ରସେନଙ୍କୁ ମଥୁରା ନରେଶ ଭାବେ ଅଭିଷେକ କରାଇଛନ୍ତି।
ଶେଷ ଦିନରେ କଂସଙ୍କ ନିମନ୍ତ୍ରଣ ପାଇ ରାଜଦରବାର ଅତିଥିଭାବେ ଚନ୍ଦାହାଣ୍ଡି ସରପଞ୍ଚ ଗଙ୍ଗେଶ୍ୱରୀ ପୁଜାରୀ, ପୂଜା କମିଟି ସଭାପତି ଦୁର୍ଯ୍ୟୋଧନ ପୁଜାରୀ, କମଳ ପୁଜାରୀ, ବବି ବିଷୋୟୀ, ପୂର୍ବତନ ସରପଞ୍ଚ ଲଛମନ ମାଝି, ରଜତ ଜଗତ, ଶଙ୍କର ରାଉତ, ଚଇତୁରାମ ଦଣ୍ଡସେନା ଯୋଗ ଦେଇଥିଲେ। ବଲାଙ୍ଗୀର ଅଞ୍ଚଳର ପ୍ରସିଦ୍ଧ କଳାକାରଙ୍କ ଦ୍ୱାରା ଏହି ଧନୁଯାତ୍ରା ପରିବେଷଣ କରାଯାଇଛି। ପୂଜା କମିଟି ତରଫରୁ ଧନୁଯାତ୍ରାର ସମସ୍ତ କଳାକାରଙ୍କୁ ଉତରୀୟ ଓ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା। ଏହି ନାଟକ ୧୨ଦିନ ଚାଲି ଥିବା ବେଳେ ଧନୁଯାତ୍ରା ଦେଖିବା ନିମନ୍ତେ ଚନ୍ଦାହାଣ୍ଡି ବ୍ଲକ ସମେତ ସୀମାନ୍ତ ଛତିଶଗଡ ଏବଂ ପଡୋଶୀ କଳାହାଣ୍ଡି ଜିଲାର ହଜାର ହଜାର ଦର୍ଶକ ଉପସ୍ଥିତ ଥିଲେ। ଏହି କାର୍ଯ୍ୟକ୍ରମକୁ ବିଘ୍ନେଶ୍ୱର ଆଚାରୀ, ନଳିନୀ ଦାସ, ରତ୍ନାକର ପୁଜାରୀ, ବାସୁଦେବ ସୁନା, କୈଳାସ ବେହେରା, ଜଗଦିଶ ରାଉତ ପ୍ରମୁଖ ପରିଚାଳନା କରିଥିଲେ ।