ପଟ୍ଟାଙ୍ଗୀ,୧।୧୦(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅନ୍ତର୍ଗତ ତଥା ଆନ୍ଧ୍ର ସୀମାନ୍ତ କୋଟିଆ ପଞ୍ଚାୟତର ଦୁଇଟି ସ୍ଥାନରେ ଓଡ଼ିଶା ସରକାରଙ୍କ ରହିଥିବା ଓଡ଼ିଆ ନାମଫଳକକୁ ଆନ୍ଧ୍ର ମଙ୍ଗଳବାର ଲିଭାଇ ଦେଇଥିଲା। ଏ ସମ୍ପର୍କରେ ଧରିତ୍ରୀରେ ଖବର ପ୍ରକାଶ ପାଇବା ପରେ ଏହାକୁ ନେଇ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। କୋରାପୁଟ ଜିଲା ପ୍ରଶାସନ ମଧ୍ୟ ଏହାକୁ ଗୁରୁତର ସହ ନେଇଥିଲା। ଜିଲାପାଳ ଅବ୍ଦଲ ଏମ୍. ଅଖତର ତୁରନ୍ତ ଏହାର ତଦନ୍ତ କରି ଏହି ଓଡ଼ିଆ ନାମଫଳକ ଲେଖିବାକୁ ପଟ୍ଟାଙ୍ଗୀ ଏବିଡିଓ କୃଷ୍ଣଚନ୍ଦ୍ର ବିଶ୍ୱାସ ରାଏଙ୍କୁ ନିର୍ଦ୍ଦେଶ ଦେଇଥିଲେ। ଏବିଡିଓ ରାଏ, କନିଷ୍ଠଯନ୍ତ୍ରୀ ଅଜୟ ରାମ ତରାଇ, ଏପିଓ ସୌମେନ୍ଦ୍ର ନାୟକ, ପିଇଓ ନବ ହନ୍ତାଳ ପ୍ରମୁଖ କୋଟିଆ ଯାଇ ଗୁରୁବାର ଲିଭାଯାଇଥିବା ଏହି ଓଡ଼ିଆ ନାମଫଳକଗୁଡ଼ିକୁ ଲେଖିଛନ୍ତି। ଜିଲାପାଳଙ୍କ ଏପରି ପଦକ୍ଷେପକୁ ବିଭିନ୍ନ ମହଲରେ ସ୍ବାଗତ କରାଯାଇଛି। ସୂଚନାଯୋଗ୍ୟ, କୋଟିଆ ପଞ୍ଚାୟତର ବିଭିନ୍ନ ଗ୍ରାମରେ ଗତ ଏପ୍ରିଲ ୧ରେ କୋରାପୁଟ ଜିଲା ପ୍ରଶାସନ ଓ ପଟ୍ଟାଙ୍ଗୀ ବ୍ଲକ ପ୍ରଶାସନ ସହଯୋଗରେ ଏହି ଓଡ଼ିଆ ନାମଫଳକ ଲଗାଯାଇଥିଲା । ଆନ୍ଧ୍ର ସରକାରଙ୍କ କେତେଜଣ କର୍ମଚାରୀ ମଙ୍ଗଳବାର କୋଟିଆରେ ପହଞ୍ଚତ୍ କେତେକ ଗ୍ରାମରେ ତେଲୁଗୁ ନାମଫଳକ ଲଗାଇବା ସହ ନେରେଡିବାଲସା ଓ ତାଡ଼ିବାଲାସା ଗ୍ରାମରେ ଥିବା ଓଡ଼ିଆ ନାମଫଳକକୁ ଲିଭାଇ ଦେଇଥିଲେ।
