କାମାକ୍ଷାନଗର, ୯ା୭(ଡି.ଏନ୍.ଏ.) କାମାକ୍ଷାନଗର ବ୍ଲକ ତୁମୁସିଙ୍ଗା ପଞ୍ଚାୟତର ଦୁର୍ଗମ ମହୁଲଡ଼ଗର ଗ୍ରାମକୁ ଶୁକ୍ରବାର ପରିଦର୍ଶନରେ ଯାଇ ସମସ୍ୟା ବୁଝିଛନ୍ତି ଜିଲାପାଳ ସରୋଜ କୁମାର ସେଠୀ। ଏହି ଉପଲକ୍ଷେ ସେ ପାରମ୍ପରିକ ବାଦ୍ୟର ତାଳେ ତାଳେ ଆଦିବାସୀ ମହିଳାଙ୍କ ସହ ନୃତ୍ୟ ପରିବେଷଣ କରିଥିଲେ। ଏଥିସହ ଅଞ୍ଚଳରେ ବିକାଶ କାର୍ଯ୍ୟ ତ୍ୱରାନ୍ବିତ କରାଯିବ ବୋଲି ସେ ଅଞ୍ଚଳବାସୀଙ୍କୁ ପ୍ରତିଶ୍ରୁତି ଦେଇଛନ୍ତି।
ମହୁଲଡ଼ଗର ଅଞ୍ଚଳରେ ଆଶାଜନକ ବିକାଶ ହୋଇପାରିନାହିଁ। ଏହାକୁ ନେଇ ବିଭିନ୍ନ ସମୟରେ ଗଣମାଧ୍ୟମରେ ଖବର ପ୍ରକାଶ ପାଉଛି। ଦୁର୍ଗମ ଅଞ୍ଚଳର ବାସ୍ତବ ସ୍ଥିତି ପରଖିବାକୁ ରାଜ୍ୟ ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଥିବାବେଳେ ଜିଲାପାଳ ଅନ୍ୟ ପ୍ରଶାସନିକ ଅଧିକାରୀଙ୍କ ସହିତ ଶୁକ୍ରବାର ସକାଳେ ଗ୍ରାମରେ ପହଞ୍ଚତ୍ଥିଲେ। ଜିଲାପାଳଙ୍କୁ ଦେଖି ଅଞ୍ଚଳବାସୀ ଉତ୍ସାହିତ ହୋଇପଡ଼ିଥିବାବେଳେ ଭବ୍ୟ ସ୍ବାଗତ କରିଥିଲେ। ଏହାପରେ ଜିଲାପାଳ ଗ୍ରାମବାସୀଙ୍କ ସହ ସେମାନେ ଭୋଗୁଥିବା ଅସୁବିଧା ସମ୍ପର୍କରେ ସିଧାସଳଖ ଆଲୋଚନା କରିଥିଲେ। ପାନୀୟ ଜଳ, ରାସ୍ତାଘାଟକୁ ନେଇ ଲାଗି ରହିଥିବା ସମସ୍ୟାର କିଭଳି ସମାଧାନ ହୋଇପାରିବ, ସେ ନେଇ ପରାମର୍ଶ ଲୋଡ଼ିଥିଲେ। ସରକାରୀ ଯୋଜନା ପହଞ୍ଚତ୍ ପାରୁଛି କି ନାହିଁ, ଲୋକମାନେ କିପରି ସରକାରଙ୍କ ଜନହିତକର ଯୋଜନାର ଲାଭ ଉଠାଇ ପାରିବେ ସେ ନେଇ ଆଲୋଚନା କରିଥିଲେ। ଜିଲାପାଳଙ୍କ ସହିତ ଉପଜିଲାପାଳ ଜ୍ୟୋତିଶଙ୍କର ସାହୁ, ବିଡିଓ ବିକାଶ ମହାନ୍ତି, ଜିଲା ପରିଷଦ ସଭ୍ୟ ଅଶୋକ ବେହେରା, ସରପଞ୍ଚ ପ୍ରିୟଙ୍କା ସାହୁ, ନିର୍ବାହୀ ଅଧିକାରୀ ଗୋବର୍ଦ୍ଧନ ସାହୁ, ଯନ୍ତ୍ରୀ ପ୍ରହଲ୍ଲାଦ ନାଥ, ଆଦିବାସୀ ଚେତନା ସଙ୍ଗଠନ କର୍ମକର୍ତ୍ତା ଗଙ୍ଗାରାମ ପୂର୍ତ୍ତି, ୱାର୍ଡମେମ୍ବର ମଞ୍ଜୁ ପୂର୍ତ୍ତି, ଗ୍ରାମର ମଦନ ହେମ୍ବ୍ରମ୍, ଟୁନା ବିରୁଆ, ବୁଦ୍ଧିଆ ଚାତାର, ମଧୁ ଚାତାର ପ୍ରମୁଖ ସମସ୍ତ ଗ୍ରାମବାସୀ ଉପସ୍ଥିତ ଥିଲେ।