ଡାକ୍ତର ଅଭାବରୁ ରୋଗୀ ହନ୍ତସନ୍ତ
ପାରଳାଖେମୁଣ୍ଡି,୧୮।୪(ଡି.ଏନ୍.ଏ.) ଗଜପତି ଜିଲା ମୁଖ୍ୟ ଚିକିତ୍ସାଳୟ ଏବେ ଦୁରବସ୍ଥାରେ ଚାଲିଛି । ଡାକ୍ତର ଅଭାବ ଆଗରୁ ଚାଲିଆସିଛି ହେଲେ ଏବେ ଆନେସ୍ତେସିଆ ଡାକ୍ତର ନ ଥିବାରୁ ସମସ୍ୟା ଦ୍ୱିଗୁଣିତ ହୋଇଛି। ସାମାନ୍ୟ ଚିକିତ୍ସା ପାଇଁ ରୋଗୀ ଘରୋଇ ଚିକିତ୍ସାଳୟର ଦଲାଲଙ୍କ ଶିକାର ହେବାସହ ରାଜ୍ୟ ସରକାରଙ୍କ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର କାର୍ଡର ଦୁରୁପଯୋଗ ହେଉଥିବା ଅଭିଯୋଗ ହେଉଛି। ଜିଲା ମୁଖ୍ୟ ଚିକିତ୍ସାଳୟ ଉପରେ ନିର୍ଭର କରନ୍ତି ରାୟଗଡ଼ା ଜିଲାର ଗୁଣପୁର ସବ୍ ଡିଭିଜନ ଓ ଆନ୍ଧ୍ରର ଲୋକେ। ପୂର୍ବରୁ ଡାକ୍ତର ଅଭାବ ଏକ ମୁଖ୍ୟ ସମସ୍ୟା ହୋଇ ରହିଛି। ମୁଖ୍ୟ ଚିକିତ୍ସାଳୟରେ ମୋଟ ୬୧ ଡାକ୍ତର ପଦବୀ ରହିଥିବେଳେ ବର୍ତ୍ତମାନ ମାତ୍ର ୧୬ଜଣ ଡାକ୍ତର ଥିବା ଜଣାପଡ଼ିଛି। ଅସ୍ତ୍ରୋପଚାର ରୋଗୀ ବା ଗର୍ଭବତୀ ଚିକିତ୍ସା ପାଇଁ ଚିକିତ୍ସାଳୟ ଆସୁଛନ୍ତି । କିନ୍ତୁ ଚିକିତ୍ସା ନ ପାଇ ବାହାରକୁ ରେଫର ହେଉଛନ୍ତି। ସେପଟେ ରୋଗୀ ପ୍ରାଣ ବିକଳରେ ଦଲାଲଙ୍କ ହାତରେ ପଡ଼ି ଖର୍ଚ୍ଚାନ୍ତ ହେଉଛନ୍ତି । ସେପଟେ ରାଜ୍ୟ ସରକାରଙ୍କ ବିଏସ୍କେୱାଇ କାର୍ଡଧାରୀ ରୋଗୀଙ୍କଠାରୁ ଆନ୍ଧ୍ରର ଘରୋଇ ହସ୍ପିଟାଲର ଦଲାଲମାନେ ମିଛ କହି ଛୋଟରୁ ଛୋଟ ଚିକିତ୍ସା ପାଇଁ ଲକ୍ଷ ଲକ୍ଷ ଟଙ୍କା ଲୁଟିନେଇଥିବା ଅଭିଯୋଗ ହୋଇଛି।
ଦୀର୍ଘ ୬ ମାସରୁ ଅଧିକ ସମୟ ହେଲାଣି ଜିଲା ମୁଖ୍ୟ ଚିକିତ୍ସାଳୟରେ ଆନେସ୍ତେସିଆ ଡାକ୍ତରଙ୍କ ଅଭାବ ରହିଛି। ପ୍ରତିଦିନ ଲୋକେ ସାମାନ୍ୟ ଚିକିତ୍ସା ନ ପାଇ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ହେଲେ ସ୍ବାସ୍ଥ୍ୟ ବିଭାଗର ଅଧିକାରୀ ପ୍ରଫୁଲ୍ଲ କୁମାର ପଣ୍ଡାଙ୍କୁ ଯୋଗାଯୋଗ କରିବାରୁ ସମସ୍ୟା ନେଇ ରାଜ୍ୟ ସରକାରଙ୍କୁ ଚିଠି କରାଯାଇଛି ସ୍ଥାୟୀ ଡାକ୍ତର ନିଯୁକ୍ତି ପରେ ସମସ୍ୟାର ସମାଧାନ ହୋଇଯିବ ବୋଲି କହିଛନ୍ତି।