ଭଞ୍ଜନଗର,୨୨୧୧(ଡି.ଏନ.ଏ): ବରଗଡ଼ ଜିଲା ପଦ୍ମପୁରକୁ ନୂଆ ଜିଲା କରିବା ପାଇଁ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କିଛିଦିନ ପୂର୍ବେ ପ୍ରତିଶ୍ରୁତି ଦେଇଛନ୍ତି। ଏଭଳି ସ୍ଥିତିରେ ଗଞ୍ଜାମ ଜିଲାର ଭଞ୍ଜନଗର ଉପଖଣ୍ଡକୁ ଘୁମୁସର ଜିଲା ଓ ଆଉ କେତେକ ଅଞ୍ଚଳରେ ନୂଆ ଜିଲା ଦାବି ନେଇ ଆନ୍ଦୋଳନ ମୁଣ୍ଡ ଟେକିଛି ।
ଘୁମୁସର ଜିଲା ଘୋଷଣା ପାଇଁ ୨୯ବର୍ଷ ହେବ ଆନ୍ଦୋଳନ ଚଳାଇଥିବା ଭଞ୍ଜନଗର ଉପଖଣ୍ଡବାସୀ ବର୍ତ୍ତମାନ ପୁଣି ଦାବି ଦୋହରାଇବା ଆରମ୍ଭ କରିଦେଇଛନ୍ତି । ସୋମବାର କଂଗ୍ରେସ ଦଳ, ଭଞ୍ଜନଗର ଉତ୍କଳ ସାମ୍ବାଦିକ ସଂଘ ପକ୍ଷରୁ ଭଞ୍ଜନଗର ଗସ୍ତରେ ଆସିଥିବା ଜିଲା ପ୍ରକଳ୍ପ ନିର୍ଦ୍ଦେଶକଙ୍କୁ ଭେଟି ଘୁମୁସର ଜିଲା ଘୋଷଣା ଲାଗି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରାଯାଇଛି। ଏହା ପୂର୍ବରୁ ଶନିବାର ସ୍ଥାନୀୟ ନାୟକ ଭବନ ପରିସରରେ ହୋଇଥିବା ବରିଷ୍ଠ ନାଗରିକ ମଞ୍ଚ ବୈଠକରେ ମଧ୍ୟ ଜିଲା ଘୋଷଣା ଦାବି ନେଇ ଆଲୋଚନା ହୋଇଥିଲା। ଆଗାମୀ ଦିନରେ ବିଭିନ୍ନ ସଙ୍ଗଠନକୁ ନେଇ ଆନ୍ଦୋଳନକୁ ଜୋରଦାର କରିବାକୁ ବୈଠକରେ ନିଷ୍ପତ୍ତି ହୋଇଥିଲା। ଏହାପୁର୍ବରୁ ବାର୍ ଆସୋସିଏଶନ କାର୍ଯ୍ୟକାରୀଣି ବୈଠକରେ ମଧ୍ୟ ଘୁମୁସର ଜିଲା ଆନ୍ଦୋଳନ କିଭଳି ସଫଳ ହେବ ସେନେଇ ମୈଖିକ ଆଲୋଚନା ହୋଇଛି। ଆଗାମୀ ଦିନରେ ଆଉ କିଛି ସଙ୍ଗଠନ ଘୁମୁସର ଜିଲା ଦାବି ଆନ୍ଦୋଳନରେ ସାମିଲ ହେବା ସମ୍ଭାବନା ରହିଛି । ଭୌଗଳିକ ଦୃଷ୍ଟି କୋଣରୁ ଭଞ୍ଜନଗର ଉପଖଣ୍ଡ ରାଜ୍ୟର ବଡ଼ ଉପଖଣ୍ଡ। ଜଗନ୍ନାଥପ୍ରସାଦ ବ୍ଲକ ରଗଡ଼ାରୁ ଜଣେ ବ୍ୟକ୍ତିଙ୍କୁ ଛତ୍ରପୁରସ୍ଥିତ ଜିଲାପାଳଙ୍କ କାର୍ଯ୍ୟାଳୟକୁ ଯିବାକୁ ହେଲେ ୧୫୦ କିମି ୩ଟି ବସ୍ ବଦଳାଇ ଯିବାକୁ ପଡ଼ୁଛି। ଦୂରତ୍ୱ ଏବଂ ଅନ୍ୟାନ୍ୟ କାରଣରୁ ଘୁମୁସର ଜିଲାର ଆବଶ୍ୟକତା ରହିଛି । ୧୯୯୩ରେ ରାଜ୍ୟରେ ୧୩ ଜିଲାରୁ ୩୦ ଜିଲାକୁ ବୃଦ୍ଧି କରାଯାଇଥିଲା । ଏହାପରେ ଆଉ ନୂଆ ଜିଲା ପାଇଁ ରାଜ୍ୟ ସରକାର କୌଣସି ପଦକ୍ଷେପ ନେଇ ନ ଥିଲେ। କିନ୍ତୁ ୧୩ରୁ ୩୦ ଜିଲାକୁ ବୃଦ୍ଧି ପରେ ଆଉ କିଛି ନୂତନ ଜିଲା ଘୋଷଣା ପାଇଁ କେତକ ଜିଲାରେ ପରବର୍ତ୍ତୀ ପର୍ଯ୍ୟାୟରେ ବିଭିନ୍ନ ଅଞ୍ଚଳକୁ ନେଇ ନୂଆ ଜିଲା ଘୋଷଣା ଦାବି ଉଠିଥିଲା। କିନ୍ତୁ ଜନତାଦଳ, କଂଗ୍ରେସ, ବିଜେଡ଼ି ଓ ଭାଜପା ମେଣ୍ଟ ସରକାର ଏବଂ ବର୍ତ୍ତମାନର ବିଜେଡ଼ି ସରକାର ଚାଲିଥିଲେ ମଧ୍ୟ ଜିଲା ଦାବି ପ୍ରତି କୌଣସି ସରକାର ଗୁରୁତ୍ୱ ଦେଇନାହାନ୍ତି।