ମାଲକାନଗିରି,୨୬ା୪: ମାଲକାନଗିରି ଜିଲା ସଦରସ୍ଥିତ କୋଭିଡ୍ ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଜଣେ ମହିଳା ସୋମବାର ଏକ ଶିଶୁପୁତ୍ର ଜନ୍ମ ଦେଇଛନ୍ତି। ମହିଳା ଜଣକ କରୋନା ସଂକ୍ରମିତ ହୋଇଥିବାରୁ ତାଙ୍କର ପ୍ରସବ କିପରି ହେବ ସେ ନେଇ ପରିବାର ଲୋକେ ଚିନ୍ତିତ ଥିଲେ। ଡାକ୍ତରୀ ଟିମ୍ କିନ୍ତୁ କର୍ତ୍ତବ୍ୟକୁ ଠିକ୍ଭାବେ ପାଳନ କରିଛନ୍ତି। ଜିଲା କୋଭିଡ୍ ନୋଡାଲ ଅଧିକାରୀ ଡା. କୃଷ୍ଣଚନ୍ଦ୍ର ମହାପାତ୍ରଙ୍କ ନେତୃତ୍ୱରେ ଡା. ଅନୁପମା ମହାନା ସମସ୍ତ ସୁରକ୍ଷା ବ୍ୟବସ୍ଥା ସହ ମହିଳାଙ୍କ ପ୍ରସବ କରାଇଥିଲେ।
ସୂଚନା ଅନୁଯାୟୀ, ମାଲକାନଗିରି ଜିଲା ଖଇରପୁଟ ବ୍ଲକ୍ ପୋଡ଼ାଘାଟ ଗ୍ରାମର ଜଣେ ଗର୍ଭବତୀ ୫ଦିନ ତଳେ କରୋନା ସଂକ୍ରମିତ ଚିହ୍ନଟ ହୋଇଥିଲେ। ଏହାପରେ ତାଙ୍କୁ ମାଲକାନଗିରି କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଥିଲା। ରବିବାର ମହିଳାଙ୍କ ପ୍ରସବ ଯନ୍ତ୍ରଣା ହୋଇଥିଲା। ପରିବାର ଲୋକେ ଏହା ଜାଣି ଚିନ୍ତାରେ ପଡ଼ିଥିଲେ। ତେବେ ଡାକ୍ତରମାନଙ୍କ କର୍ତ୍ତବ୍ୟ ନିଷ୍ଠା ଯୋଗୁ ସୁରକ୍ଷିତ ଭାବେ ପ୍ରସବ ହୋଇପାରିଛି। ଏବେ ଉଭୟ ମା’ ଏବଂ ଶିଶୁର ସ୍ବାସ୍ଥ୍ୟାବସ୍ଥା ଭଲ ରହିଛି। ତେବେ ଶିଶୁଟିକୁ ମା’ଠାରୁ ଦୂରରେ ରଖାଯାଇଥିବା ବେଳେ କିଛିଦିନ ମା’ କ୍ଷୀର ବଦଳରେ ବୋତଲ କ୍ଷୀର ଦିଆଯିବ ବୋଲି ସୂଚନା ମିଳିଛି। ଅନ୍ୟପକ୍ଷେ ଡାକ୍ତରଙ୍କ କାର୍ଯ୍ୟକୁ ସାଧାରଣରେ ପ୍ରଶଂସା କରାଯାଇଛି।