ପୁରୀ,୧୫ା୨(ଅଜିତ୍ ମହାନ୍ତି)ପୁରୀ ଜିଲା ମୁଖ୍ୟ ଚିକିତ୍ସାଳୟରେ ଅନେକ ଡାକ୍ତର ଦୀର୍ଘଦିନ ଧରି କାର୍ଯ୍ୟ କରି ଆସୁଥିବାବେଳେ ସେମାନଙ୍କ ମନମୁଖୀ କାର୍ଯ୍ୟ ନେଇ ରୋଗୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ମାତ୍ର ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଏବେ କର୍ତ୍ତୃପକ୍ଷଙ୍କ ସ୍ବଚ୍ଛତା ଓ କାର୍ଯ୍ୟଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ସୂଚନାଯୋଗ୍ୟ, ପେଣ୍ଠକଟା ମେରାଇନ୍ ଥାନା ଅନ୍ତର୍ଗତ ବାଲିଗୁଆଳି ଅଞ୍ଚଳର ବିକ୍ରମ କେଶରୀ ପ୍ରଧାନ ଅଭିଯୋଗ କରିଛନ୍ତି ଯେ, ଗତମାସ ୨ ତାରିଖରେ ସେ ତାଙ୍କ ଜେଜେ ଘନ ପ୍ରଧାନଙ୍କୁ ଅସୁସ୍ଥତା ଯୋଗୁ ପୁରୀ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ପଞ୍ଜୀକରଣ କରି ଦାୟିତ୍ୱରେ ଥିବା ଡାକ୍ତରଙ୍କୁ ଦେଖାଇଥିଲେ। ସେ ରୋଗୀଙ୍କୁ ଦେଖି କିଛି ପରୀକ୍ଷା କରାଇବା ପାଇଁ ଲେଖିଥିଲେ। ଉକ୍ତ ପରୀକ୍ଷାଗୁଡିକ ଡାକ୍ତରଙ୍କ କହିବା ଅନୁଯାୟୀ ବାହାରେ ଘରୋଇ ଲ୍ୟାବ୍ରେ କରାଯାଇଥିଲା। ପରେ ରିପୋର୍ଟଗୁଡିକ ନେଇ ପୁନର୍ବାର ଡାକ୍ତରଙ୍କୁ ଦେଖାଇବା ପରେ ଡାକ୍ତର ରୋଗ ବିଷୟରେ କିଛି ନ କହି ପ୍ରେସ୍କ୍ରିପ୍ଶନ ପଛରେ ତାଙ୍କ ମୋବାଇଲ ନମ୍ବର ଲେଖିଥିଲେ ଏବଂ ନିଜ ପ୍ରାଇଭେଟ କି୍ଲନିକ ଠିକଣା ଦେଇ ପଠାଇଥିଲେ। ସେ ସେଠାକୁ ଯାଇଥିଲେ ମଧ୍ୟ କ୍ଲିନିକ ବନ୍ଦ ଥିବାରୁ ପୁଣି ମେଡିକାଲକୁ ଆସି ମେଡିସିନ ଲେଖିବା ପାଇଁ ଅନୁରୋଧ କରିଥିଲେ। ମାତ୍ର ସମ୍ପୃକ୍ତ ଡାକ୍ତର ମଧ୍ୟାହ୍ନ ୧୨ଟା ପରେ ସେହି ପ୍ରାଇଭେଟ କ୍ଲିନିକ୍ ଯିବା ପାଇଁ ପରାମର୍ଶ ଦେଇଥିଲେ।
ବିକ୍ରମ ସେଠାକୁ ଯିବାରୁ ସଂପୃକ୍ତ ଡାକ୍ତରଙ୍କୁ ଭେଟିଥିଲେ। ସେ କିଡ୍ନୀ ଖରାପ ହୋଇଯାଇଛି ବୋଲି କହିଥିଲେ। ପରେ ମେଡିସିନ କିଣି ତା’ର ବ୍ୟବାହର ଜାଣିବା ପାଇଁ ସଂପୃକ୍ତ ଡାକ୍ତରଙ୍କୁ ଯୋଗାଯୋଗ କରିବାରେ ଡାକ୍ତର ତାଙ୍କୁ ଦୁର୍ବ୍ୟବହାର କରି ଫୋନ କାଟିଦେଇଥିଲେ। ପରେ ବିକ୍ରମଙ୍କ ସନ୍ଦେହ ହେବାରୁ ସେ ଗତ ମାସ ୪ ତାରିଖରେ ଅସୁସ୍ଥ ଜେଜେଙ୍କୁ ଭୁବନେଶ୍ୱରସ୍ଥିତ ଏକ ଘରୋଇ ମେଡିକାଲ ନେଇଥିଲେ। ଡାକ୍ତର ପରୀକ୍ଷା କରି କିଡ୍ନୀ ଭଲ ଥିବା କହିଥିଲେ। କେବଳ ପରିଶ୍ରା ସଂକ୍ରମଣ ହୋଇଛି ଓ ମେଡିସିନ ଖାଇଲେ ସୁସ୍ଥ ହୋଇଯିବେ ବୋଲି କହିଥିଲେ। ବିକ୍ରମ ଗତ ମାସ ୯ ତାରିଖରେ ଜିଲା ମୁଖ୍ୟ ଚିକିତ୍ସା ଅଧିକାରୀ ସୁଜାତା ମିଶ୍ରଙ୍କୁ ଭେଟି ସମ୍ପୃକ୍ତ ଡାକ୍ତରଙ୍କ ବିରୋଧରେ ଅଭିଯୋଗ କରିଥିଲେ। ପରେ ପୁଣି ଗତ ୩୦ତାରିଖରେ ପୁନର୍ବାର ସିଡିଏମ୍ଙ୍କ କାର୍ଯ୍ୟାଳୟରେ ଅଭିଯୋଗ କରିଥିଲେ। ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ତେବେ ସଂପୃକ୍ତ ଡାକ୍ତରଙ୍କ ନାମରେ ପୂର୍ବରୁ ତାଙ୍କ ନିକଟରେ ଅଭିଯୋଗ ରହିଛି ଏବଂ ଏନେଇ ମେଡିକାଲ ସୁପରିଣ୍ଟେଣ୍ଡେଣ୍ଟଙ୍କୁ ତଦନ୍ତ ପାଇଁ ଅବଗତ କରାଯିବ ବୋଲି କହିଥିଲେ। ଏହାସତ୍ତ୍ୱେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଚୁପ୍ ବସିଛନ୍ତି। ବିକ୍ରମ ଏ ନେଇ ଜିଲାପାଳଙ୍କ ଦ୍ୱାରସ୍ଥ ହେବେ ବୋଲି ସୂୂଚନା ଦେଇଛନ୍ତି।