![](https://www.dharitri.com/wp-content/uploads/2022/11/7n.jpg)
କଳିଙ୍ଗନଗର,୧୮ା୧୧(ଡି.ଏନ.ଏ.): ଦାନଗଦୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ପ୍ରଥମ ରୋଗୀ କଲ୍ୟାଣ ସମିତି ବୈଠକ ଭିଡିଓ କନଫରେନ୍ସରେ ଅନୁଷ୍ଠିତ ହୋଇଯାଇଛି। ମନ୍ତ୍ରୀ ଇଂ. ପ୍ରୀତିରଞ୍ଜନ ଘଡ଼ାଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ରୋଗୀସେବାକୁ ପ୍ରାଥମିକତା ଦିଆଯାଇଛି। ଏହା ବ୍ଲକ୍ର ମୁଖ୍ୟ ଡାକ୍ତରଖାନା ହୋଇଥିବାରୁ ରୋଗୀଙ୍କ ସଂଖ୍ୟା ବୃଦ୍ଧି ହେବା ସ୍ବାଭାବିକ। ସେଥିପାଇଁ ଡାକ୍ତରଙ୍କ ଉପସ୍ଥିତି ରୋଗୀଙ୍କ ପକ୍ଷରେ ଜାଣିବା ନିହାତି ଆବଶ୍ୟକ। ଏହି କାରଣରୁ କେଉଁ ଡାକ୍ତର କେଉଁ ସମୟରେ ଡ୍ୟୁଟିରେ ଅଛନ୍ତି, ତାହାର ସବିଶେଷ ବିବରଣୀ, ପ୍ରତ୍ୟେକ ଦିନ ଏକ ବୋର୍ଡରେ ଲେଖାଯିବ। ଫଳରେ ଚିକିତ୍ସା ପ୍ରଦାନ ସୁବ୍ୟବସ୍ଥିତ ହୋଇପାରିବ। ଏହା ସହ ପାତର ଅନ୍ତର ନ କରି ସମସ୍ତ ଡାକ୍ତରଙ୍କୁ ସମାନ ଭାବରେ ଡ୍ୟୁଟି ପ୍ରଦାନ କରିବାକୁ ବୈଠକରେ ଗୁରୁତ୍ୱ ଦିଆଯାଇଛି। ବ୍ଲକ ଅଧ୍ୟକ୍ଷା ତଥା ରୋଗୀ କଲ୍ୟାଣ ସମିତି ଉପାଧ୍ୟକ୍ଷା ଅର୍ଚ୍ଚନା ଦାସ ଯୋଗଦେଇ ମେଡିକାଲରେ ସମସ୍ତ ପ୍ରକାରର ମେଡିସିନ ମହଜୁଦ ରଖିବା ପାଇଁ ଦାବି କରିଛନ୍ତି। ଫଳରେ ରୋଗୀଙ୍କୁ ବାହାରୁ ଔଷଧ କିଣିବାକୁ ପଡିବ ନାହିଁ। ସେହିଭଳି ନିରାମୟ ମେଡିସିନ କେନ୍ଦ୍ରର ଖୋଲିବା ସମୟ ବୃଦ୍ଧି କରାଯିବା, ପୋଷ୍ଟମର୍ଟମ, ଡେଥ ଓ ବାର୍ଥ ସାର୍ଟିଫିକେଟ ପ୍ରଦାନରେ ଅହେତୁକ ବିଳମ୍ବ ନ କରିବାକୁ କୁହାଯାଇଛି। ବୈଠକରେ ବିଡିଓ ମଣିପ୍ରସାଦ ମିଶ୍ର, ମେଡିକାଲ ଅଫିସର ଜ୍ୟୋତିରଞ୍ଜନ ମହାପାତ୍ର, ମନ୍ତ୍ରୀଙ୍କ ପ୍ରତିନିଧି ପ୍ରଦୀପ ମହାନ୍ତି, ଜିଲା ପରିଷଦ ସଭ୍ୟା ସୁଚିତ୍ରା ବିଶ୍ୱାଳ ଓ ବ୍ଲକ ଶିକ୍ଷା ଅଧିକାରୀ ବଳରାମ ନାୟକ ପ୍ରମୁଖ ଉପସ୍ଥିତ ଥିଲେ।