କୁକୁର ଏବଂ ବିଲେଇଙ୍କ ମଧ୍ୟରେ ଲଢ଼େଇ କେମିତି ହୋଇଥାଏ ତାହା ବେଶ୍ ସମସ୍ତଙ୍କୁ ଜଣା। ଯେତେବେଳେ ଉଭୟ ପାଖାପାଖି ରହିଥାଆନ୍ତି, ସେତେବେଳେ ସେମାନଙ୍କ ମଧ୍ୟରେ ଝଗଡ଼ା ଆରମ୍ଭ ହୋଇଥାଏ। ମାତ୍ର ଆପଣ ଏହି ଦୁଇ ପ୍ରାଣୀ ମଧ୍ୟରେ ପ୍ରେମ ଏବଂ ବନ୍ଧୁତା କେବେ ଦେଖିଛନ୍ତି କି? ହୁଏତ ଦେଖି ନ ଥିବେ। ଏବେ ସେମିତି ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି, ଯେଉଁଥିରେ କୁକୁର ଏବଂ ବିଲେଇଙ୍କ ମଧ୍ୟରେ ବନ୍ଧୁତା ଦେଖିବାକୁ ମିଳିଛି। ଭିଡିଓରେ ପରସ୍ପର ପାଇଁ ଚିନ୍ତା ଏବଂ ସାହାଯ୍ୟ ସମସ୍ତଙ୍କୁ ଚକିତ କରିଛି।
@Gabriele_Corno ନାମକ ଏକ ଟୁଇଟର୍ ପେଜ୍ରେ ଏହି ଭିଡିଓଟି ଶେୟାର କରାଯାଇଛି। ଯେଉଁଥିରେ କୁକୁର ଏବଂ ବିଲେଇଙ୍କ ମଧ୍ୟରେ ପ୍ରେମ, ବନ୍ଧୁତା ଦେଖିବାକୁ ମିଳିଛି। କାର୍ଟୁନଠାରୁ ଆରମ୍ଭ କରି ଫିଲ୍ମ ପର୍ଯ୍ୟନ୍ତ ସବୁଥିରେ ଉଭୟଙ୍କ ମଧ୍ୟରେ ଶତ୍ରୁତା ଥିବାର ଦେଖିଥିବେ। କିନ୍ତୁ ଏହି ଭିଡିଓରେ କୁକୁର ଶତ୍ରୁତା ଭୁଲି ପାଣିରେ ପଡ଼ିଥିବା ଏକ ବିଲେଇର ଜୀବନ ରକ୍ଷାକରିଛି।
ଭିଡିଓରେ ଏକ ବିଲେଇ ସୁଇମିଂ ପୁଲ୍ରେ ପଡ଼ିଥିବାର ନଜର ଆସିଛି। କୁକୁର ପ୍ରଥମେ ଏହାକୁ ଉପରକୁ ବାହାର କରିବାକୁ ଚେଷ୍ଟା କରୁଛି। ପରେ ଯେତେବେଳେ ଏହାକୁ ବାହାର କରିବାରେ ଅସମର୍ଥ ହୁଏ, ସେତେବେଳେ ସେ ନିଜେ ପାଣି ଭିତରକୁ ଡେଇଁପଡୁଛି ଏବଂ ବିଲେଇକୁ ପିଠିରେ ବସାଇ ପାଣି ଭିତରୁ ବାହାରକୁ ଆଣୁଛି। ବିଲେଇ କୁକୁରର ପିଠି ଉପରକୁ ଚଢ଼ି ଯାଉଛି ଏବଂ କୁକୁର ତା’ର ଦୁଇ ଗୋଡ଼କୁ ପାଣି ଭିତରୁ ବାହାର କରିବା ମାତ୍ରେ ବିଲେଇ ବାହାରକୁ ଡେଇଁପଡୁଛି।
ଏହି ଭିଡିଓ ୩୭ ହଜାରରୁ ଅଧିକ ଭ୍ୟୁ ପାଇଥିବା ବେଳେ ଅନେକ ଲୋକ ନିଜ ନିଜର ମତାମତ ଦେଇଛନ୍ତି। ଜଣେ କହିଛନ୍ତି, ଯିଏ ଭିଡିଓ ରେକର୍ଡିଂ କରୁଛି, ସେ ବିଲେଇକୁ ବଞ୍ଚାଇବା ପାଇଁ କାହିଁକି ଡେଇଁଲା ନାହିଁ, ଆଉ ଜଣେ କହିଛନ୍ତି, ପଶୁମାନେ ମଣିଷ ଅପେକ୍ଷା ଅଧିକ ବୁଦ୍ଧିମାନ ଅଟନ୍ତି। ସେହିପରି ଅନ୍ୟ ଜଣେ କହିଛନ୍ତି, ଏହି କୁକୁର ଆଶ୍ଚର୍ଯ୍ୟଜନକ ଅଟେ। କୁକୁରମାନେ ବହୁତ ବୁଦ୍ଧିମାନ। ସେ ଏ ମଣିଷମାନଙ୍କ ପରି ହେବାକୁ ଚାହାନ୍ତିନି।