ବ୍ରହ୍ମଗିରି,୧୦ା୧(ଡି.ଏନ୍.ଏ): ଚିଲିକାରେ ରବିବାର ଡଲ୍ଫିନ୍ ଗଣନା ଶେଷ ହୋଇଛି। ଚିଲିକାରେ ଥିବା ଇରାୱାଡ଼ି ଡଲ୍ଫିନ୍ଙ୍କ ସ୍ଥିତି ଜାଣିବା ପାଇଁ ବନ ବିଭାଗ ଓ ଚିଲିକା ଉନ୍ନୟନ କର୍ତ୍ତୃପକ୍ଷ(ସିଡିଏ)ଙ୍କ ସହଯୋଗରେ ସକାଳ ୬ଟାରୁ ଏହି ଗଣନା କାର୍ଯ୍ୟ ଆରମ୍ଭ ହୋଇ ମଧ୍ୟାହ୍ନ ୧୨ଟାରେ ସରିଥିଲା। ଇରାୱାଡ଼ି ଡଲ୍ଫିନ୍ ଦେଖିବା ପାଇଁ ଏଠାକୁ ଦେଶବିଦେଶରୁ ପର୍ଯ୍ୟଟକମାନେ ଆସିଥାନ୍ତି। ଏହି ଡଲ୍ଫିନ୍ଙ୍କ ସୁରକ୍ଷା ଓ ସ୍ଥିତି ସମ୍ପର୍କରେ ଜାଣିବା ପାଇଁ ସରକାର ପ୍ରତିବର୍ଷ ଗଣନା କାର୍ଯ୍ୟ କରିଥାନ୍ତି। ଚଳିତ ବର୍ଷ ବାଲୁଗାଁ ୱାଇଲ୍ଡ ଲାଇଫ୍ ଡିଭିଜନ ତରଫରୁ ଗଣନା କାର୍ଯ୍ୟ କରାଯାଇଛି। ଏଥିରେ ବାଲୁଗାଁ ଡିଭିଜନରୁ ୧୦ଟି ଓ ସାତପଡ଼ା ଡିଭିଜନରୁ ୮ଟି ଦଳରେ ବନ ବିଭାଗ କର୍ମଚାରୀ, ଡଲ୍୍ଫିନ୍ ରିସର୍ଚ୍ଚ ପର୍ସନ, ଓୟୁଏଟି ଛାତ୍ର, ସିଡିଏ କର୍ମଚାରୀ ଏବଂ ସ୍ଥାନୀୟ ମୋଟର ବୋଟ୍ କର୍ମଚାରୀ ସାମିଲ ଥିଲେ। ପ୍ରତି ଦଳରେ ୬ ଜଣ ସଦସ୍ୟ ରହି ଟ୍ରାଞ୍ଜିଟ ପଦ୍ଧତି ଦ୍ୱାରା ଗଣନା କାର୍ଯ୍ୟ କରିଥିଲେ। ଗତ ବର୍ଷ ଚିଲିକାରେ ୧୮୫ଟି ଡଲ୍ଫିନ୍ ଥିଲା। ତେବେ ଚଳିତବର୍ଷ କମ୍ ସଂଖ୍ୟକ ଡଲ୍ଫିନ୍ ଦେଖାଯାଇଥିବା କେତେକ ଗଣନାକାରୀ ଦଳ କହିଛନ୍ତି। ସମସ୍ତ ଦଳର ତଥ୍ୟକୁ ନେଇ ଚୂଡ଼ାନ୍ତ ଫଳ ପ୍ରକାଶ ପାଇବ ବୋଲି ଏସିଏଫ୍ ଶରତ ମିଶ୍ର କହିଛନ୍ତି।