ଅହମ୍ମଦାବାଦ,୧୫।୧୧: ଆଗାମୀ ଗୁଜରାଟ ଉପନିର୍ବାଚନରେ ବାଜିମାତ କରିବା ଲାଗି ଅଣ୍ଟା ଭିଡିଛି ଆମ୍ ଆଦମୀ ପାର୍ଟୀ(ଏଏପି)। ଅନେକ ପ୍ରସଙ୍ଗ ଉଠାଇ ଦଳ ଶାସକ ଭାଜପାକୁ ଟାର୍ଗେଟ କରୁଛି। ଏହି କ୍ରମରେ ମଙ୍ଗଳବାର ଏକ କାର୍ଯ୍ୟକ୍ରମରେ ଭାଗ ନେଇ ଏଏପି ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଭାଜପାକୁ କଟାକ୍ଷ କରିଛନ୍ତି। ଡବଲ ଇଞ୍ଜିନ କୋଇଲାର ଥିଲା। ସେଥିରେ କଳଙ୍କି ଲାଗି ଗଲାଣି। ଆମେ ବିଦ୍ୟୁତଯୁକ୍ତ ନୂଆ ଇଞ୍ଜିନ। ଲୋକେ ଏବେ ନୂଆ ଇଞ୍ଜିନ ଚାହୁଁଛନ୍ତି ବୋଲି କେଜ୍ରିଓ୍ବାଲ କହିଛନ୍ତି।
ରାଜ୍ୟରେ ଭାଜପାର ୨୭ ବର୍ଷର ଶାସନ ଉପରେ ପ୍ରତିକ୍ରିୟା ରଖି କେଜ୍ରିଓ୍ବାଲ କହିଛନ୍ତି, ବର୍ଷକ ପରେ ଗଛରେ ବି ନୂଆ ପତ୍ର ଆସେ। ଗଣତନ୍ତ୍ରରେ ହାରିବା ଏବଂ ଜିତିବା ସାଧାରଣଜନତାଙ୍କ ଉପରେ। ନିର୍ବାଚନର ୩ ଦିନ ପୂର୍ବରୁ ସ୍ଥିତି ସ୍ପଷ୍ଟ ହୋଇଯିବ ବୋଲି ସେ କହିଛନ୍ତି।
ଏହାଛଡ଼ା କେଜ୍ରିଓ୍ବାଲ ମାଗଣା ବିଜୁଳି ପ୍ରସଙ୍ଗରେ ସମାଲୋଚନାକୁ ନେଇ କହିଛନ୍ତି, ଆମକୁ ଧନୀ ଦେଶ ହେବାର ଅଛି। ତେଣୁ ଜନସାଧାରଣଙ୍କୁ ମାଗଣା ଶିକ୍ଷା ଦେବାକୁ ହେବ। ହେଲେ ନେତାମାନେ ଏହାକୁ ମାଗଣା ରାବିଡି ବୋଲି କହୁଛନ୍ତି। ଏଭଳି ସରକାରଙ୍କୁ ଇସ୍ତଫା ଦେଇଦେବା ଉଚିତ। ଦେଶବାସୀଙ୍କ ଅପମାନ କରନ୍ତୁନାହିଁ। ସମସ୍ତ ନେତାମାନଙ୍କୁ ୪ ହଜାର ୟୁନିଟ୍ ମାଗଣା ବିଜୁଳି ମିଳୁଛି। ହେଲେ ଜନସାଧାରଣଙ୍କୁ ୩୦୦ ୟୁନିଟ୍ ମାଗଣା ବିଜୁଳି ଦେଲେ ଲୋକେ ଗାଳି କରୁଛନ୍ତି ବୋଲି ସେ କହିଛନ୍ତି।
