ଖୋର୍ଦ୍ଧା ଅଫିସ,୯।୫: ଚନ୍ଦକା ବନଖଣ୍ଡ ହଳଦିଆ ବନାଞ୍ଚଳ ଅଧୀନ ଖୋର୍ଦ୍ଧା ଜିଲା ମଲ୍ଲୀପୁର ପଞ୍ଚାୟତର ଗଡ଼ନିଆଳ ଗଁା ପାଖ ଜଙ୍ଗଲରେ ଗର୍ଭବତୀ ଅଜଗର ସାପକୁ ଗ୍ରାମବାସୀ ଏବଂ ବନ ବିଭାଗ ସୁରକ୍ଷା ଦେଉଛନ୍ତି। କରୋନା ସମୟରେ ଗ୍ରାମବାସୀଙ୍କ ଏହି ପଦକ୍ଷେପକୁ ନେଇ ବିଭିନ୍ନ ମହଲରେ ପ୍ରଶଂସା କରାଯାଉଛି। ଅନ୍ୟପଟେ ଡ୍ରୋନ ଦ୍ୱାରା ଅଜଗରର ଗତିବିଧି ଉପରେ ନଜର ରଖାଯାଇଛି। ଜଙ୍ଗଲରେ କେହି ପ୍ରବେଶ କଲେ, ଅଜଗର ସ୍ଥାନ ଛାଡିଯିବାର ଆଶଙ୍କା ରହିଛି। ତେଣୁ ଅଜଗର ରହୁଥିବା ଅଞ୍ଚଳର ଶହେ ମିଟର ପରିଧିକୁ ନିଷିଦ୍ଧାଞ୍ଚଳ ଘୋଷଣା କରାଯାଇଛି। ଅଜଗର ସ୍ଥିତି କ’ଣ ରହିଛି, ସେ ସମ୍ପର୍କରେ ତଥ୍ୟ ହାସଲ ଲାଗି ଡ୍ରୋନର ସାହାଯ୍ୟ ନିଆଯାଇଛି ବୋଲି ହଳଦିଆ ରେଞ୍ଜର ଜୟକୃଷ୍ଣ ପଣ୍ଡା କହିଛନ୍ତି। ରେଞ୍ଜର ପଣ୍ଡା ଆହୁରି କହିଛନ୍ତି ଯେ, ଏକ ୫ଜଣିଆ ଟିମ୍ ୨୪ଘଣ୍ଟିଆ ସୁରକ୍ଷା ଦେଉଛନ୍ତି। ସାପ ପାଇଁ ଖାଦ୍ୟ ଏବଂ ନନ୍ଦରେ ପାଣିର ବ୍ୟବସ୍ଥା କରାଯାଇଛି। ସାଧାରଣତଃ ସାପ ମାର୍ଚ୍ଚଠାରୁ ଜୁନ ମାସ ମଧ୍ୟରେ ଶହେରୁ ଊର୍ଦ୍ଧ୍ୱ ଅଣ୍ଡଦାନ କରିଥାଏ। ଅଣ୍ଡା ଫୁଟିବା ପର୍ଯ୍ୟନ୍ତ ସେ କୁଆଡେ ଯାଇ ନ ଥାଏ। ଶିକାର ପାଇଁ ଗଲେ, ବନ୍ୟଜନ୍ତୁ ଅଣ୍ଡା ଖାଇଯିବାର ଆଶଙ୍କାରେ ଅଜଗର ମେଲିବାନ୍ଧି ଅଣ୍ଡାକୁ ସୁରକ୍ଷା ଦେଇଥାଏ। ଅଜଗର ଉପରେ ସମ୍ପୂର୍ଣ୍ଣ ନଜର ରହିଛି ବୋଲି ସେ କହିିଛନ୍ତି। ଚନ୍ଦକା ଡିଏଫ୍ଓ କେଦାରନାଥ ସ୍ବାଇଁ କହିଛନ୍ତି, ଅଜଗରର ଅଣ୍ଡା ଦାନରେ ଯେପରି କୌଣସି ସମସ୍ୟା ନ ହେବ ସେଥିପ୍ରତି ଗୁରୁତ୍ୱ ଦିଆଯାଇଛି। ସାଧାରଣତଃ କୌଣସି ବିଷଧର ସାପକୁ ଦେଖିଲେ, ଲୋକେ ଭୟଭୀତ ହୋଇଥାନ୍ତି। ଆକ୍ରମଣ ମଧ୍ୟ କରିଥାନ୍ତି। ତେବେ ଏଠାରେ ନିଆରା ପରମ୍ପରା ସୃଷ୍ଟି ହୋଇଛି। ସାପକୁ ସୁରକ୍ଷା ଲାଗି ଆଗେଇ ଆସିଛନ୍ତି ଗ୍ରାମବାସୀ। ଅଜଗରର ଅଣ୍ଡା ଫୁଟିବା ପରେ ଏହି ଅଭିଯାନ ସଫଳ ହେବ। ସମାଜକୁ ଗ୍ରାମବାସୀ ମାନବିକତାର ପରିଚୟ ଦେଇଛନ୍ତି। ଏକ ନିଆରା ପରମ୍ପରା ସୃ୍ଷ୍ଟି ହେବାକୁ ଯାଉଛି ବୋଲି ସେ କହିଛନ୍ତି।