ଅନୁଗୋଳ, ୨୬।୯(ଅମିତ କୁମାର ସାମଲ):ଅନୁଗୋଳ ଜିଲା ବନ୍ତଳା ଥାନା ଧୋକୁଟା ଗ୍ରାମର ଜନକ ନାୟକଙ୍କ କୁକୁଡ଼ା ଫାର୍ମରେ ସୋମବାର ଏକ ଅଜଗର ପଶି ୧୪ କୁକୁଡ଼ା ମାରିବା ସହ ୧୦ଟିକୁ ଗିଳି ଦେଇଥିବା ଅଭିଯୋଗ ହୋଇଛି। ଜନକଙ୍କଠାରୁ ଖବରପାଇ ସର୍ପ ଉଦ୍ଧାରକାରୀ ଟିମ୍ର ସଦସ୍ୟମାନେ ପହଞ୍ଚି ଅଜଗରକୁ ଉଦ୍ଧାର କରି ଅନୁଗୋଳ ରେଞ୍ଜ ଅଧିକାରୀଙ୍କୁ ହସ୍ତାନ୍ତର କରିଥିଲେ। ପରେ ସାପଟିକୁ ସାତକୋଶିଆ ଅଭୟାରଣ୍ୟର କୃଷ୍ଣଚକ୍ରଗଡ଼ ସଂରକ୍ଷିତ ଜଙ୍ଗଲରେ ଛଡ଼ାଯାଇଥିବା ରେଞ୍ଜର ହରମୋହନ ନାୟକ ସୂଚନା ଦେଇଛନ୍ତି। ସୂଚନା ଅନୁଯାୟୀ, ଜନକ ସକାଳେ ତାଙ୍କ ଫାର୍ମରେ କାର୍ଯ୍ୟ କରୁଥିଲେ। ଏହି ସମୟରେ କେତୋଟି କୁକୁଡ଼ା ଉଚ୍ଚ ସ୍ବରରେ ବୋବାଇବାରୁ କିଛି ଅଘଟଣ ଆଶଙ୍କାରେ ସେ ସେଠାକୁ ଯାଇଥିଲେ। ଫାର୍ମ ଭିତରରେ ଏକ ଅଜଗର ପଶି କୁକୁଡ଼ା ମାରିବା ସହିତ ଗିଳି ଦେଇଥିବା ସେ ଦେଖିବାକୁ ପାଇଥିଲେ। ଏ ନେଇ ତାଙ୍କୁ କ୍ଷତିପୂରଣ ପ୍ରଦାନ କରିବାକୁ ଜନକ ଦାବି କରିଛନ୍ତି। ତେବେ ଏପରି ଘଟଣାରେ କ୍ଷତିପୂରଣ ଦିଆଯିବା ବ୍ୟବସ୍ଥା ନ ଥିବା ବନ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଛି।