ଭୁବନ, ୨୫।୧୨(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନ ବ୍ଲକ ଦେଇ ପ୍ରବାହିତ ରାମିଆଳ ନଦୀ ଉପରେ ନିର୍ମାଣ ହେବ ସେତୁ। ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଶୁକ୍ରବାର ଏହାର ଭୂମିପୂଜନ କରିଛନ୍ତି। ୧୧ କୋଟି ଟଙ୍କା ବ୍ୟୟରେ ପ୍ରସ୍ତାବିତ ୧୦୧ ମିଟର ଦୀର୍ଘ ଏହି ବ୍ରିଜ୍କୁ ୧୬ ମାସ ମଧ୍ୟରେ ସମ୍ପୂର୍ଣ୍ଣ କରିବାକୁ ଲକ୍ଷ୍ୟ ରଖାଯାଇଛି। ଏହି ସେତୁ ନିର୍ମାଣ ହେଲେ ମାର୍ଥାପୁରଠାରୁ ଯମୁନାକୋଟକୁ ଗମନାଗମନ ସୁଗମ ହେବ। ଭୁବନ ବ୍ଲକର ୬ ଏବଂ କାମାକ୍ଷନଗର ବ୍ଲକ ଅଧୀନ ୫ ପଞ୍ଚାୟତର ଲକ୍ଷାଧିକ ଜନସାଧାରଣ ଉପକୃତ ହେବେ। ଅଞ୍ଚଳର ଆର୍ଥିକ, ସାମାଜିକ ବିକାଶରେ ଏହି ବ୍ରିଜ୍ ମାଇଲ୍ଖୁଣ୍ଟ ସାଜିବ ବୋଲି ମନ୍ତ୍ରୀ କହିଛନ୍ତି।
ସୂଚନାଯୋଗ୍ୟ, ପ୍ରତିବର୍ଷ ବର୍ଷାଦିନେ ରାମିଆଳ ନଦୀରେ ବଢ଼ି ଆସୁଛି। ନଦୀକୂଳିଆ ଅଞ୍ଚଳବାସୀ ଏହାଦ୍ୱାରା ପ୍ରଭାବିତ ହେଉଥିବାବେଳେ ଉଭୟ ପାର୍ଶ୍ୱକୁ ଯାତାୟାତ ପ୍ରଭାବିତ ହେଉଛି। ଅନ୍ୟଦିନରେ ନଦୀ ପ୍ରାୟତଃ ଶୁଖିଲା ପଡୁଥିବାବେଳେ ଲୋକମାନେ ନଦୀ ଶଯ୍ୟାରେ ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ବିପଦସଙ୍କୁଳ ଅବସ୍ଥାରେ ଯାତାୟାତ କରୁଛନ୍ତି। ତେଣୁ ଯମୁନାକୋଟ-ମାର୍ଥାପୁର ମଧ୍ୟରେ ସୁରକ୍ଷିତ ଗମନାଗମନ ପାଇଁ ଏହି ସେତୁ ଜରୁରୀ ହୋଇପଡ଼ିଥିଲା। ଲୋକମାନଙ୍କ ଦୀର୍ଘଦିନର ସ୍ବପ୍ନ ବାସ୍ତବ ରୂପ ନେବାକୁ ଯାଉଥିବାବେଳେ ଏହାକୁ ବିଭିନ୍ନ ମହଲରେ ସ୍ବାଗତ କରାଯାଇଛି। ଭୂମିପୂଜନ କାର୍ଯ୍ୟକ୍ରମରେ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ, କାମାକ୍ଷନଗର ନିର୍ବାହୀ ଯନ୍ତ୍ରୀ ପ୍ରତାପ ହରିପାଲ, ବ୍ଲକ ଅଧ୍ୟକ୍ଷ ଧର୍ମାନନ୍ଦ ବରାଳ, ଉପାଧ୍ୟକ୍ଷା ସୁଭଦ୍ରା ପାତ୍ର, ପୂର୍ବତନ ଉପାଧ୍ୟକ୍ଷ ଅଭିମନ୍ୟୁ ମିଶ୍ର, ସରପଞ୍ଚ ଖୁଲଣା ରାଉତ, ସଞ୍ଜୟ ଦାସଙ୍କ ସମେତ ଅଞ୍ଚଳର ବୁଦ୍ଧିଜୀବୀ ଉପସ୍ଥିତ ଥିଲେ।
