ପୁରୀ ଅଫିସ, ୨୨।୧୦: ଶ୍ରୀମନ୍ଦିରରେ ମହାପ୍ରଭୁଙ୍କ ସେବା ତଥା ଗର୍ଭଗୃହକୁ ପ୍ରବେଶ କରୁଥିବା ସେବାୟତଙ୍କ ପାଇଁ ଡ୍ରେସ୍ କୋଡ୍ ଲାଗୁ ହୋଇଛି। ପାରମ୍ପରିକ ବସ୍ତ୍ର ପରିଧାନ କରି ସେବାୟତମାନେ ଗୁରୁବାରଠାରୁ ଶ୍ରୀମନ୍ଦିର ଗର୍ଭଗୃହକୁ ପ୍ରବେଶ କରିଛନ୍ତି। ସେହିପରି ଆସନ୍ତା ଦୀପାବଳି ପରଦିନଠାରୁ ଶ୍ରୀମନ୍ଦିର ଭିତରେ କାର୍ଯ୍ୟ କରୁଥିବା ସମସ୍ତ କର୍ମଚାରୀଙ୍କ ପାଇଁ ଡ୍ରେସ୍କୋଡ୍ ଲାଗୁ କରାଯିବ। ଛତିଶା ନିଯୋଗ ବୈଠକରେ ଏନେଇ ନିଷ୍ପତ୍ତି ହେବା ପରେ ଏହାକୁ ଶ୍ରୀମନ୍ଦିର ପ୍ରଶାସନ ଲାଗୁ କରିଛି। ଏହି ଡ୍ରେସକୋଡ ବ୍ୟବସ୍ଥା ଦ୍ୱାରା ସେବାୟତଙ୍କ ଗାରିମା ବଢିବା ସହ ଶ୍ରୀମନ୍ଦିର ପରିସର ମଧ୍ୟରେ ଆଧ୍ୟାତ୍ମିକ ପରିବେଶ ସୃଷ୍ଟି ହେବ ବୋଲି କୁହାଯାଇଛି। ଆଗାମୀ ଦିନରେ ଶ୍ରୀମନ୍ଦିର ଆସୁଥିବା ଶ୍ରଦ୍ଧାଳୁଙ୍କ ପାଇଁ ମଧ୍ୟ ନିର୍ଦ୍ଦିଷ୍ଟ ପାରମ୍ପରିକ ପୋଷାକ ପରିଧାନ ଲାଗୁ ନେଇ ବିଚାରବିମର୍ଶ ଚାଲିଛି। ଗତ ଛତିଶା ନିଯୋଗ ବୈଠକରେ ଏହି ଡ୍ରେସକୋଡ୍ ବ୍ୟବସ୍ଥା ଲାଗୁ ନେଇ ନିଷ୍ପତ୍ତି ହୋଇଥିଲା। ଅନେକ ସମୟରେ ସେବାୟତମାନେ ପାରମ୍ପରିକ ପୋଷାକ ନ ପିନ୍ଧି ଗର୍ଭଗୃହକୁ ପ୍ରବେଶ କରୁଥିବାରୁ ମନ୍ଦିର ଭିତରେ ଆଧ୍ୟାତ୍ମିକ ବାତାବରଣ ଭଙ୍ଗ ହେଉଥିବା ଅଭିଯୋଗ ହୋଇଆସୁଥିଲା। ମୁଖ୍ୟତଃ ସେବାୟତମାନଙ୍କ ପାଳି ନ ଥିବା ସମୟରେ ସେବାୟତମାନେ ସାଧାରଣ ଡ୍ରେସ ପରିଧାନ କରି ମହାପ୍ରଭୁଙ୍କ ଦର୍ଶନ ନିମନ୍ତେ ମନ୍ଦିର ମଧ୍ୟକୁ ଯାଇ ଗର୍ଭଗୃହ ମଧ୍ୟକୁ ଯାଉଥିଲେ। ସେବାୟତମାନେ ପରିଧାନ କରିଥିବା ସାଧାରଣ ଡ୍ରେସ ପବିତ୍ରତା ବଜାୟ ରହୁ ନ ଥିଲା। ଅନ୍ୟପକ୍ଷରେ ସେବାୟତମାନଙ୍କୁ ସାଧାରଣ ଲୋକ ନ ଜାଣି ପାରି ଅଭିଯୋଗ କରୁଥିଲେ ଯେ, ଅନ୍ୟମାନେ ମହାପ୍ରଭୁଙ୍କ ନିକଟରେ ଦର୍ଶନ କରୁଥିବାବେଳେ ସେମାନଙ୍କୁ କାହିଁକି ମହାପ୍ରଭୁଙ୍କ ନିକଟକୁ ଛଡ଼ାଯାଉନାହିଁ। ସେହିପରି ସେବାୟତଙ୍କୁ ନ ଜାଣି ପାରି କର୍ମଚାରୀମାନେ ଅଟକାଊଥିଲେ। ଫଳରେ ଅନେକ ସମୟରେ କଥା କଟାକଟି ହେଉଥିଲା। ସେହିଭଳି ଅନେକ ପୁରୁଖା ସେବାୟତ ସାଧାରଣ ଡ୍ରେସ ପିନ୍ଧି ଗର୍ଭ ଗୃହକୁ ଯିବା କଥାକୁ ନାପସନ୍ଦ କରୁଥିଲେ। ତେଣୁ ମହାପ୍ରଭୁଙ୍କ ନିକଟକୁ ଯିବା ପାଇଁ ସମସ୍ତ ସେବାୟତ ପାରମ୍ପରିକ ବସ୍ତ୍ର ପରିଧାନ କରି ଯିବା ପାଇଁ ମତ ରଖି ଆସୁଥିଲେ। ପୂର୍ବ ସମୟରେ ମହାପ୍ରଭୁଙ୍କ ଦର୍ଶନ ପାଇଁ ସେବାୟତମାନେ ପାରମ୍ପରିକ ବସ୍ତ୍ର ପରିଧାନ କରିବାର ବ୍ୟବସ୍ଥା ଥିଲା। କାଳକ୍ରମେ ଏହା ବନ୍ଦ ହୋଇଯାଇଥିଲା। ତେବେ ପ୍ରଶାସନ ପକ୍ଷରୁ ଡ୍ରେସ କୋର୍ଡ ଲାଗୁ ନିଷ୍ପତ୍ତିକୁ ସମସ୍ତ ସେବାୟତ ସ୍ବାଗତ କରିଛନ୍ତି।