ଢେଙ୍କାନାଳ ଅଫିସ, ୧୭।୩ – ଆଜି ଚାରାଟିଏ ଲଗାଇ ସାମାନ୍ୟ ଯତ୍ନ ନେଲେ କାଲି ତାହା ଗଛରେ ପରିଣତ ହେବ। ମଲା ପରେ ବି ଏହାକୁ ଲଗାଇଥିବା ବ୍ୟକ୍ତିଙ୍କୁ ସମସ୍ତେ ମନେପକାଉଥିବେ। ଗଛ କେବଳ ମାନବଜାତିର ମିତ୍ର ନୁହେଁ, ଛନଛନ ପତ୍ର, ଫୁଲ, ଫଳରେ ଭର୍ତ୍ତି ହୋଇଥିବା ଗଛଟିଏ ଦେଖିଲେ ମଣିଷ ମନରେ ସୃଷ୍ଟି ହେଉଥିବା ଯାବତୀୟ ଦୁଶ୍ଚିନ୍ତା, କଷ୍ଟ ଲାଘବ ହୋଇଯାଏ। ରାଗ, ରୁଷା, ଅଭିମାନ ଦୂର ହୋଇଗଲେ ଭ୍ରାତୃଭାବ ସୃଷ୍ଟି ହେବ ଏବଂ ସମାଜରେ ଶାନ୍ତି ଫେରିଆସିବ। ଏଭଳି ମହତ୍ ଉଦ୍ଦେଶ୍ୟ ନେଇ ଗାଁ ଗାଁ ବୁଲି ଚାରା ଲଗାଉଛନ୍ତି ପୁରୀର ସତ୍ୟନାରାୟଣ ଦାସ। ପ୍ରକୃତିର ସୁରକ୍ଷା ଏବଂ ବିଶ୍ୱ ଭ୍ରାତୃତ୍ୱ ସୃଷ୍ଟି କରିବା ଲକ୍ଷ୍ୟରେ ସବୁଜ ସଂକଳ୍ପର ସାରଥି ସାଜିଥିବା ସତ୍ୟଙ୍କ ଏଭଳି ଉଦ୍ୟମକୁ ସବୁ ମହଲରେ ପ୍ରଶଂସା କରାଯାଉଛି।
୪୭ ବର୍ଷୀୟ ସତ୍ୟନାରାୟଣଙ୍କ ଘର ପୁରୀ ଶ୍ରୀମନ୍ଦିର ପଶ୍ଚିମଦ୍ୱାର ସମ୍ମୁଖରେ। ପେସାରେ ଜଣେ ଅଟୋମୋବାଇଲ ଇଞ୍ଜିନିୟର। ଜଙ୍ଗଲ ଅବକ୍ଷୟ, ତାପମାତ୍ରା ଅହେତୁକ ବୃଦ୍ଧି, ଅସୁରକ୍ଷିତ ହୋଇପଡୁଥିବା ଜୀବଜଗତକୁ ନେଇ ତାଙ୍କର ମନ ବ୍ୟାକୁଳ ହୋଇ ଉଠିଥିଲା। ଏହା ପରେ ପ୍ରକୃତିର ସୁରକ୍ଷା ଲକ୍ଷ୍ୟ ନେଇ ସେ ବିଭିନ୍ନ ଜିଲା ବୁଲି ବୁଲି ଚାରାରୋପଣ କରିବା ସହ ଏଥି ଲାଗି ଅନ୍ୟମାନଙ୍କୁ ପ୍ରବର୍ତ୍ତାଉଛନ୍ତି। ପୁରୀ, ଖୋର୍ଦ୍ଧା, କଟକ, କେନ୍ଦ୍ରାପଡ଼ା ଏବଂ ଅନୁଗୋଳ ଜିଲାରେ ଚାରା ରୋପଣ କରିବା ପରେ ମଙ୍ଗଳବାର ସତ୍ୟନାରାୟଣ ପହଞ୍ଚତ୍ଥିଲେ ଢେଙ୍କାନାଳରେ। ସେ ସ୍ଥାନୀୟ ଜିଲା କାର୍ଯ୍ୟଳୟ ପରିସର, ଶ୍ରୀବଳରାମ ମନ୍ଦିର ପ୍ରାଙ୍ଗଣରେ ଚାରା ଲଗାଇବା ସହ ବେଲ ଏବଂ ତୁଳସୀ ମଞ୍ଜି ବାଣ୍ଟିଥିଲେ। ଜିଲା କାର୍ଯ୍ୟାଳୟରେ ପ୍ରଶାସନିକ ଅଧିକାରୀଙ୍କୁ ଚାରା ରୋପଣ, ଗଛର ଯତ୍ନ ନେବାକୁ ପରାମର୍ଶ ଦେଇଥିଲେ।
ନିଜ ପ୍ରତିକ୍ରିୟାରେ ସତ୍ୟ କୁହନ୍ତି, ଫୁଲଗଛ ଲୋକଙ୍କୁ ଅଧିକ ଆନନ୍ଦ ଦେଇଥାଏ। ଏଥିଲାଗି ସେ ଅପରାଜିତା, ଅର୍ଜୁନ, କୃଷ୍ଣନେମାଳ, ଗରୁଡ଼ ଗୋବିନ୍ଦ ଆଦି ଚାରାରୋପଣ କରୁଛନ୍ତି। ସେ ବିଭିନ୍ନ ଜିଲା ଓ ରାଜ୍ୟ ବାହାରେ ଗଛ ଲଗାଇଛନ୍ତି। ଚଳିତବର୍ଷ କରୋନା ଯୋଦ୍ଧାଙ୍କ ଉଦ୍ଦେଶ୍ୟରେ ଏହାକୁ ଉତ୍ସର୍ଗୀକୃତ କରିଛନ୍ତି। ଆଗାମୀ ଦିନରେ ମଧ୍ୟ ଏହି ଅଭିଯାନ ଜାରି ରଖିବେ ବୋଲି ସେ କହିଛନ୍ତି।