ଭୁବନେଶ୍ୱର,୨୯।୧(ବ୍ୟୁରୋ): ଭୁବନେଶ୍ୱର କୋଳଥିଆରୁ କୋରାପୁଟ କାର୍ ଭଡାରେ ନେଇ ଡ୍ରାଇଭରଙ୍କୁ ହତ୍ୟା ଓ ଗାଡ଼ି ଲୁଟ୍ ଘଟଣାକୁ ୨ଦିନ ବିତିଯାଇଛି। ଏହି ଘଟଣାରେ କାର୍ ଲୁଟ୍ ଗ୍ୟାଙ୍ଗ୍ର ସମ୍ପୃକ୍ତି ରହିଛି ନା ପୂର୍ବ ଶତ୍ରୁତାକୁ ନେଇ ଏପରି ହତ୍ୟାକାଣ୍ଡ ଘଟିଛି ତାହାକୁ ନେଇ ପୋଲିସ ତଦନ୍ତକୁ ତ୍ୱରାନ୍ବିତ କରିଛି। ଖଣ୍ଡଗିରି ଓ ବୋରିଗୁମ୍ମା ଥାନା ପୋଲିସ ଘଟଣାର ଖୋଳତାଡ଼ କରୁଥିଲେ ମଧ୍ୟ ଲୁଟ୍ କାର୍ କିମ୍ବା ଅଭିଯୁକ୍ତଙ୍କ ସମ୍ପର୍କରେ ସାମାନ୍ୟତମ ସୁରାକ ପାଇପାରୁନି।
ମୃତ ଡ୍ରାଇଭର ହେଉଛନ୍ତି ଖୋର୍ଦ୍ଧା ବେଗୁନିଆର ସୁଧୀର କୁମାର ସାହୁ। ସେ ଭୁବନେଶ୍ୱର ଜାଗମରାରେ ରହି କାର୍ ଡ୍ରାଇଭର ଭାବେ କାର୍ଯ୍ୟ କରନ୍ତି। ସାଙ୍ଗ ସୌରଭ କୁମାର କହିଛନ୍ତି, ସୁଧୀର ଭଡା ଯିବା ପୂର୍ବରୁ ତାଙ୍କୁ ୨୩ ତାରିଖରେ ଯୋଗଯୋଗ କରିଥିଲେ। କୋଳଥିଆ ଅଞ୍ଚଳରୁ ୨ ଜଣଙ୍କୁ ଭଡାରେ ନେଇ ବାଲିଗୁଡା ଯିବା କଥା କହିଥିଲେ। ଯିବାବେଳେ ସୁଧୀର ତାଙ୍କୁ ଯୋଗଯୋଗ କରୁଥିଲେ। ରାସ୍ତା ପଚାରିବା ସହ ସେ ୨୪ ତାରିଖ ସୁଦ୍ଧା ରାୟଗଡାରେ ପହଞ୍ଚତ୍ଥିବା କହିଥିଲେ। ସେଠାରୁ କୋରାପୁଟ ଯିବାର କାର୍ଯ୍ୟକ୍ରମ ଥିବା ଜଣାଇଥିଲେ। ମାତ୍ର ଏହାପରଠାରୁ ତାଙ୍କର ଫୋନ ଲାଗି ନ ଥିଲା। ବୁଧବାର ଅପରାହ୍ନରେ ତାଙ୍କ ମୃତଦେହ କୋରାପୁଟ ବୋରିଗୁମ୍ମା ଥାନା ଅନ୍ତର୍ଗତ ଛତରଲା ଗ୍ରାମ ନିକଟରୁ ମିଳିଥିଲା। ଦୁର୍ବୃତ୍ତମାନେ ତାଙ୍କୁ ହତ୍ୟା ପରେ ସେଠାରେ ଫିଙ୍ଗି ଦେଇ କାର୍ ଲୁଟି ନେଇଥିଲେ। ବୋରିଗୁମ୍ମା ପୋଲିସ ମୃତଦେହ ଜବତ କରିବା ସହ ନଂ. ୨୦/୨୧ରେ ହତ୍ୟା ମାମଲା ରୁଜୁ କରି ସାଇଣ୍ଟିଫିକ୍ ଟିମ୍ ସହାୟତାରେ ତଦନ୍ତ ଆରମ୍ଭ କରିଥିଲେ ମଧ୍ୟ ହତ୍ୟାକାରୀଙ୍କ ସମ୍ପର୍କରେ କିଛି ସୂଚନା ପାଇପାରିନି। ଗୁରୁବାର ସୁଧୀରଙ୍କ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ବୋରିଗୁମ୍ମା ଥାନା ଅଧିକାରୀ ସଞ୍ଜୟ କୁମାର ମଣ୍ଡଳ କହିଛନ୍ତି। ସିସିଟିଭି ଫୁଟେଜକୁ ଆଧାର କରି ଅଭିଯୁକ୍ତଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢାଉ ଜାରି ରହିଥିବା ସେ କହିଛନ୍ତି।
ଅପରପକ୍ଷରେ ଖଣ୍ଡଗିରି ଥାନା ପୋଲିସ ଖୋଳତାଡ଼ କରୁଥିଲେ ମଧ୍ୟ କିଏ ଭଡାରେ କାର ନେଇଥିଲେ ସେ ନେଇ କୌଣସି ତଥ୍ୟ ହାସଲ କରିପାରି ନାହିଁ। କେବଳ ସିସିଟିଭି ଫୁଟେଜକୁ ଯାଞ୍ଚ କରାଯାଉଥିବା କୁହାଯାଉଛି। ହେଲେ ରାଜଧାନୀରେ ମାଳମାଳ ସିସିଟିଭି କ୍ୟାମେରା ଲାଗିଥିଲେ ମଧ୍ୟ ଅଭିଯୁକ୍ତଙ୍କୁ ଚିହ୍ନଟ କରି ନ ପାରିବା କମିଶନରେଟ ପୋଲିସର ତଦନ୍ତ ପ୍ରକ୍ରିୟା ଉପରେ ପ୍ରଶ୍ନ ଉଠାଇଛନ୍ତି ସୁଧୀରଙ୍କ ସାଙ୍ଗ ସୌରଭ। ପୂର୍ବରୁ ମଧ୍ୟ ଭୁବନେଶ୍ୱରରେ ଏପରି ଘଟଣା ଘଟିଛି। ଭଡ଼ାରେ ଯାଉଥିବା ଡ୍ରାଇଭରଙ୍କୁ ହତ୍ୟା କରି କାର୍ ଲୁଟ୍ ହେଉଥିଲେ ମଧ୍ୟ କମିଶନରେଟ ପୋଲିସ ଘଟଣାକୁ ସେଭଳି ଗୁରୁତ୍ୱର ସହ ଗ୍ରହଣ କରୁ ନ ଥିବାରୁ ରାଜଧାନୀରେ ଏବେ ଏକାଧିକ କାର୍ ଲୁଟ୍ ଗ୍ୟାଙ୍ଗ୍ ସକ୍ରିୟ ଥିବା ସେ କହିଛନ୍ତି।