ଖୋର୍ଦ୍ଧାଅଫିସ,୧୫।୩ : ୧୦ ଦଫା ଦାବି ନେଇ ଷ୍ଟିୟରିଂ ଛାଡ଼ି ଅନିର୍ଦ୍ଧିଷ୍ଟ କାଳ ପାଇଁ ଆନ୍ଦୋଳନକୁ ଓହ୍ଲାଇଛି ଡ୍ରାଇଭର ମହାସଂଘ। କୋଭିଡ୍ ଯୋଦ୍ଧା ମାନ୍ୟତା, ଦୁର୍ଘଟଣା ଜନିତ କ୍ଷତିପୂରଣ, ଡ୍ରାଇଭର ପାଣ୍ଠି ଗଠନ, ସାମାଜିକ ନିରାପତ୍ତା, ବୀମା, ପେନ୍ଶନ, ସଡ଼କଯାତ୍ରା ବେଳେ ଗାଡି ପାର୍କିଂ ଓ ଡ୍ରାଇଭରଙ୍କ ବିଶ୍ରାମ ପାଇଁ ବିଭିନ୍ନ ସ୍ଥାନରେ ବିଶ୍ରାମଗାର, ଶୌଚାଳୟ ବ୍ୟବସ୍ଥା, ଡ୍ରାଇଭର ପିଲାଙ୍କ ନିମନ୍ତେ ଉଚ୍ଚଶିକ୍ଷା ବ୍ୟବସ୍ଥା ଭଳି ଦାବି ଉଠାଇ ସେମାନେ ଆନ୍ଦୋଳନକୁ ଓହ୍ଲାଇଛି ।
ଖୋର୍ଦ୍ଧା ଜିଲାରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି। ଗଡ଼ ଖୋର୍ଦ୍ଧା ଛକ ନିକଟ ୧୬ନଂ. ଜାତୀୟ ରାଜପଥ, ନିରାକାରପୁର, ଟାଙ୍ଗୀ, ବାଣପୁର, ବାଲୁଗାଁ ସମେତ ୫୭ ନଂ. ରାଜପଥ ବାଘମାରୀ ଛକ, ବେଗୁନିଆ ଓ ବୋଲଗଡ଼ ପ୍ରଭୃତି ସ୍ଥାନରେ ରାସ୍ତା ଅବରୋଧ କରାଯାଇଛି। ରାଜପଥ ଉଭୟ ପାଶର୍ବରେ ମାଲବାହୀ ଟ୍ରକ, ହାଇୱା ଅଟକି ରହିଛି। ଅନ୍ୟପକ୍ଷେ ଜରୁରୀକାଳୀନ ସେବାରେ ନିୟୋଜିତ ଯାନବାହନ, ଆମ୍ବୁଲାନ୍ସ ସହ ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା ଗାଡ଼ିଗୁଡ଼ିକ କେବଳ ରାସ୍ତାରେ ଯାଉଛି।