ଛତ୍ରପୁର ୩।୯(ଡିଏନଏ ): ଅଗଷ୍ଟ ୧୬ ତାରିଖରୁ ୩୦ ତାରିଖ ପର୍ଯ୍ୟନ୍ତ ଗଞ୍ଜାମ ଜିଲାରେ ଜାତୀୟ ରାଜପଥ ଓ ରାଜ୍ୟ ରାଜପଥରେ ହେଲମେଟ ଯାଞ୍ଚ କଡାକଡି କରାଯାଇଥିଲା। ବେପରୁଆ ଗାଡିଚାଳନା ପାଇଁ ଦୈନିଦିନ ବହୁ ସଡକ ଦୁର୍ଘଟଣା ଘଟି ଧନଜୀବନ ନଷ୍ଟ ହେଉଛି। ବିଶେଷକରି ବହୁ ଦୁଇଚକିଆ ଗାଡିର ଚାଳକମାନେ ବିନା ହେଲମେଟରେ ଗାଡି ଚଳାଉଥିବା ଯୋଗୁ ଦୁର୍ଘଟଣାର ଶିକାର ହୋଇଥାନ୍ତି। ବଢୁଥିବା ଏହି ସଡକ ଦୁର୍ଘଟଣା ଏବଂ ଦୁର୍ଘଟଣାଜନିତ ମୃତ୍ୟୁ ରୋକିବା ଲାଗି ରାଜ୍ୟ ପରିବହନ କର୍ତ୍ତୃପକ୍ଷ(ଏସଟିଏ) ସ୍ବତନ୍ତ୍ର ହେଲମେଟ ଯାଞ୍ଚ କରିବାକୁ ରାଜ୍ୟର ସମସ୍ତ ଜିଲାର ଆରଟିଓମାନଙ୍କୁ ନିର୍ଦ୍ଦେଶ ଦେଇଥିଲେ। ତେଣୁ ଜାତୀୟ ଏବଂ ରାଜ୍ୟ ରାଜପଥରେ ଏହି ସ୍ବତନ୍ତ୍ର ଅଭିଯାନ ଗଞ୍ଜାମ ଆରଟିଓଙ୍କ ପକ୍ଷରୁ କଡାକଡି ଯାଞ୍ଚ କରାଯାଇଥିଲା ।
ଆରଟିଓ ମାନସ କୁମାର ସାହୁଙ୍କ ନେତୃତ୍ୱରେ ଏକ ଟିମ ଗଠନ ହୋଇ ଦୁଇଚକିଆ ଗାଡିର ଯାଞ୍ଚ କରିଥିଲେ। ଗୋଟିଏ ବାଇକରେ ୩ଜଣ ବସି ଜାତୀୟ ରାଜପଥରେ ଯାଉଥିବା ୫୪ ଗାଡିର ଚାଳକ ବେଳେ ଧରାପଡିଛନ୍ତି । ସେମାନଙ୍କ ନିକଟରୁ ଜରିମାନା ଆଦାୟ କରାଯାଇଛି । ସେହିପରି ୬ଜଣ ରାଜ୍ୟ ରାଜପଥରେ ଧରାପଡିଛନ୍ତି । ବିନା ହେଲମେଟରେ ୬୭୫ ଜଣ ଜାତୀୟ ରାଜପଥରେ ଗାଡି ଚଳାଉଥିବା ବେଳେ ରାଜ୍ୟ ରାଜପଥରେ ୧୦୩ ଜଣ ଏହି ଯାଞ୍ଚ ବେଳେ ଧରାପଡିଛନ୍ତି। ସମୁଦାୟ ୭୭୮ ଜଣ ଗାଡି ଚାଳକ ବିନା ହେଲମେଟରେ ଗାଡି ଚଳାଉଥିବା ବେଳେ ଧରାପଡିଛନ୍ତି। ୧୭୨ଜଣ ଚାଳକଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି। ୪୭ଟି ଗାଡିକୁ ଜବତ କରାଯାଇଥିବା ବେଳେ ପରବର୍ତ୍ତୀ ସମୟରେ ସେମାନେ ଜରିମାନା ଦେଇଥିଲେ। ଏହି ୧୫ ଦିନ ମଧ୍ୟରେ ଗଞ୍ଜାମ ଆରଟିଓଙ୍କ ପକ୍ଷରୁ ବେଆଇନ ଗାଡି ଚାଳନା ପାଇଁ ୨ ଲକ୍ଷ ୯ହଜାର ଟଙ୍କା ଜରିମାନା ବାବାଦକୁ ଆଦାୟ କରାଯାଇଛି ବୋଲି ଆରଟିଓ କହିଛନ୍ତି। ଓଡିଶାରେ ପ୍ର୍ରତ୍ୟେକ ଦିନ ସଡକ ଦୁର୍ଘଟଣାରେ ବହୁ ଲୋକଙ୍କ ମୃତ୍ୟୁ ହେଉଛି । ଯାହାକି ବିନା ହେଲମେଟରେ ଗାଡି ଚାଳନା କରୁଥିବା ବ୍ୟକ୍ତି ଏହି ମୃତ୍ୟୁର କାରଣ ହୋଇଥାଏ। ଏହାକୁ ରୋକିବା ଉଦେଶ୍ୟରେ ଏହି ସବୁ ଧରପଗଡ କରାଯିବା ସହ ସଚେତନତା କରାଯାଇଥାଏ । ଏପରିକି ଓଡିଶାରେ ସବୁ ଜିଲା ଅପେକ୍ଷା ଗଞ୍ଜାମ ଜିଲାରେ ସଡକ ଦୁର୍ଘଟଣା ହାର ବୃଦ୍ଧି ପାଇଛି ।
ସୂଚନାଯୋଗ୍ୟ ଯେ. ଗଞ୍ଜାମ ଜିଲାରେ ୫ ବର୍ଷ ମଧ୍ୟରେ ଦୁଇ ହଜାରରୁ ଉର୍ଦ୍ଧ ବ୍ୟକ୍ତିଙ୍କ ସଡକ ଦୁର୍ଘଟଣାରେ ମୃତ୍ୟୁ ହୋଇଛି। ଜିଲାରେ ୨୦୧୯ ବର୍ଷରେ ୭୩୩ ଟି ସଡକ ଦୁର୍ଘଟଣା ହୋଇଥିବା ବେଳେ ୩୮୫ ଜଣଙ୍କ ମୃତ୍ୟୁ ଏଥିରେ ହୋଇଛି। ୨୦୨୦ରେ ୬୧୬ ଟି ଦୁର୍ଘଟଣା ହୋଇଥିବା ବେଳେ ସେଥିରେ ୩୬୩ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି। ଚଳିତ ବର୍ଷର ଜୁନ ଶେଷ ସୁଦ୍ଧା ୩୫୪ଟି ଦୁର୍ଘଟଣା ଘଟି ୧୮୬ ଜଣଙ୍କ ମତ୍ୟୁ ଘଟିଛି । ଏହା ସହିତ ୨୬୨ ଜଣ ଗୁରୁତର ଆହତ ହୋଇଛନ୍ତି ।