ଉମରକୋଟ, ୨୪।୧୨(ସ୍ବ.ପ୍ର.): ନବରଙ୍ଗପୁର ଉମରକୋଟ ଦେଇ ରାଇପୁରରୁ ବିଶାଖାପାଟଣା ଭାରତମାଳା ରାସ୍ତାର ନିର୍ମାଣ କାମ ଜୋର୍ସୋରରେ ଚାଲିଛି। କିନ୍ତୁ ବିଭାଗୀୟ କର୍ତ୍ତୃପକ୍ଷଙ୍କ ଖାମଖିଆଲ ମନୋଭାବ ଯୋଗୁ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ବୃଦ୍ଧି ପାଉଛି। ଦୈନିକ ଏହି ରାସ୍ତା କାର୍ଯ୍ୟରେ ୫୦୦ରୁ ଊଦ୍ଧର୍ବ ଟ୍ରକ୍, ଟିପ୍ପର ଭଳି ବଡ଼ବଡ଼ ଯାନବାହନ ଓଭରଲୋଡିଂ କରି ଅତି ଦ୍ରୁତଗତିରେ ଯାଉଛି। ଧୂଳି ଧୂସରରେ ଉମରକୋଟବାସୀ ଅତିଷ୍ଠ ହୋଇପଡିଲେଣି। ଏହି ଟ୍ରକ୍ ଯାଉଥିବା ରାସ୍ତାରେ ଧୂଳି ନ ଉଡ଼ିବା ପାଇଁ ପାଣି ଲଗାତର ଛିଞ୍ଚତ୍ବାର ନିୟମ ରହିଛି। କିନ୍ତୁ ଏହି ନିୟମକୁ ଠିକ୍ଭାବେ ପାଳନ କରାଯାଉ ନ ଥିବା ବାରମ୍ବାର ଅଭିଯୋଗ ହେଉଛି। ବର୍ତ୍ତମାନ ଏହି ରାସ୍ତାର ଧୂଳି ଉଡ଼ି ମକା ଫସଲ ନଷ୍ଟ ହେଇଥିବା ଅଭିଯୋଗ କରିଛନ୍ତି ଚାଷୀ।
ଉମରକୋଟ ବ୍ଲକ ଅଧୀନ ବଡ଼କୁମାରୀ ପଞ୍ଚାୟତ ଅଧୀନରେ ଆସୁଥିବା ଭାଲୁସାହି ଗ୍ରାମରେ ମକା ଫସଲ ନଷ୍ଟ ହୋଇଯାଇଥିବା ସେହି ଗ୍ରାମର ଚାଷୀ ଜଗ ସାନ୍ତା ଅଭିଯୋଗ କରିଛନ୍ତି। ଟଙ୍କା କରଜ ଆଣି ବହୁ ପରିଶ୍ରମ କରି ମକାଚାଷ କରିଥିଲେ। ଗଛ ବି ପ୍ରାୟ ୨ ଫୁଟ ହେଲାଣି। କିନ୍ତୁ ଜମି ଦେଇ ଯାଇଥିବା ରାସ୍ତାରେ ଭାରତମାଳା ଯୋଜନା କାମରେ ନିୟୋଜିତ ଟ୍ରକ୍ ଯାଇ ଧୂଳି ଉଡ଼ି ଗଛ ଉପରେ ପଡୁଛି। ତେଣୁ ଗଛ ଆଉ ବଢ଼ୁନି ବୋଲି ଜଗ କହି ଚିନ୍ତାବ୍ୟକ୍ତ କରିଛନ୍ତି। ଗ୍ରାମ ନିକଟରେ ଥିବା ଭାରତମାଳାର କ୍ୟାମ୍ପରେ ଟ୍ରକ୍ ଡ୍ରାଇଭର ଓ ଉପସ୍ଥିତ ଅଧିକାରୀଙ୍କୁ ପାଣି ପକାଇବା ପାଇଁ ଅନୁରୋଧ କଲେ ମଧ୍ୟ କେହି ଶୁଣୁ ନ ଥିବା ଜଗ ଅଭିଯୋଗ କରିଛନ୍ତି। ରାସ୍ତା କାମକୁ ବିରୋଧ ନୁହେଁ ବରଂ ବିଭାଗୀୟ କର୍ତ୍ତୃପକ୍ଷଙ୍କ ଖାମଖିଆଲ କାର୍ଯ୍ୟକୁ ପ୍ରତି ବିରୋଧ କରୁଛୁ ବୋଲି ଅଞ୍ଚଳବାସୀ କହିଛନ୍ତି। ଏପରି ବହୁ ମକା, ପରିବା ଓ ଧାନ ଫସଲ ନଷ୍ଟ ହେଉଥିବା ଅଭିଯୋଗ କରିଛନ୍ତି ଚାଷୀ। ତୁରନ୍ତ ଅଧିକାରୀ ଓ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ନ ଦେଲେ ଏକ ବଡ଼ ଧରଣର ଜନ ଆନ୍ଦୋଳନକୁ ଏଡ଼ାଇ ନ ଯାଇପାରେ। ଏବିଷୟରେ ଉମରକୋଟ ତହସିଲଦାର ଏନ୍. ଜଗଜ୍ଜୀବନ ଚୌଧୁରୀଙ୍କୁ ପଚାରିବାରୁ ଘଟଣା ବିଷୟରେ ଆପଣଙ୍କଠାରୁ ଜାଣିଲି। ଘଟଣାର ତଦନ୍ତ କରି ଭାରତ ମାଳା ଅଧିକାରୀଙ୍କୁ ଏବିଷୟରେ ତାଗିଦ କରାଯିବ। ଧୂଳି କିପରି କମି ପାରିବ ସେ ଦିଗରେ ଚେଷ୍ଟା କରିବି ବୋଲି ସେ କହିଛନ୍ତି।