ଭୁବନେଶ୍ୱର,୧୦।୧୧(ବ୍ୟୁରୋ): ପୂର୍ବତଟ ରେଳପଥ ଚଳିତ ଆର୍ଥିକ ବର୍ଷରେ ଅର୍ଥାତ୍ ଏପ୍ରିଲ ପହିଲାରୁ ଅକ୍ଟୋବର ଶେଷ ପର୍ଯ୍ୟନ୍ତ ପ୍ରାୟ ୧୦୪.୮୮ ନିୟୁତ ଟନ୍ ମାଲ ପରିବହନ କରିଛି। ଫଳରେ ପଣ୍ୟ ପରିବହନ କ୍ଷେତ୍ରରେ ପୂର୍ବତଟ ରେଳପଥ ଦେଶରେ ପ୍ରଥମ ସ୍ଥାନ ଅଧିକାର କରିଛି। ଲକ୍ଡାଉନ୍ ସମୟରେ ବିଭିନ୍ନ ବାଧାବିଘ୍ନ ସତ୍ତ୍ୱେ ଏହା ଗତବର୍ଷର ମାଲ ପରିବହନର ପ୍ରାୟ ୫୦%ରୁ ଅଧିକ ପଣ୍ୟ ବୋଝେଇ କରିପାରିଛି। ନଭେମ୍ବର ୮ରେ ପୂର୍ବତଟ ରେଳପଥ ଚଳିତ ଆର୍ଥିକବର୍ଷର ସର୍ବାଧିକ ୧୦ ହଜାର ୱାଗନ୍ ମାଲ ପରିବହନ କରିଛି। ଏଭଳି ସଫଳତା ଲାଗି ରେଳ ବୋର୍ଡର ଚେୟାରମ୍ୟାନ୍ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ପୂର୍ବତଟ ରେଳପଥକୁ ଅଭିନନ୍ଦନ ଜଣାଇଛନ୍ତି। ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟା ଭୂଷଣ ଏଥିପାଇଁ ତିନୋଟି ରେଳମଣ୍ଡଳର କର୍ମଚାରୀଙ୍କୁ ପ୍ରଶଂସା କରିଥିବାବେଳେ କଠିନ ପରିଶ୍ରମ ଜାରି ରଖିବାକୁ କହିଛନ୍ତି।