ବେଙ୍ଗାଲୁରୁ: ସାଧାରଣତଃ କୁକୁଡ଼ା ଫାର୍ମଗୁଡ଼ିକରେ ବଡ଼ ବଡ଼ ପିଞ୍ଜରା ମଧ୍ୟରେ ବହୁ ଶହ କୁକୁଡ଼ାଙ୍କୁ ବନ୍ଦ କରି ରଖାଯାଇଥାଏ। ତେବେ ଏହି ପାରମ୍ପରିକ ପଦ୍ଧତି ପରିବର୍ତ୍ତେ ଏକ ନୂତନ ଢଙ୍ଗରେ କୁକୁଡ଼ା ଚାଷ କରି ମଞ୍ଜୁନାଥ ମାରାପନ୍ ଏବଂ ଅଶୋକ କନ୍ନନ୍ ନାମକ ୨ ଜଣ କନ୍ନଡ଼ ଚାଷୀ କୋଟିପତି ହୋଇ ପାରିଛନ୍ତି।
ଅର୍ଗାନିକ ଏଗ୍ (ଜୈବିକ ଅଣ୍ଡା) ବିକ୍ରି କରି ଉଭୟ ମଞ୍ଜୁନାଥ ଓ ଅଶୋକ ବହୁ କୋଟି ଟଙ୍କା ରୋଜଗାର କରୁଛନ୍ତି। ୨୦୧୪ରେ କର୍ନାଟକର ବେଙ୍ଗାଲୁରୁରେ ଉଭୟେ ହାପି ହେନ୍ସ ନାମରେ ଏକ ଦେଶୀ କୁକୁଡ଼ା ଫାର୍ମ ଖୋଲିଥିଲେ। ଏହା ଏକ ମୁକ୍ତ ପରିସରର କୁକୁଡ଼ା ଫାର୍ମ ହୋଇଥିବା ମଞ୍ଜୁନାଥ କହିଛନ୍ତି। ଏଠାରେ କୁକୁଡ଼ାମାନଙ୍କୁ ପିଞ୍ଜରା ମଧ୍ୟରେ ରଖାଯିବା ବଦଳରେ ଖୋଲା ସ୍ଥାନରେ ଛଡ଼ା ଯାଇଥାଏ। ସମ୍ପ୍ରତି ଏହି ଫାର୍ମରେ ଥିବା କୁକୁଡ଼ାମାନେ ପ୍ରତିଦିନ ପ୍ରାୟ ୨୦ ହଜାର ଅଣ୍ଡା ଦେଉଛନ୍ତି, ଯାହାର ଦାମ ଅଣ୍ଡା ପିଛା ୨୫ ଟଙ୍କା ରହିଛି। ଏହି ପୁଷ୍ଟିକର ଜୈବିକ ଅଣ୍ଡାରେ ଓମେଗା, ପ୍ରୋଟିନ୍ ଏବଂ ଭିଟାମିନ୍ ଭରପୂର ମାତ୍ରାରେ ରହିଥାଏ ବୋଲି ମଞ୍ଜୁନାଥ କହିଛନ୍ତି।
ସେ ଆହୁରି କହିଛନ୍ତି, ସେମାନେ ଫ୍ରାଞ୍ଚାଇଜ୍ ମଡେଲରେ କାମ କରନ୍ତି। ମହାରାଷ୍ଟ୍ରର ନାଶିକ୍, ତେଲଙ୍ଗାନାର ହାଇଦ୍ରାବାଦ ଏବଂ ତାମିଲନାଡୁର ତ୍ରିଚି ଓ ପେରମ୍ବାଲୁରର ୧୧ ଜଣ କ୍ଷୁଦ୍ର କୁକୁଡ଼ା ଚାଷୀଙ୍କ ସହଭାଗିତାରେ ତାଙ୍କ କୁକୁଡ଼ା ହାପି ହେନ୍ସ କାର୍ଯ୍ୟ କରୁଛି। କୌଣସି ଆଣ୍ଟିବାୟୋଟିକ୍ ନ ଦେଇ କିପରି କୁକୁଡ଼ାମାନଙ୍କଠାରୁ ଜୈବିକ ଅଣ୍ଡା ଉତ୍ପାଦନ କରିହେବ ସେ ସମ୍ବନ୍ଧରେ ସେ ଏବଂ ଅଶୋକ କ୍ଷୁଦ୍ର ଚାଷୀମାନଙ୍କୁ ତାଲିମ ଦିଅନ୍ତି ବୋଲି ମଞ୍ଜୁନାଥ କହିଛନ୍ତି।
ଉଭୟ ମଞ୍ଜୁନାଥ ଓ ଅଶୋକ ଏହି ବ୍ୟବସାୟରୁ ବାର୍ଷିକ ପ୍ରାୟ ୮ କୋଟି ଟଙ୍କା ରୋଜଗାର କରୁଛନ୍ତି। ମଞ୍ଜୁନାଥ କହିଛନ୍ତି, ବେଙ୍ଗାଲୁରୁରେ ଛଅଟି ସାଧାରଣ ଅଣ୍ଡାର ପ୍ୟାକେଟର ଦାମ ୬୦ରୁ ୭୦ ଟଙ୍କା ରହିଥିବାବେଳେ ହାପି ହେନ୍ସର ୬ଟିକିଆ ଅଣ୍ଡା ପ୍ୟାକେଟର ଦାମ ୧୫୦ ଟଙ୍କା ରହିଛି। ଯଦି କୌଣସି ଗ୍ରାହକ ହାପି ହେନ୍ସର ସଦସ୍ୟତା ନିଅନ୍ତି, ତେବେ ତାଙ୍କୁ ୪୦ ପ୍ରତିଶତ ରିହାତି ଦିଆଯାଉଛି ବୋଲି ମଞ୍ଜୁନାଥ କହିଛନ୍ତି। ଏହି ଅଣ୍ଡାକୁ ହାପି ହେନ୍ସ ପକ୍ଷରୁ ସମଗ୍ର ବେଙ୍ଗାଲୁରୁରେ ବିତରଣ କରାଯାଉଥିବା ସେ କହିଛନ୍ତି।