କେନ୍ଦୁଝର,୨୯।୧୦: ବଡ଼ଭାଇକୁ ବିଷ ଦେଇଦେଲା ସାନ ଭାଇ। ହେଲେ ବିଷ ପିଇବା ପରେ ବି ଯନ୍ତ୍ରଣାରେ ଜର୍ଜରିତ ହୋଇ ସାନଭାଇକୁ ଖୋଜୁଥିଲା ବଡ଼ ଭାଇ। ଯେତେବେଳେ ଆଖି ଆଗରେ ସାନ ଭାଇକୁ ପାଇଲେନି ସେତେବେଳ ଫୋନ କରିଥିଲେ। ମରିବା ପୂର୍ବରୁ ଥର ଥର କଣ୍ଠରେ ସାନ ଭାଇକୁ ପଚାରିଲେ, ବାବୁରେ ମୋତେ କି ବିଷ ଦେଇଛୁ କହ? ଏପରି ଛାତିଥର ଘଟଣା ଘଟିଛି କେନ୍ଦୁଝର ଜିଲା ଆନନ୍ଦପୁର ପୌରାଞ୍ଚଳର ଶାଳପଡା ଗୁଣ୍ଡିଚା କଲୋନୀରେ। ଯାହାକୁ ଶୁଣି ସମସ୍ତେ ତାଜୁବ ହୋଇଯାଇଛନ୍ତି। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯାହାକୁ ଶୁଣି ଲୋକେ କୋହ ସମ୍ଭାଳି ପାରୁ ନାହାନ୍ତି।
ଭାଇରାଲ ଭିଡିଓରେ ବଡ଼ଭାଇ ପଚାରୁଛନ୍ତି, ଭାଇରେ! କାହିଁକି ଏମିତି ମୋ ସାଙ୍ଗରେ କଲୁ? କ’ଣ କ୍ଷତି କରିଥିଲି ତୋର? ବେଳେବେଳେ ଟିକିଏ ତାଗିଦ କରିଦିଏ। ବଡ଼ ଭାଇଟା ସେତିକି କରନ୍ତାନି କି ? ତା’ ବୋଲି ମୋତେ ବିଷ ଦେଇଦେଲୁ। ମୋ’ ଛାତି, ପେଟରେ ଭାରି କଷ୍ଟ ହେଉଛି। ତୁ କେମିତି ବିଷ ଦେଲୁ, ମୁଁ ଭାବି ପାରନି। ଅନ୍ୟ କିଏ ଦେଇଥିଲେ ଏତେ କଷ୍ଟ ହୁଅନ୍ତାନି। ହେଲେ ଯୋଉ ଭାଇକୁ ମୁଁ ଏତେ ଭଲ ପାଉଛି, ସିଏ ମତେ ବିଷଦେଲା ବୋଲି ମୋର ବିଶ୍ୱାସ ହେଉନି। ତୋ’ ହାତ ଗୋଡ଼ ଧରୁଛି। କୋଉ ବିଷ ଦେଇଛୁ ଟିକେ କହରେ। ଡାକ୍ତରଙ୍କୁ ଟିକେ କହିବି, ମୋତେ ଟ୍ରିଟମେଣ୍ଟ କରିବେ। ଭାରି କଷ୍ଟ ହେଉଛିରେ… ସାନଭାଇର ଏପରି କାମ ଜାଣିବା ପରେବି ବଡ଼ଭାଇ ତାଙ୍କ ବିରୋଧରେ ପୋଲିସରେ ଏତଲା ଦେବ ନାହିଁ ବୋଲି କହୁଛନ୍ତି। ବାରମ୍ବାର କେଉଁ ବିଷ କେଉଁ ଖାଦ୍ୟରେ କେତେଥର ମିଶେଇଛି ବୋଲି ସେ ପ୍ରଶ୍ନ କରୁଛନ୍ତିି।
କହିରଖୁଛୁ କି, ଏହା କେଉଁ ସିନେମା କିମ୍ବା ଧାରାବାହିକର ସଂଳାପ ନୁହେଁ। ମରିବା ପୂର୍ବରୁ ଜଣେ ବଡ଼ ଭାଇ ନିଜ ସାନ ଭାଇକୁ କରିଥିବା ଶେଷ ଫୋନ କଲ୍ର କିଛି ଅଂଶ। ୧୦ ମିନିଟ ୧୩ ସେକେଣ୍ଡର ଏହି ଅଡିଓ କଲ ଶୁଣିଲେ ଛାତି ଥରି ଉଠିବ। ଆପଣ କୋହ ସମ୍ଭାଳି ପାରିବେନି। ଅନ୍ୟପକ୍ଷରେ ଜୀବନ ବଞ୍ଚାଇବା ପାଇଁ ସାନ ଭାଇକୁ ଫୋନ କରି ବଡ଼ ଭାଇର ନେହୁରା ଯେକୌଣସି ଲୋକକୁ କିଛି କ୍ଷଣ ପାଇଁ ସ୍ତବ୍ଧ କିମ୍ବା ବିଚଳିତ କରି ଦେବ। ତେବେ ଏହି ଅଡିଓ ଭାଇରାଲ ପରେ ଶୁଣିବା ଲୋକ ବି କୋହ ସମ୍ଭାଳି ପାରୁ ନାହାନ୍ତି।