କୋକସରା,୨ା୯(ଦୁଷ୍ମନ୍ତ କୁମାର ପାଟ୍ଟଯୋଷୀ): ପଞ୍ଚାୟତିରାଜ ବ୍ୟବସ୍ଥାରେ ନିର୍ବାଚିତ ସମିତି ସଭ୍ୟାସଭ୍ୟଙ୍କୁ ଅଣଦେଖା କରାଯାଉଥିବା ଓ ସେମାନଙ୍କ ଅଧିକାର କ୍ଷୁଣ୍ଣ ହେଉଥିବା ନେଇ ଅଭିଯୋଗ ହୋଇଛି। ଏନେଇ ଶନିବାର ଧର୍ମଗଡ଼ ବିଧାୟକ ମୋଷଧି ବାଗଙ୍କୁ ଭେଟି ୧୨ ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି କୋକସରା ବ୍ଲକ ୨୨ଟି ପଞ୍ଚାୟତର ନିର୍ବାଚିତ ସମିତି ସଭ୍ୟା ସଭ୍ୟ। ୧୨ ଦାବି ମଧ୍ୟରେ ପଞ୍ଚାୟତିରାଜ ବ୍ୟବସ୍ଥାରେ ସମିତି ପ୍ରତିନିଧିଙ୍କ ପାଇଁ ପରିବର୍ତ୍ତନ ଆଣିବାକୁ ଦାବି କରାଯାଇଛି। ପ୍ରମୁଖ ଦାବି ମଧ୍ୟରେ ସମିତି ସଭ୍ୟ ପାଣ୍ଠି ବାର୍ଷିକ ୨୦ ଲକ୍ଷକୁ ବୃଦ୍ଧି, ପ୍ରତି ପଞ୍ଚାୟତରେ ସମିତି ପ୍ରତିନିଧିଙ୍କ ପାଇଁ ସ୍ଥାୟୀ କାର୍ଯ୍ୟାଳୟ ଓ ନାମ ଫଳକ ସ୍ଥାପନ,ପଞ୍ଚାୟତର ସମସ୍ତ ବୈଠକରେ ସମିତି ଓ ସରପଞ୍ଚଙ୍କ ଯୁଗ୍ମ ଦସ୍ତଖତ, ମନରେଗା ଯୋଜନାରେ ସ୍ବଚ୍ଛତା ପାଇଁ ସମିତିଙ୍କ କାଉଣ୍ଟର ଦସ୍ତଖତ, ପଞ୍ଚାୟତସ୍ତରରେ କାର୍ଯ୍ୟକାରୀ ହେଉଥିବା ଯୋଜନାର ଚିଠି କରାଯିବା, ସମିତି ବୈଠକରେ କେବଳ ସମିତି ସଦସ୍ୟ ସ୍ଥାୟୀ ସଦସ୍ୟ ରହିବା ଦରକାର, ଅନାସ୍ଥା ଭୋଟରେ କେବଳ ସମିତି ସଦସ୍ୟମାନେ ଭୋଟ ଦେବା ଅଧିକାର ମିଳିବା, ସମିତି ପ୍ରତିନିଧିଙ୍କୁ ମାସିକ ୨୦ ହଜାର ଭତ୍ତା ପ୍ରୋତ୍ସାହନ ରାଶି ଓ କାର୍ଯ୍ୟକାଳ ଶେଷରେ ମାସିକ ୧୦ ହଜାର ଭତ୍ତା ପ୍ରଦାନ, ସମସ୍ତ ପ୍ରମାଣପତ୍ରରେ ସମିତିଙ୍କ ଦସ୍ତଖତ, ସମିତିଙ୍କ ପାଇଁ ୧୦ଲକ୍ଷ ଟଙ୍କାର ଜୀବନବୀମା ଓ ୧୦ ଲକ୍ଷ ସ୍ବାସ୍ଥ୍ୟ ବୀମା, ନିର୍ବାଚନରେ ବିଜୟ ପରେ ଏକ ବିଜୟ ଘୋଷଣା ପ୍ରମାଣପତ୍ର ପ୍ରଦାନ କରିବା ଭଳି ଦାବି ପ୍ରମୁଖ ରହିଛି। ଏହି ପ୍ରସଙ୍ଗକୁ ନେଇ ଧର୍ମଗଡ଼ ବିଧାୟକ ବିଧାନସଭାରେ ଉପସ୍ଥାପନ କରିବାକୁ ଦାବି କରାଯାଇଛି। ଦାବିପତ୍ର ପ୍ରଦାନ ସମୟରେ ସମିତି ସଂଘର ସଭାପତି ଘନଶ୍ୟାମ ନାଏକ, ସମ୍ପାଦକ ଗଜାନନ ନିଆଲ, ବ୍ଲକ ଉପାଧ୍ୟକ୍ଷ ତଥା ଫୁଫଗାଁ ପଞ୍ଚାୟତ ସମିତି ସଭ୍ୟ ରାଜୀବ କୁମାର ଅଗ୍ରଓ୍ବାଲ, ଦେବେନ୍ଦ୍ର ଧରୁଆ, ଚିନ୍ତାମଣି ଚଣ୍ଡି, ମୁକ୍ତେଶର ନାଏକ, ଅନସୂୟା ମାଝି, ପାର୍ବତୀ ବାଗ, ନମିତା ଚଣ୍ଡି, ଗୁପ୍ତେଶର ବାଗ, ଅଞ୍ଜନା ଦୁର୍ଗା, ବୈଦେହୀ ବେଶ୍ରା, ଉଆଁସୀ ପାନ, ଶିବାନୀ ଗଇନ୍ତା ପ୍ରମୁଖ ସମିତି ସଭ୍ୟାସଭ୍ୟ ଉପସ୍ଥିତ ଥିଲେ।