କାଏମା,୨।୭(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ ଅନ୍ତର୍ଗତ ବଡ଼କାଏମା ପଞ୍ଚାୟତର ମଧ୍ୟଭାଗରେ ଐତିହାସିକ ବୌଦ୍ଧ କୀର୍ତ୍ତିରାଜି କାଏମା ପାହାଡ଼ ଅବସ୍ଥିତ ଓ ଏହାର ପାଦଦେଶରେ ବୌଦ୍ଧକୀର୍ତ୍ତି ସମ୍ପନ୍ନ ହାତିଆଶୁଣୀ ପୂଜା ପାଉଛନ୍ତି। ରାଜ୍ୟ ସଂସ୍କୃତି ବିଭାଗ ଓ ପ୍ରତ୍ନତାତ୍ତ୍ୱିକ ବିଭାଗ ପକ୍ଷରୁ ୨୦୦୪ରେ ଏହାର ପୁନରୁଦ୍ଧାର ସହ ସୁରକ୍ଷା କାର୍ଯ୍ୟ କରାଯାଇଥିଲା। ଏସବୁ ବୌଦ୍ଧ କୀର୍ତ୍ତିରାଜି ନିକଟକୁ ପର୍ଯ୍ୟଟକଙ୍କ ଯାତାୟାତ ପାଇଁ ରାସ୍ତା ନିର୍ମାଣ କରାଯାଇଥିଲା। ଏଠାରେ ୧୪ନମ୍ବର କେନାଲ ବନ୍ଧର ୨ବନ୍ଧ ମଧ୍ୟରୁ ବାମ ପଟ ବନ୍ଧ ଉପରେ ପିଚୁରାସ୍ତା ନିର୍ମାଣ କରାଯାଇଥିଲା। କିନ୍ତୁ ନିମ୍ନମାନର କାମ ପାଇଁ କିଛି ଦିନ ପରେ ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି। ରାସ୍ତା ସାରା ଖଣ୍ଡିଆଖାବରା ଓ ଅନେକ ଖାଲ ଆଦି ଦେଖିବାକୁ ମିଳୁଛି। ଏଠାରେ ଅନେକ ସମୟରେ ପର୍ଯ୍ୟଟକଙ୍କ ଭିଡ଼ ଜମୁଥିଲା। କିନ୍ତୁ ବର୍ତ୍ତମାନର ଖାଲଢିପ ରାସ୍ତା ଦେଖି ପର୍ଯ୍ୟଟକ ଆସିବାକୁ ଇଚ୍ଛାପ୍ରକାଶ କରୁନାହାନ୍ତି। ସେହିପରି ଏହାର ପାର୍ଶ୍ୱରେ ଥିବା ଏକ ଗାଁରେ ୩୦୦ରୁ ଅଧିକ ଲୋକ ବାସବାସ କରୁଛନ୍ତି। ସେମାନଙ୍କର ଏହା ନିତିଦିନିଆ ରାସ୍ତା। ହେଲେ ରାସ୍ତା ଖରାପ ଯୋଗୁ ସେମାନେ ମଧ୍ୟ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଛୋଟ ପିଲା ସ୍କୁଲ୍ ଯିବା ସମୟରେ ଅନେକ ଥର ଖଣ୍ଡିଆ ଖାବରା ହୋଇ ଘରକୁ ଫେରୁଥିବା ସେମାନଙ୍କ ପରିବାର ଲୋକେ କହିଛନ୍ତି। ଗ୍ରାମବାସୀ ମଧ୍ୟ ଅନେକ ସମୟରେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। କିଛି ଦିନ ତଳେ କେନାଲ ବନ୍ଧର ଡାହାଣ ପାର୍ଶ୍ୱ ରାସ୍ତା ପିଚୁ କରାଯାଇଛି। ହେଲେ ବାମ ପାର୍ଶ୍ୱକୁ କାହିଁକି ମରାମତି କରାଯାଉନାହିଁ ବୋଲି ସ୍ଥାନୀୟ ବାସିନ୍ଦା ପ୍ରଶ୍ନ କରିଛନ୍ତି। ତେଣୁ ଶୀଘ୍ର ଏହି ରାସ୍ତାକୁ ମରାମତି କରିବା ପାଇଁ ଗ୍ରାମବାସୀ ପ୍ରଶାସନ ନିକଟରେ ଅନୁରୋଧ କରିଛନ୍ତି।
