ଭୁବନେଶ୍ୱର,୬।୧୨(ବ୍ୟୁରୋ): ହକି ବିଶ୍ୱ କପ୍କୁ ଦୃଷ୍ଟିରେ ରଖି ରାଜଧାନୀ ଭୁବନେଶ୍ୱରର ସୌନ୍ଦର୍ଯ୍ୟକରଣ କରାଯାଉଛି। ତେବେ ଏଥିରେ ଜବରଦଖଲ ବାଧକ ସାଜୁଥିବାରୁ ଉଚ୍ଛେଦ କାର୍ଯ୍ୟକୁ ତ୍ୱରାନ୍ବିତ କରାଯାଇଛି। ଏଥିସହ ବିଡିଏ ଉପାଧ୍ୟକ୍ଷ ବଲବନ୍ତ ସିଂଙ୍କ ନିର୍ଦ୍ଦେଶକ୍ରମେ ଜାତୀୟ ରାଜପଥରୁ ୫୦ ଫୁଟ ଯାଏ ସମ୍ପୂର୍ଣ୍ଣ ଜବରଦଖଲମୁକ୍ତ କରାଯିବ ବୋଲି ନିଷ୍ପତ୍ତି ନିଆଯାଇଛି। ଏହାସହ ସହର ଅନ୍ୟାନ୍ୟ ପ୍ରମୁଖ ଅଞ୍ଚଳରୁ ମଧ୍ୟ ଜବରଦଖଲ ହଟିବ। ଏହି କ୍ରମରେ ସୋମବାର ବିଡିଏର ମୋଟ ୧୬ଟି ଏନ୍ଫୋର୍ସମେଣ୍ଟ ସ୍କ୍ବାଡ୍ ପକ୍ଷରୁ ବାଣୀବିହାର ଛକ ସମେତ ୪ଟି ଅଞ୍ଚଳରୁ ବ୍ୟାପକ ଜବରଦଖଲ ଉଚ୍ଛେଦ କରାଯାଇଛି।
ପାତ୍ରପଡ଼ାରୁ ଆଇଗିଣିଆ ଛକ ପର୍ଯ୍ୟନ୍ତ ଏନ୍ଫୋର୍ସମେଣ୍ଟ ସ୍କ୍ବାଡ୍ ୧, ୨ ଓ ୩ ପକ୍ଷରୁ ଉଚ୍ଛେଦ କରାଯାଇଥିଲା। ବିରୋଧ ସତ୍ତ୍ୱେ ୧୧ଟି ଟିଣ ଘର, ୫ କ୍ୟାବିନ, ୨ ନର୍ସରୀ, ଗୋଟିଏ କାଠ ଗୋଲା ଓ ଏକ ମାର୍ବଲ ଦୋକାନର ଲୁହା ଗେଟ୍ ଭାଙ୍ଗିଦିଆଯାଇଛି। ଏନ୍ଫୋର୍ସମେଣ୍ଟ ସ୍କ୍ବାଡ୍ ନଂ.୮, ୧୦, ୧୧ ଓ ୧୨ ପକ୍ଷରୁ ବାଣୀବିହାର ଛକରୁ ଆଚାର୍ଯ୍ୟ ବିହାର ପର୍ଯ୍ୟନ୍ତ ରାସ୍ତା କଡରେ ହୋଇଥିବା ଦୋକାନଗୁଡ଼ିକୁ ଉଚ୍ଛେଦ କରାଯାଇଛି। ଏହି ସମୟରେ ସ୍ଥାନୀୟ ଦୋକାନୀ ପ୍ରବଳ ବିରୋଧ କରିବାରୁ ଚାପା ଉତ୍ତେଜନା ପ୍ରକାଶ ପାଇଥିଲା। ଏଠାରେ ୨୭ଟି କ୍ୟାବିନ, ୨୦୦ ମିଟର ଲମ୍ବର ପାଚେରି, ୬ଟି ବିଜ୍ଞାପନ ବୋର୍ଡ ଓ ୪ଟି ହୋଟେଲ ଭଙ୍ଗାଯାଇଛି। ସ୍କ୍ବାଡ୍ ନଂ.୫,୬,୭ ଓ ୮ ପକ୍ଷରୁ ଡମଣାରୁ ଶୈଳଶ୍ରୀବିହାର ପର୍ଯ୍ୟନ୍ତ ଉଚ୍ଛେଦ କରାଯାଇଥିଲା। ଏଥିରେ ୭ଟି କ୍ୟାବିନ, ୩ଟି ଟ୍ରଲି, ୩ଟି ଟିଣ ନିର୍ମିତ ଘର, ୧୨ଟି ବିଜ୍ଞାପନ ହୋର୍ଡିଂ ଓ ୧୦ଟି ବିଜ୍ଞାପନ ବୋର୍ଡ, ୮ଟି ବାଉଁଶ ନିର୍ମିତ ଦୋକାନ, ୧୮ଟି ବକ୍ସ ଗେଟକୁ ମାଟିରେ ମିଶାଇ ଦିଆଯାଇଛି। ସେହିପରି ନୟାପଲ୍ଲୀରେ ସ୍କ୍ବାଡ୍ ନଂ. ୧୩, ୧୪, ୧୫ ଓ ୧୬ ପହଞ୍ଚତ୍ ୫ଟି ଆଜବେଷ୍ଟସ୍ ଘର, ଦୁଇଟି କାଠ ଦୋକାନ ଓ ୨ଟି ଟିଣ ଘର ଉଚ୍ଛେଦ କରିଛି। ଅନ୍ୟପଟେ ନହରକଣ୍ଟାସ୍ଥିତ ଜୟଦେବ କଲେଜ ନିକଟରେ ଥିବା ଗ୍ଲୋବାଲ ଟାଇଲ୍ସକୁ ସ୍ଥାନୀୟ ଲୋକଙ୍କ ଅଭିଯୋଗ ଆଧାରରେ ସିଲ୍ କରିଦିଆଯାଇଛି। ଦେବ ପ୍ଲାଷ୍ଟିକ ଡିଷ୍ଟ୍ରିବ୍ୟୁଟରର ଟ୍ରେଡ୍ ଲାଇସେନ୍ସ ନ ଥିବାରୁ ୫ହଜାର ଟଙ୍କା ଜରିମାନା ଆଦାୟ କରାଯାଇଛି।