ପାରାଦୀପ ୧୭ା୫(ସ୍ବ.ପ୍ର.):ଦେଶରେ ଏବେ ବିଦ୍ୟୁତ୍ ଉତ୍ପାଦନ ପାଇଁ କୋଇଲା ସଙ୍କଟ ଦେଖାଦେଇଛି। ବିଦେଶରୁ ଆମଦାନୀ ହେଉଥିବା ଥର୍ମାଲ କୋଲ ଶୀଘ୍ର ପାୱାର ପ୍ଲାଣ୍ଟରେ କିପରି ପହଞ୍ଚା ଯାଇପାରିବ ତାହାକୁ ନେଇ ଏକ ସମୀକ୍ଷା ବୈଠକ ପାରାଦୀପଠାରେ ସୋମବାର ଅନୁଷ୍ଠିତ ହୋଇଯାଇଛି। ଏଥିରେ କେନ୍ଦ୍ର ସରକାରଙ୍କ ଶକ୍ତି ବିଭାଗ ସଚିବ ଆଲୋକ କୁମାର ଯୋଗ ଦେଇଥିଲେ। ଏହି ଅବସରରେ ସେ ଦେଶର ବିଭିନ୍ନ ପାୱାର ପ୍ଲାଣ୍ଟକୁ କିପରି ଅଧିକ କୋଇଲା ଯୋଗାଣ କରାଯାଇପାରିବ ସେ ସମ୍ପର୍କରେ ବିଭିନ୍ନ ବିଭାଗର ଅଧିକାରୀଙ୍କ ସହ ଆଲୋଚନା କରିଥିଲେ। ଏଥିରେ ପାରାଦୀପ ବନ୍ଦର ଅଥରିଟି, ଏମ୍ସିଏଲ, ଏନ୍ଟିପିସି, ପୂର୍ବତଟ ରେଳବାଇ, କୋଲ ଇଣ୍ଡିଆ, ଆନ୍ଧ୍ର, କର୍ନାଟକ, ତାମିଲନାଡୁର ବିଦ୍ୟୁତ୍ ଉତ୍ପାଦନ କମ୍ପାନୀ ଆଦିର ପ୍ରତିନିଧି ସାମିଲ ହୋଇଥିଲେ। ପୂର୍ବାହ୍ନରେ ସଚିବ କୁମାରଙ୍କ ସହ ଉପସଚିବ ବିବେକ କୁମାର ଦେୱାନଗନ ହେଲିକପ୍ଟର ଯୋଗେ ପାରାଦୀପ ପୂର୍ବାହ୍ନରେ ପହଞ୍ଚତ୍ବା ପରେ ତାଙ୍କୁ ବନ୍ଦର ଅଧ୍ୟକ୍ଷ ପି.ଏଲ. ହାରାନ୍ଧ ସ୍ବାଗତ କରିଥିଲେ। ପରେ ବନ୍ଦର ଭିତରେ ଚାଲିଥିବା ପଣ୍ୟ କାରବାର ବ୍ୟବସ୍ଥାକୁ ସେ ବୁଲି ଦେଖିଥିଲେ। ପାରାଦୀପ ବନ୍ଦର ଅଥରିଟି ପକ୍ଷରୁ କୁହାଯାଇଥିଲା, ପାରାଦୀପ ବନ୍ଦରର ଦିନକୁ ୪୧ଟି କୋଇଲା ରେକ୍ ଖଲାସ କରିବା କ୍ଷମତା ଅଛି। କିନ୍ତୁ ଏବେ ୩୧ ରେକ୍ ଖଲାସ କରାଯାଉଛି। ଏହାକୁ ଜୁଲାଇ ମାସ ସୁଦ୍ଧା ବୃଦ୍ଧି କରାଯାଇ ୪୬ ରେକ୍ କରାଯିବ। ଅକ୍ଟୋବର ମାସ ସୁଦ୍ଧା ୫୭ ରେକ୍ କୋଇଲା ଖଲାସ କରାଯାଇପାରିବ। ସେସବୁ କୋଇଲା କିପରି ତ୍ୱରିତ ଭାବେ ଆନ୍ଧ୍ର, କର୍ନାଟକ, ତାମିଲନାଡୁକୁ ଯିବ ସେଥିପାଇଁ ପୂର୍ବତଟ ରେଳବାଇ ତଦାରଖ କରିବାକୁ କୁହାଯାଇଥିଲା।