ରାୟପୁର,୮।୧୦: ବେଶ୍ ଆନନ୍ଦ ଉଲ୍ଲାସରେ ଦେଶବ୍ୟାପୀ ଦଶହରା ପର୍ବ ଅନୁଷ୍ଠିତ ହୋଇଯାଇଛି। ଏହି ଅବସରରେ ରାବଣପୋଡ଼ି କାର୍ଯ୍ୟକ୍ରମର ଆୟୋଜନ କରାଯାଇଥାଏ, ଯେଉଁଥିରେ ଲଙ୍କେଶ୍ୱରଙ୍କ ଦଶ ମୁଣ୍ଡ ବିଶିଷ୍ଟ କୁଶ ପୁତ୍ତଳିକାରେ ଅଗ୍ନି ସଂଯୋଗ କରାଯାଏ। କିନ୍ତୁ ଚଳିତବର୍ଷ ଛତିଶଗଡ଼ର ଧାମତରିରେ ଏହି କାର୍ଯ୍ୟକ୍ରମ ଅଧାରେ ରହିଯାଇଛି। ଗତ ବୁଧବାର ଧାମତରି ମ୍ୟୁନିସିପାଲିଟି ପକ୍ଷରୁ କରାଯାଇଥିବା ରାବଣପୋଡ଼ି। ପାରମ୍ପରିକ ରୀତିନୀତି ଅନୁସାରେ ଧନୁସର ମାରି ରାବଣ ପୁତ୍ତଳିକାରେ ନିଆଁ ଲଗାଇବାର କିଛି କ୍ଷଣ ମଧ୍ୟରେ ତାଙ୍କ ଶରୀର ଜଳିଯାଇଥିଲା। ହେଲେ ୧୦ଟି ଯାକ ମୁଣ୍ଡ ଅପୋଡ଼ା ରହିଯାଇଥିଲା। ସତେ ଯେମିତି ରାବଣ ଜଳିବାକୁ ଅମଙ୍ଗ ହୋଇଥିଲେ, ଯାହାର ପରିଣତି ମ୍ୟୁନିସିପାଲିଟି କର୍ମଚାରୀ ଓ ଅଧିକାରୀଙ୍କୁ ଭୋଗିବାକୁ ପଡ଼ିଥିଲା।
ସୂଚନାନୁସାରେ କାର୍ଯ୍ୟରେ ଅବହେଳା ନେଇ ଧାମତରି ନଗରପାଳିକା କିରାଣି ରାଜେନ୍ଦ୍ର ଯାଦବଙ୍କୁ କାର୍ଯ୍ୟରୁ ନିଲମ୍ବନ କରିବା ସହ ୪ ଅଫିସର ଆସିଷ୍ଟାଣ୍ଟ ଇଞ୍ଜିନିୟର୍ ବିଜୟ ମେହେର, ସବ୍ ଇଞ୍ଜିନିୟର୍ ଲୋମାସ ଦଓ୍ବେନ୍ଗନ୍, କାମଲେଶ ଠାକୁର ଏବଂ କାମତା ନଗେନ୍ଦ୍ରଙ୍କ ବିରୋଧରେ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। ରାବଣପୋଡ଼ି କାର୍ଯ୍ୟକ୍ରମରେ ଏ ପ୍ରକାର ବିଘ୍ନ ଦ୍ୱାରା ଧାମତରି ନଗରପାଳିକାର ଛବି କଳଙ୍କିତ ହୋଇଥିବା ମ୍ୟୁନିସିପାଲିଟି ପକ୍ଷରୁ କୁହାଯାଇଛି। ନଗରପାଳିକା କମିଶନର ବିଜୟ କୁମାର ଛୁଟିରେ ଥିବା କାରଣରୁ ରାଜେଶ ପଦମଓ୍ବାର ମାମଲାର ଯାଞ୍ଚ କରୁଛନ୍ତି। ଘଟଣାରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଟାନ ନିଆଯାଇଥିବା ସହ ଏ ନେଇ ଖର୍ଚ୍ଚ ନେଇ ହୋଇଥିବା ବିଲ୍ ପୈଠ କରାଯିବ ନାହିଁ ବୋଲି ଧାମତରି ମେୟର କହିଛନ୍ତି। ଲଘୁଚାପ କାରଣରୁ ଦଶହରା ସମୟରେ ଅନେକ ସ୍ଥାନରେ ବର୍ଷା ଲାଗି ରହିଥିଲା। ଏଥିଯୋଗୁ କିଛି ସ୍ଥାନରେ ରାବଣପୋଡ଼ି କାର୍ଯ୍ୟକ୍ରମ ବାଧାପ୍ରାପ୍ତ ହୋଇଥିଲା। ବର୍ଷାରେ ଓଦା ହୋଇଯିବା କାରଣରୁ ରାବଣ ଦରପୋଡ଼ା ହୋଇ ରହିଥିବାର ମଧ୍ୟ ଦେଖିବାକୁ ମିଳିଛି।