ଭୁବନେଶ୍ୱର,୨୦।୫(ବ୍ୟୁରୋ): ରାଜଧାନୀର ବିଭିନ୍ନ ଅଞ୍ଚଳରେ ଲୋକେ ଜବରଦଖଲ କରି ବେଆଇନ ଭାବେ ବାସଗୃହ, ଦୋକାନ ଆଦି ଗଢୁଛନ୍ତି। ସମ୍ପୃକ୍ତ ସ୍ଥାନ ଖାଲି କରିବା ପାଇଁ ସରକାରଙ୍କ ପକ୍ଷରୁ ବାରମ୍ବାର ସେମାନଙ୍କୁ ତାଗିଦ୍ କରିବା ସତ୍ତ୍ୱେ ଏହାକୁ ହେୟ ଜ୍ଞାନ କରୁଛନ୍ତି। ତେଣୁ ସିଇଏମ୍ସି କାର୍ଯ୍ୟକ୍ରମ ଅନୁଯାୟୀ ଜବରଦଖଲ ଉଚ୍ଛେଦ କରାଯାଉଛି। ଏହି ପରିପ୍ରେକ୍ଷୀରେ ଗୁରୁବାର ଖାରବେଳନଗର ଥାନା ଅନ୍ତର୍ଗତ ଅଞ୍ଚଳରୁ ଉଚ୍ଛେଦ କରାଯାଇଛି। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ), ଭୁବନେଶ୍ୱର ମହାନଗର ନିଗମ (ବିଏମସି), ଜିଏ ଏବଂ ପିଜି ବିଭାଗର ଅଧିକାରୀ ଓ କର୍ମଚାରୀଙ୍କୁ ନେଇ ଗଠିତ ଉଚ୍ଛେଦକାରୀ ଦଳଙ୍କ ମିଳିତ ଉଦ୍ୟମରେ ଉଚ୍ଛେଦ କରାଯାଇଛି। କମିଶନରେଟ୍ ପୋଲିସ୍ ସହଯୋଗରେ ଦୃଷ୍ଟିହୀନ ସଂଘ ଠାରୁ ମାଳିସାହି ପର୍ଯ୍ୟନ୍ତ ଅଞ୍ଚଳ ଜବରଦଖଲ ମୁକ୍ତ କରାଯାଇଛି। ଉଚ୍ଛେଦ ପ୍ରକ୍ର୍ରିୟାରେ ଅସ୍ଥାୟୀ ଟିଣ କବାଡ଼ିଆ ଦୋକାନ, ୨୯ଟି ବାଉଁଶ ଓ ଜରିପାଲ ନିର୍ମିତ ଦୋକାନ, ୬ଟି କ୍ୟାବିନ୍ ଏବଂ ଶତାଧିକ କାଠ ଓ ଷ୍ଟିଲ୍ ନିର୍ମିତ କବାଡ଼ି ସାମଗ୍ରୀ ମାଟିରେ ମିଶିଛି। ଉଚ୍ଛେଦ ସମୟରେ ସହକାରୀ ନିର୍ଦ୍ଦେଶକ (ଏନଫୋର୍ସମେଣ୍ଟ) ଅମିୟ କୁମାର ଦାସ, ବିଡିଏର ଯୋଗାଯୋଗ ଅଧିକାରୀ ଶୁଭ୍ରାଂଶୁ ଶେଖର ମହାନ୍ତି, ଖାରବେଳନଗର ଥାନା ଏଏସ୍ଆଇ ଦେବରାଜ୍ କିଶାନ୍ ପ୍ରମୁଖ ଉପସ୍ଥିତ ଥିଲେ। ଆଇନ୍ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଏକ ପ୍ଲାଟୁନ୍ ରିଜର୍ଭ ପୋଲିସ୍ ଫୋର୍ସ ଏବଂ ଏକ ସେକ୍ସନ ମହିଳା ପୋଲିସ କର୍ମଚାରୀ ନିୟୋଜିତ ହୋଇଥିଲେ। ଉଚ୍ଛେଦ ପାଇଁ ୩ଟି ଜେସିବି ବ୍ୟବହାର କରାଯାଇଥିଲା।
