ଭୁବନେଶ୍ୱର,୪।୧୨(ବ୍ୟୁରୋ): ଆୟ ବହିର୍ଭୂତ ସମ୍ପତ୍ତି ଠୁଳ ଓ ଟାଟା କମ୍ପାନୀରେ ଚାକିରି ଦେବା ନାଁରେ ଠକେଇ ମାମଲାରେ ଛନ୍ଦି ହୋଇଥିବା ପୂର୍ବତନ ଆଇଏଫ୍ଏସ୍ ଅଧିକାରୀ ଅଭୟକାନ୍ତ ପାଠକଙ୍କ ଘରେ ଶୁକ୍ରବାର ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଚଢ଼ାଉ କରିଛି। ଭୁବନେଶ୍ୱର ବିବେକାନନ୍ଦ ମାର୍ଗସ୍ଥିତ ତାଙ୍କ ବାସଭବନରେ ଇଡିର ୩ ଜଣିଆ ଟିମ୍ ସକାଳ ୭ଟାରୁ ଚଢ଼ାଉ କରିଥିଲା। ରାତି ପର୍ଯ୍ୟନ୍ତ ଚାଲିଥିବା ଏହି ଚଢାଉରେ ସେଠାରୁ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ଓ ବ୍ୟାଙ୍କ ଦସ୍ତାବିଜ୍ ଇଡି ଜବତ କରିଥିବା ସୂଚନା ମିଳିଛି। ତେବେ ଖବର ଲେଖାହେବା ପର୍ଯ୍ୟନ୍ତ ଏହି ଚଢାଉ ଓ ଯାଞ୍ଚ ଚାଲିଥିଲା। ଏହାପୂର୍ବରୁ ଅକ୍ଟୋବର ୫ରେ ଅଭୟକାନ୍ତଙ୍କୁ ପ୍ରଥମଥର ଇଡି ଜେରା କରିଥିଲା। ନଭେମ୍ବର ୨୫ରେ ସେ ପୁଣିଥରେ ଜେରାର ସମ୍ମୁଖୀନ ହୋଇଥିଲେ। ତେବେ ଜେରାବେଳେ ଅଭୟକାନ୍ତ କିଛି ତଥ୍ୟ ଲୁଚାଇଥିବା ନେଇ ଇଡ଼ିର ସନ୍ଦେହ ହୋଇଥିଲା। ଫଳରେ ଇଡ଼ିର ଟିମ୍ ତାଙ୍କ ଘରେ ଏଭଳି ଅଚାନକ ଚଢ଼ାଉ କରିଥିବା କୁହାଯାଉଛି। ତେବେ ଅଧିକ ତଥ୍ୟ ହାସଲ ପାଇଁ ଚଢାଉବେଳେ ଅଭୟକାନ୍ତ ଓ ତାଙ୍କ ସ୍ତ୍ରୀଙ୍କୁ ଇଡିର ଅଧିକାରୀମାନେ ବିଭିନ୍ନ ଦିଗକୁ ନେଇ ପଚରାଉଚରା କରିଥିବା ଜଣାପଡିଛି।
ସୂଚନାଯୋଗ୍ୟ, ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଅଭୟକାନ୍ତ ପାଠକଙ୍କୁ ୨୦୨୦ ନଭେମ୍ବରରେ ଭିଜିଲାନ୍ସ ଗିରଫ କରିଥିଲା। ପରେ ସେ ଜାମିନ୍ରେ ଆସିଥିଲେ। ଅଭୟକାନ୍ତଙ୍କ ସମୁଦାୟ ୯ କୋଟି ୩୫ ଲକ୍ଷ ଟଙ୍କାର ଆୟ ବହିର୍ଭୂତ ସମ୍ପତ୍ତି ବାହାରିଥିଲା। ଅନ୍ୟପକ୍ଷରେ ଟାଟା କମ୍ପାନୀରେ ଚାକିରି ଦେବା ନାଁରେ ଠକେଇ ମାମଲାରେ ଅଭୟକାନ୍ତଙ୍କ ପୁଅ ଆକାଶ ଗିରଫ ହୋଇ ଏବେ ଜେଲ୍ରେ ଅଛନ୍ତି। ଏହାପରେ ବେଆଇନ ଅର୍ଥ କାରବାରର ଖିଅ ଖୋଜିବାକୁ ଇଡି ନିଜଆଡୁ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
