ନିରାକାରପୁର,୧୫।୯ (ଡି.ଏନ୍.ଏ.):ଖୋର୍ଦ୍ଧା ଜିଲା ଲେଣ୍ଡୋ ପଞ୍ଚାୟତ ଭଗବତୀପଡ଼ା ଗ୍ରାମରେ ଜଳସେଚନ ବିଭାଗ ରାଜୁଆ ସବ୍ଡିଭିଜନର ଉପନିର୍ବାହୀ ଯନ୍ତ୍ରୀ ଅକ୍ଷୟ କୁମାର ବେହେରା ଓ କନିଷ୍ଠ ଯନ୍ତ୍ରୀ ଶିଶିର କୁମାର ସାହୁଙ୍କୁ ଗ୍ରାମବାସୀ କାଦୁଅ ରାସ୍ତାରେ ଚଲାଇବା ସହ ଗାଳିଗୁଲଜ କରିଥିବା ନେଇ ଥାନାରେ ମଙ୍ଗଳବାର ଅଭିଯୋଗ ହୋଇଛି। ପ୍ରକାଶ ଯେ, ମଲାଗୁଣୀ ନଦୀବନ୍ଧ ରାସ୍ତାକୁ ଯିବା ପାଇଁ ଭଗବତୀପଡ଼ା, ତଇଲା ଗ୍ରାମବାସୀ ଜାମୁଝାରୀ ନାଳ ବନ୍ଧ ରାସ୍ତାକୁ ବ୍ୟବହାର କରିଥାନ୍ତି। ତେବେ ଜାମୁଝାରୀ ନାଳ ଖୋର୍ଦ୍ଧା ଜଳସେଚନ ଉଇଖିଆ ପ୍ରକଳ୍ପ ଅଧୀନରେ ଯାଉଥିବା ବେଳେ ପୂର୍ବରୁ ଡ୍ରେନେଜ ବିଭାଗ ଏହାର ରକ୍ଷଣାବେକ୍ଷଣ କରୁଥିଲା। ପରେ ଭଗବତୀପଡ଼ା ଗ୍ରାମବାସୀଙ୍କ ଅନୁରୋଧକ୍ରମେ ଜଳସେଚନ ବିଭାଗ ପକ୍ଷରୁ ୬୦ଲକ୍ଷ ଟଙ୍କା ବ୍ୟୟରେ ୫ମିଟର ଗାର୍ଡଓାଲ ଏହି ନାଳରେ ନିର୍ମାଣ କରାଯାଉଛି। ତେବେ କାମ ସମ୍ପୂଣ୍ଣର୍ର୍ ନ ହେବାରୁ ଗ୍ରାମବାସୀ ମଲାଗୁଣୀ ନଦୀବନ୍ଧ ରାସ୍ତାକୁ ଯାଇପାରୁ ନାହାନ୍ତି। ଅନ୍ୟପଟେ ନାଳରୁ ବାହାରିଥିବା ରାସ୍ତା ଉପରେ ମାଟି ପଡ଼ିଥିବାରୁ ଲଗାଣ ବର୍ଷା ଯୋଗୁ ଏହି ରାସ୍ତା କାଦୁଅରେ ଭର୍ତ୍ତି ହୋଇଯାଇଛି। ଫଳରେ ରାସ୍ତାରେ ଚାଲିକି ଯିବା ଏକପ୍ରକାର ଅସମ୍ଭବ ହୋଇପଡ଼ିଛି। ସୋମବାର ଜଳସେଚନ ବିଭାଗ ରାଜୁଆ ସବ୍ଡିଭିଜନର ଉପନିର୍ବାହୀ ଯନ୍ତ୍ରୀ ବେହେରା ଓ କନିଷ୍ଠ ଯନ୍ତ୍ରୀ ସାହୁ ମଲାଗୁଣୀ ନଦୀବନ୍ଧର ସ୍ଥିତି ଦେଖିବା ପାଇଁ ଯାଇଥିବା ବେଳେ ଗ୍ରାମବାସୀ ରାସ୍ତା ସମ୍ପର୍କରେ ସେମାନଙ୍କୁ ପଚାରିଥିଲେ। ସନ୍ତୋଷଜନକ ଉତ୍ତର ନ ପାଇବାରୁ ଗ୍ରାମବାସୀ ଏହି ଦୁଇ ଯନ୍ତ୍ରୀଙ୍କୁ କାଦୁଅ ରାସ୍ତାରେ ଚଲାଇବା ସହ ଠେଲାପେଲା ଓ ଗାଳିଗୁଲଜ କରିଥିଲେ। ପରେ ଏନେଇ ଦୁଇ ଯନ୍ତ୍ରୀ ନିରାକରପୁର ଥାନାରେ ଲିଖିତ ଅଭିଯୋଗ କରିଛନ୍ତି।