ଲଣ୍ଡନ,୨୪।୮: ଭାରତ ଏବଂ ଇଂଲଣ୍ଡ ମଧ୍ୟରେ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ତୃତୀୟ ମ୍ୟାଚ ଅଗଷ୍ଟ ୨୫ ବୁଧବାର ଠାରୁ ଆରମ୍ଭ ହେଉଛି। ହେଡିଙ୍ଗଲିରେ ଆୟୋଜିତ ହେବାକୁ ଥିବା ଏହି ମ୍ୟାଚରେ ଉଭୟ ଦଳ ପୁଣି ଥରେ ମୁହାଁମୁହିଁ ହେବେ। ଭାରତ ଆତ୍ମବିଶ୍ୱାସ ବଢ଼ାଇ ମ୍ୟାଚକୁ ଆସିବ ଏବଂ ସିରିଜରେ ନିଜର ସ୍ଥିତିକୁ ମଜବୁତ କରିବାକୁ ଚାହୁଁଥିବାବେଳେ ଆୟୋଜକ ଇଂଲଣ୍ଡ ବିଜୟ ସହ ଆକାଉଣ୍ଟ ଖୋଲିବାକୁ ଚାହୁଁଛି। ବର୍ତ୍ତମାନ ଦ୍ୱିତୀୟ ଟେଷ୍ଟ ମ୍ୟାଚ ଜିତିବା ପରେ ଭାରତୀୟ ଦଳ ୧-୦ରେ ଆଗୁଆ ରହିଛି। ଏହା ସତ୍ତ୍ୱେ ଦୁଇ ଦଳ ମଧ୍ୟରେ କଡ଼ା ପ୍ରତିଯୋଗିତାର ଆଶା ଅଛି।
ମ୍ୟାଚ ପୂର୍ବରୁ ଇଂଲଣ୍ଡ ଅଧିନାୟକ ଜୋ ରୁଟ ତାଙ୍କ ଦଳକୁ ପୁନର୍ଜୀବିତ କରିବାକୁ ଚେଷ୍ଟା କରିଥିଲେ। ସେ କହିଛନ୍ତି, ଗତ ମ୍ୟାଚରୁ ଆମେ ଏକ ଶିକ୍ଷା ପାଇଛୁ ଏବଂ ଅନାବଶ୍ୟକ ଭାବେ କୌଣସି ଯୁକ୍ତିରେ ପ୍ରବେଶ କରିବୁ ନାହିଁ। ଏକ ଭର୍ଚୁଆଲ ସାମ୍ବାଦିକ ସମ୍ମିଳନୀରେ ରୁଟ କହିଛନ୍ତି ଯେ, ଇଂଲଣ୍ଡ ଦଳ ଏଥର ସେମାନଙ୍କ ଧ୍ୟାନ ବୁଲିବାକୁ ଦେବ ନାହିଁ। ବିରାଟଙ୍କ ଦଳ ନିଜ ନିଜ ଶୈଳୀରେ ଖେଳିବେ କିନ୍ତୁ ମୁଁ ଚାହୁଁଛି ଯେ ଆମେ ଆମର ଶ୍ରେଷ୍ଠ ପ୍ରଦର୍ଶନ କରିବା ଏବଂ ଏକାଠି ଖେଳିବା। ଆମେ ଆମର ଭୁଲରୁ ଶିଖିଛୁ, ବାକି ତିନୋଟି ମ୍ୟାଚ୍ରେ ଆମକୁ ଅନେକ କିଛି କରିବାକୁ ପଡିବ ଏବଂ ଫେରି ଆସିବାକୁ ଅପେକ୍ଷା କରିଛୁ। ଦଳର ଦୁର୍ବଳ ବ୍ୟାଟିଂ ଉପରେ ରୁଟ କହିଛନ୍ତି ଯେ ଆମେ ଆଶା କରୁଛୁ ଯେ ଆମର ବ୍ୟାଟ୍ସମ୍ୟାନ୍ମାନେ ଭଲ ପ୍ରଦର୍ଶନ କରିବେ।
ସୂଚନାଯୋଗ୍ୟ, ଭାରତୀୟ ଦଳ ବର୍ତ୍ତମାନ ଇଂଲଣ୍ଡ ଗସ୍ତରେ ପାଞ୍ଚ ଟେଷ୍ଟ ସିରିଜ ଖେଳୁଛି। ପ୍ରଥମ ମ୍ୟାଚ୍ ଡ୍ର’ ରହିଥିବାବେଳେ ଦ୍ୱିତୀୟ ମ୍ୟାଚ୍ରେ ଭାରତ ବିଜୟ ହାସଲ କରିଛି।