ଭୁବନେଶ୍ବର, ୧୨ା୮(ବ୍ୟୁରୋ):ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ୨ ଦିନିଆ ଓଡିଶା ଗସ୍ତ ସାରି ଫେରିଯିବାର ଦିନକ ପରେ ରାଜ୍ୟ ଭାଜପା ପ୍ରଭାରୀଙ୍କୁ ବଦଳାଇ ଆଉ ଜଣଙ୍କ ହାତରେ ଦାୟିତ୍ୱ ଟେକିଦେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଏହାଠାରୁ ଅଧିକ ଆଶ୍ଚର୍ଯ୍ୟ କରିଛି, ଭାଜପା ଟାର୍ଗେଟରେ ଥିବା ୩ ରାଜ୍ୟ ପଶ୍ଚିମବଙ୍ଗ, ତେଲେଙ୍ଗାନା ଏବଂ ଓଡିଶା ଦାୟିତ୍ୱ ସେହି ଜଣେ ନେତାଙ୍କ ହାତରେ ନ୍ୟସ୍ତ କରିବା। ଉକ୍ତ ୩ ରାଜ୍ୟର ପ୍ରଭାରୀ ଭାବେ ସୁନିଲ ବଂଶଲଙ୍କୁ ଦାୟିତ୍ୱ ଦିଆଯାଇଛି। ୟୁପି ଦାୟିତ୍ୱରେ ରହିଥିବା ବେଳେ ସେଠାରେ ସେ ଭଲ ପ୍ରଦର୍ଶନ କରିଛନ୍ତି। ତାଙ୍କର ସେହି ରେକର୍ଡ ଏବେ ଓଡ଼ିଶାର ଭାଜପା ନେତାଙ୍କ ଭିତରେ ଉତ୍ସାହ ବଢାଇ ଦେଇଛି। ଏଭଳି ସ୍ଥିତିରେ ବିରୋଧୀ ଦଳ ନେତା ଜୟ ନାରାୟଣ ମିଶ୍ର କହିଛନ୍ତି, ୯୦ ମିନିଟ୍ର ଫୁଟବଲ୍ ଖେଳରେ ପ୍ରଥମରୁ ଆକ୍ରମଣାତ୍ମକ ରହିବା ନ ରହିବା ଦଳର ରଣନୀତି ଉପରେ ନିର୍ଭର କରେ। ଗୋଲ୍ ହେଲେ ଟିମ୍ ଜିତିବ। ଗୋଲ୍ ପାଇଁ ସୁଯୋଗ ଆସି ପହଞ୍ଚି ଯାଇଛି। ଶେଷ ୧୫ମିନିଟ୍ରେ ନିଶ୍ଚିତ ଗୋଲ୍ ମାରିବୁ ବୋଲି ସେ କହିଛନ୍ତି। ବିଜେଡି ବିଧାୟକ ଦେବୀ ମିଶ୍ର କହିଛନ୍ତି, ୨୦୧୯ ସାଧାରଣ ନିର୍ବାଚନରେ ୧୨୦ ନେବେ ସେମାନେ କହିଥିଲେ। ତେବେ ସେମାନେ ନିଜ ଷ୍ଟ୍ରାଟେଜି ବନାଉଛନ୍ତି। ଏହା ତାଙ୍କ ଆଭ୍ୟନ୍ତରୀଣ ବ୍ୟାପାର ବୋଲି ସେ କହିଛନ୍ତି। କଂଗ୍ରେସ ବିଧାୟକ ସୁରେଶ କୁମାର ରାଉତରାୟ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯେଉଁଭଳି ଦରଦାମ୍ ବୃଦ୍ଧି କରିଛନ୍ତି ସେମାନେ ମନକୁ ଲୋପ ହୋଇଯିବେ।
