ଜାକର୍ତ୍ତା, ୧୩।୭: ଇଣ୍ଡୋନେସିଆର ଏକ ଆଗ୍ନେୟଗିରିରୁ ଘନନୀଳ ରଙ୍ଗର ଲାଭା ଉଦ୍ଗିରଣ ହେବାରେ ଲାଗିଛି। ଏହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ଲାଭାର ରଙ୍ଗ ସାଧାରଣତଃ ଲାଲ ରହୁଥିବାବେଳେ ଏଭଳି ରଙ୍ଗ ନେଇ ଲୋକେ ନାନା ପ୍ରକାରଣ ଆଶଙ୍କା ମଧ୍ୟରେ ରହୁଛନ୍ତି। ସୋସିଆଲ୍ ମିଡ଼ିଆରେ ଲାଭାର ରଙ୍ଗକୁ ନେଇ ଏବେ ଚର୍ଚ୍ଚା ଜାରି ରହିଛି। ଉଦ୍ଗିରଣ ହେଉଥିବା ଘନନୀଳ ରଙ୍ଗର ଲାଭାର ଭିଡ଼ିଓ ଏବଂ ଫଟୋକୁ ୟୁଜର ଶେୟାର କରି ଚାଲିଛନ୍ତି। କାଓ୍ବାହ ଲିଜେନ୍ ଆଗ୍ନେୟଗିରି ଉଦ୍ଗିରଣ ହେବା ପରେ ଏଥିରୁ ଏଭଳି ରଙ୍ଗର ଲାଭା ବାହାରିଛି। ଅବତାର ଫିଲ୍ମ ଭଳି ଲାଭା ରଙ୍ଗ ଦେଖାଯାଉଥିବା ସୋସିଆଲ୍ ମିଡ଼ିଆରେ ୟୁଜରମାନେ ମତ ଦେଇଛନ୍ତି। ପ୍ୟାରିସ୍ର ଫଟୋଗ୍ରାଫର ଓଲିଭର୍ ଗ୍ରୁନଓ୍ବୋଲ୍ଡ୍ ଆଗ୍ନେୟଗିରି ଉଦ୍ଗିରଣର ଫଟୋ ଶେୟାର କରିଛନ୍ତି। ସେ କହିଛନ୍ତି ଯେ, ଅତ୍ୟଧିକ ସଲଫ୍ୟୁରିକ୍ ଗ୍ୟାସ୍ ଆଗ୍ନେୟଗିରିରୁ ଉଦ୍ଗିରଣ ହେଉଥିବାରୁ ରଙ୍ଗ ଏଭଳି ଘନନୀଳ ରଙ୍ଗ ଧାରଣ କରିଛି। ତରଳ ସଲଫର ଲାଭା ଭଳି ପାହାଡ଼ ତଳକୁ ବହି ଆସୁଥିବା ସେ କହିଛନ୍ତି। ଏଡ଼େ ଆତଙ୍କିତ ହେବାର କୌଣସି କାରଣ ନାହିଁ ବୋଲି ସେ କହିଛନ୍ତି। ରାତିରେ ଏହି ଘନନୀଳ ରଙ୍ଗ ବେଶ୍ ଆକର୍ଷଣୀୟ ଏବଂ ସୁନ୍ଦର ଦେଖା ଯାଉଥିବା ସେ ପ୍ରକାଶ କରିଛନ୍ତି। ରାତି ଅନ୍ଧାରରେ ଏହା ଚକମକ କରୁଥିବା ସେ କହିଛନ୍ତି।
