ଢେଙ୍କାନାଳ ଅଫିସ, ୧୨।୧୨: ଆସିଛି ଶୀତ। ଆଣିଛି ଅଜସ୍ର ଉନ୍ମାଦନା। ଆରମ୍ଭ ହୋଇଛି ପର୍ଯ୍ୟଟନ ଋତୁ। ପ୍ରକୃତିରାଜୀ ଭିଜୁଛି ଶୀତୁଆ ସକାଳର କାକରରେ। କୋଳାହଳମୟ ପରିବେଶଠୁ ଦୂରରେ କେଇଘଣ୍ଟା ହଜିଯିବାକୁ ପର୍ଯ୍ୟଟକଙ୍କୁ ହାତଠାରି ଡାକୁଛି ପର୍ଯ୍ୟଟନସ୍ଥଳୀ। ଭୂତାଣୁ ଭୟରେ କଟକଣା ବେଡିରେ ବନ୍ଧା ହୋଇଥିବା ମଣିଷ ମତୁଆଲା କୋହଲା ପାଗର ମଜା ନେବାକୁ ଚାହିଁବସିଛି। କିନ୍ତୁ ପ୍ରଶାସନ ମାରିପାରିବନି ହୁଗୁଳା। କରୋନା କମିଛି ସତ, ହେଲେ ଏଯାଏ ଟଳିନି ସଙ୍କଟ। ଶୀତରେ ସଂକ୍ରମଣ ବଢ଼ିବା ଆଶଙ୍କା ଥିବାରୁ ଡିସେମ୍ବର, ଜାନୁୟାରୀକୁ ଜଗିବା ବେଶି ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ତେଣୁ ପର୍ଯ୍ୟଟନସ୍ଥଳୀଗୁଡ଼ିକୁ ମୁକୁଳା କରି କୌଣସି ବିପଦ ମୁଣ୍ଡାଇବାକୁ ଚାହୁଁନି ପ୍ରଶାସନ। ଫଳରେ ପାର୍ବଣ ଭଳି ପର୍ଯ୍ୟଟନ ଋତୁ, ବଡ଼ଦିନ, ନୂଆବର୍ଷ ମଉଜ ମଧ୍ୟ ଫିକାପଡ଼ିବା ଆଶଙ୍କା ଦେଖାଦେଇଛି।
ଢେଙ୍କାନାଳରେ ତଳମୁହାଁ ହେଲାଣି କରୋନା ଗ୍ରାଫ୍। ଧୀରେ ଧୀରେ କୋହଳ ହେଉଛି କଟକଣା। ସ୍ବାଭାବିକ ଟ୍ରାକ୍କୁ ଫେରୁଛି ଜୀବନ। ହେଲେ ପର୍ଯ୍ୟଟନସ୍ଥଳୀକୁ ପର୍ଯ୍ୟଟକଙ୍କ ଲାଗି ମୁକୁଳା କରି ବିପଦକୁ ଆମନ୍ତ୍ରଣ କରିବାକୁ ଚାହୁଁନି ପ୍ରଶାସନ। ତେଣୁ ଡିସେମ୍ବର ୨୫ ବଡ଼ଦିନରୁ ଜାନୁୟାରୀ ପହିଲା ନୂଆବର୍ଷ ଯାଏ ପ୍ରସିଦ୍ଧ ପର୍ଯ୍ୟଟନସ୍ଥଳୀ ସପ୍ତଶଯ୍ୟା ଏବଂ କପିଳାସକୁ ପୋଲିସ ଛାଉଣୀ କରିବାକୁ ନିଷ୍ପତ୍ତି ନିଆଯାଇଛି। ସେହିପରି ଅନ୍ୟ ପ୍ରମୁଖ ବଣଭୋଜି ସ୍ଥଳରେ ମଧ୍ୟ ଜନସମାଗମ ଉପରେ କଟକଣା ଜାରି କରିବାକୁ ପ୍ରଶାସନିକ ନିଷ୍ପତ୍ତି ହୋଇଛି।
ପର୍ଯ୍ୟଟନ ସମ୍ଭାରରେ ଭରପୂର ଢେଙ୍କାନାଳ। ପ୍ରମୁଖ ପର୍ଯ୍ୟଟନ କ୍ଷେତ୍ର ସପ୍ତଶଯ୍ୟା, କପିଳାସକୁ ବାଦ୍ ଦେଲେ ଗଣେଶ ଖୋଲା, ନାଧରା, ସାପୁଆ, ଦଣ୍ଡାଧର ଡ୍ୟାମ୍, ଐତିହାସିକ କୀର୍ତ୍ତି ଅନନ୍ତଶୟନ ପୀଠ ବୁଲିବାକୁ ପର୍ଯ୍ୟଟନ ଋତୁରେ ଢେଙ୍କାନାଳକୁ ବହୁ ଦେଶୀୟ ଏବଂ ବିଦେଶୀ ପର୍ଯ୍ୟଟକ ଆସିଥାନ୍ତି। ତେବେ ଚଳିତ ବର୍ଷ ସ୍ଥିତି ଭିନ୍ନ। କରୋନା ସଂକ୍ରମଣ ଭୟ କମି ନ ଥିବାରୁ ଜନସମାଗମ ରୋକିବା ପ୍ରଶାସନ ଲାଗି ଚ୍ୟାଲେଞ୍ଜ ପାଲଟିଛି। ଏ ସଂକ୍ରାନ୍ତରେ ଜିଲାପାଳ ଭୂମେଶ ଚନ୍ଦ୍ର ବେହେରା ଗତ ୧୦ ତାରିଖରେ ଏସ୍ପିଙ୍କୁ ପତ୍ର ଲେଖିଛନ୍ତି। କାମାକ୍ଷାନଗର ଏବଂ ହିନ୍ଦୋଳ ଉପଖଣ୍ଡରେ ଥିବା ପର୍ଯ୍ୟଟନସ୍ଥଳୀରେ ପୋଲିସ ମୁତୟନ ପାଇଁ ସମ୍ପୃକ୍ତ ଉପଜିଲାପାଳମାନେ ପଦକ୍ଷେପ ନେବେ। ଜିଲାର ସମସ୍ତ ପର୍ଯ୍ୟଟନସ୍ଥଳୀରେ ବଣଭୋଜି ନିଷେଧ କରାଯାଇଛି। ଅଧିକାଂଶ ପର୍ଯ୍ୟଟନ ସ୍ଥଳୀ ରାସ୍ତାକୁ ବନ୍ଦ କରିଦିଆଯାଇଛି। ରବିବାର ଏବଂ ଅନ୍ୟ ଛୁଟିଦିନରେ ଉକ୍ତ ସ୍ଥାନରେ ଅଧିକ ପୋଲିସ ମୁତୟନ କରାଯିବ ବୋଲି ପ୍ରଶାସନିକ ନିଷ୍ପତ୍ତି ହୋଇଛି।
ଏ ସଂକ୍ରାନ୍ତରେ ଉପଜିଲାପାଳ ସାଫଲ୍ୟ ମଣ୍ଡିତ ପ୍ରଧାନ କୁହନ୍ତି, ଜନସମାଗମ ଆଶଙ୍କାରେ ଚଳିତ ମାସ ଆରମ୍ଭରୁ ପର୍ଯ୍ୟଟନସ୍ଥଳୀଗୁଡ଼ିକୁ ବନ୍ଦ ରଖାଯାଇଛି। ବଡ଼ଦିନରୁ ନୂଆବର୍ଷ ଯାଏ କଟକଣା କଡ଼ାକଡ଼ି କରାଯିବ। ଅଧିକ ପୋଲିସ ମୁତୟନ କରାଯିବା ଲାଗି ଜିଲାପାଳଙ୍କ ସହ ଆଲୋଚନା ହୋଇଛି।