ଆଳି,୪।୧(ଡି.ଏନ୍.ଏ): କେନ୍ଦ୍ରାପଡ଼ା ଜିଲା ଆଳି ତହସିଲ ଅନ୍ତର୍ଗତ ତରିପାଟଣା ଗ୍ରାମର କେତେଜଣ ବ୍ୟକ୍ତି କଙ୍ଗାରୁ କୋର୍ଟ କରି ବାବୁଲି ସାହୁଙ୍କ ପରିବାର ଲୋକଙ୍କୁ ମାସେ ହେବ ଗୃହବନ୍ଦୀ ଅବସ୍ଥାରେ ରଖିଛନ୍ତି। ଏ ନେଇ ସେ ତହସିଲ ଓ ଥାନାର ଦ୍ୱାରସ୍ଥ ହୋଇଥିଲେ ମଧ୍ୟ ଆଜିଯାଏ ନ୍ୟାୟ ପାଉନାହାନ୍ତି ବୋଲି ସୋମବାର ଅପରାହ୍ନରେ ଏକ ଖବରଦାତା ସମ୍ମିଳନୀରେ ସାହୁ ଅଭିଯୋଗ କରିଛନ୍ତି। ସାହୁ କରିଥିବା ଅଭିଯୋଗ ଅନୁଯାୟୀ, ତାଙ୍କ ପରିବାର ଲୋକ କଅଁରପୁର ମୌଜାର ଖାତା ନଂ. ୩୩୧, ପ୍ଲଟ ନଂ. ୧୬୭୧ରେ ୭୦ ବର୍ଷ ହେବ ବସବାସ କରି ଆସୁଛନ୍ତି। ତାଙ୍କ ଘର ସାମ୍ନା ୧୬୭୦ ନମ୍ବର ପ୍ଲଟରେ ରୋହିନୀ ଠାକୁରାଣୀଙ୍କ ମନ୍ଦିର ରହିଛି। ଏହି ଠାକୁରାଣୀ ମନ୍ଦିର ପରିସର ରାସ୍ତାରେ ସେମାନେ ଦୀର୍ଘବର୍ଷ ହେବ ଯାତାୟାତ କରି ଆସୁଥିଲେ। ଗ୍ରାମର କେତେଜଣ ମନ୍ଦିର ପାଚେରି ନିର୍ମାଣ କରିବା ପରେ ତାଙ୍କ ଯାତାୟାତ ଲାଗି ଏକ ଛୋଟ ରାସ୍ତା ରଖିଥିଲେ, ଯେଉଁ ରାସ୍ତାରେ ତାଙ୍କ ପରିବାର ଲୋକ ଯାତାୟାତ କରୁଥିଲେ। କିନ୍ତୁ ୩ା୧୨ା୨୦୨୧ରେ ଗ୍ରାମର କେତେଜଣ ବ୍ୟକ୍ତି ତାଙ୍କ ଉପରେ ଆକ୍ରୋଶମୂଳକ ମନଭାବ ରଖି ତାଙ୍କ ନିମନ୍ତେ ଥିବା ଛୋଟିଆ ବାଟକୁ ବନ୍ଦ କରି ଦେଇଛନ୍ତି। ଏ ନେଇ ସେ ସେମାନଙ୍କୁ ବାରଣ କରିବାରୁ ତାଙ୍କୁ ମାଡ଼ ମରାଯାଇଥିବା ତହସିଲଦାରଙ୍କ ନିକଟରେ ଅଭିଯୋଗ କରିଛନ୍ତି। ଯାତାୟାତ ରାସ୍ତା ବନ୍ଦ ଯୋଗୁ ପରିବାର ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ପରିବାର ଲୋକଙ୍କ ସମେତ ଗୋରୁ ମଧ୍ୟ ଗୁହାଳେ ବନ୍ଧା ହୋଇ ରହିଛନ୍ତି। ସେମାନଙ୍କୁ ମୁଖ୍ୟ ରାସ୍ତାକୁ ଯିବାକୁ ହେଲେ ଘର ପଛ ପଟ ବିଲ ବାଟେ ଯିବାକୁ ପଡୁଛି। ମୁଖ୍ୟ ରାସ୍ତା ନ ଥିବାରୁ ସେମାନେ ବହୁ ହଇରାଣ ହେଉଛନ୍ତି। ତାଙ୍କୁ ତୁରନ୍ତ ନ୍ୟାୟ ପ୍ରଦାନ କରିବାକୁ ସେ ଦାବି କରିଛନ୍ତି। ଏ ନେଇ ଆଳି ତହସିଲଦାର ତପନ କୁମାର ସେନାପତିଙ୍କୁ ପଚାରିବାରୁ ସେ କୌଣସି ଉତ୍ତର ଦେଇ ନ ଥିଲେ। ଏ ସଂକ୍ରାନ୍ତରେ ଆଳି ଆଇଆଇସି ସଲିଳ କୁମାର ପ୍ରଧାନଙ୍କୁ ପଚାରିବାରେ ଜମିଜମାକୁ ନେଇ ବିବାଦ ହୋଇଥିବାରୁ ତହସିଲଦାରଙ୍କ ପାଖକୁ ଯିବାକୁ ବାବୁଲି ସାହୁଙ୍କୁ କୁହାଯାଇଥିଲା ବୋଲି ସେ କହିଛନ୍ତି।