ବଲିଉଡ ଅଭିନେତ୍ରୀ କୋଙ୍କଣା ସେନ ଶର୍ମା ଆଜି ତାଙ୍କର ୪୧ତମ ଜନ୍ମଦିନ ପାଳନ କରୁଛନ୍ତି। ଅଭିନୟ ଜରିଆରେ ଦର୍ଶକଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଥିବା କୋଙ୍କଣା ସେନ ଶର୍ମା କେବଳ ବୃତ୍ତିଗତ ନୁହେଁ, ବ୍ୟକ୍ତିଗତ ଜୀବନରେ ମଧ୍ୟ ବେଶ୍ ଚର୍ଚ୍ଚାରେ ଥା’ନ୍ତି। ଜାତୀୟ ପୁରସ୍କାର ଜିତିଥିବା କୋଙ୍କଣା ସେନ ଶର୍ମା ପିଲାଦିନରୁ ଅଭିନୟ ଆରମ୍ଭ କରିଥିଲେ। ତାଙ୍କ ପିତା ପ୍ରସିଦ୍ଧ ସାମ୍ବାଦିକ ମୁକୁଲ ଶର୍ମା ଏବଂ ମା’ ନିର୍ଦ୍ଦେଶକ ତଥା ଅଭିନେତା ଅପର୍ନା ସେନ। କୋଙ୍କଣା ସେନ ଶର୍ମା ଶିଶୁ କଳାକାର ଭାବରେ ନିଜର କ୍ୟାରିଅର୍ ଆରମ୍ଭ କରିଥିଲେ। ସେ ୧୯୮୩ ମସିହାରେ ବଙ୍ଗଳା ଚଳଚ୍ଚିତ୍ର ଇନ୍ଦିରା ସହିତ କ୍ୟାରିୟର ଆରମ୍ଭ କରିଥିଲେ। ବଡ ହେବା ପରେ ବଙ୍ଗଳା ଚଳଚ୍ଚିତ୍ର ଏକ ଜେ ଆଛେ କନ୍ୟା ସହିତ ଫିଲ୍ମ ଇଣ୍ଡଷ୍ଟ୍ରିରେ ଡେବ୍ୟୁ କରିଥିଲେ। ଏହି ଫିଲ୍ମରେ ତାଙ୍କ ଅଭିନୟକୁ ଉଚ୍ଚ ପ୍ରଶଂସା କରାଯାଇଥିଲା। ୨୦୦୨ରେ, କୋଙ୍କଣା ରୁତୁପୁର୍ଣ୍ଣା ଘୋଷଙ୍କ ଫିଲ୍ମ ‘ତିତ୍ଲି’ରେ ଅଭିନୟ କରି ଦର୍ଶକଙ୍କ ହୃଦୟ ଜିତିଥିଲେ। କୋଙ୍କଣା ଅଭିନେତା ରଣବୀର ସୋରେଙ୍କୁ ଫିଲ୍ମ ‘ଆଜା ନାଚ ଲେ’ର ସେଟରେ ଭେଟିଥିଲେ। ପରେ ଉଭୟ ପ୍ରେମରେ ପଡିଥିଲେ ଏବଂ ସେମାନଙ୍କ ସମ୍ପର୍କ ବିଷୟରେ ଆଲୋଚନା ଆରମ୍ଭ ହୋଇଥିଲା। କୋଙ୍କଣା ବିବାହ ପୂର୍ବରୁ ଗର୍ଭବତୀ ହୋଇଥିଲେ। ଯାହା ପରେ ଦୁହେଁ ବିବାହ କରିବାକୁ ସ୍ଥିର କଲେ ଏବଂ ୨୦୧୦ରେ ସେମାନେ ଶୀଘ୍ର ବିବାହ କଲେ। କିଛି ମାସ ପରେ କୋଙ୍କଣା ପୁଅ ହାରୁନଙ୍କୁ ଜନ୍ମ ଦେଇଥିଲେ। ତେବେ କୋଙ୍କଣା ଏବଂ ରଣବୀରଙ୍କ ବିବାହ ବେଶୀ ଦିନ ତିଷ୍ଠି ରହିଲା ନାହିଁ। ଉଭୟ ୨୦୧୫ରେ ଅଲଗା ହେବାକୁ ସ୍ଥିର କଲେ। ଉଭୟ ସୋସିଆଲ ମିଡିଆରେ ଅଲଗା ହେବାର ଖବର ମଧ୍ୟ ଘୋଷଣା କରିଥିଲେ।