ରମ୍ଭା:୧୬।୫: ଗତ ଦୁଇ ବର୍ଷ ଧରି କରୋନା କଟକଣା ଯୋଗୁ ଦକ୍ଷିଣ ଓଡ଼ିଶାର ପ୍ରସିଦ୍ଧ ରମ୍ଭା ଚନ୍ଦନଯାତ୍ରା ବିଧିବିଧାନ ସହକାରେ ପାଳନ କରାଯାଉଥିଲା। ହେଲେ ଚଳିତ ବର୍ଷ କରୋନା କଟକଣା ହଟିବା ପରେ ସ୍ଥାନୀୟ ବାସିନ୍ଦା ଓ ଶାନ୍ତି କମିଟି ପକ୍ଷରୁ ବହୁ ଆଡ଼ମ୍ବରରେ ଚନ୍ଦନଯାତ୍ରା ପାଳିତ ହେବାକୁ ଯାଉଛି। ରାତି ପାହିଲେ ରମ୍ଭା ଚନ୍ଦନଯାତ୍ରା। ଏଥିପାଇଁ ସହର ଚଳଚଞ୍ଚଳ ହୋଇପଡ଼ିଥିବା ବେଳେ ସମସ୍ତ ପ୍ରସ୍ତୁତି ଚୂଡ଼ାନ୍ତରେ ପହଞ୍ଚିଛି। ସ୍ଥାନୀୟ ପୋଲିସ ପ୍ରଶାସନ ପକ୍ଷରୁ ଆଇନ ଶୃଙ୍ଖଳା ଓ ଶାନ୍ତି ରକ୍ଷା କରିବା ପାଇଁ ଏକ ପ୍ଲାଟୁନ ଫୋର୍ସ ମୁତୟନ କରାଯାଇଛି। ଏଥିସହ ଏସ୍ଆଇ, ଏଏସ୍ଆଇ, କନଷ୍ଟେବଳ ଓ ହୋମଗାର୍ଡ ମଧ୍ୟ ମୁତୟନ ହୋଇଛନ୍ତି। ତେବେ ବିଶୃଙ୍ଖଳା ସୃଷ୍ଟି କଲେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ରମ୍ଭା ଥାନା ଅଧିକାରୀ ପି. ସ୍ବରୂପ କିଷାନ ସୂଚନା ଦେଇଛନ୍ତି। ଏଥିସହ ମନରୋଞ୍ଜନ ଲାଗି ବହୁ ଉଚ୍ଚତା ସମ୍ପର୍ଣ୍ଣ ମେଢ଼ ନିର୍ମାଣ ସହ ସୁନ୍ଦର ତୋରଣମାନ, ରାମଦୋଳି ଇତ୍ୟାଦି ପସରା ମେଲିଥିବା ଝଣାପଡ଼ିଛି।