ଚଣ୍ଡିଖୋଲ,୧୮ା୧(ଡି.ଏନ.ଏ.): ଓଡ଼ିଶାର ପ୍ରସିଦ୍ଧ ଓଳାଶୁଣୀ ଗୁମ୍ଫା ମେଳା ବୁଧବାର ଭୋର ସମୟରୁ ଆରମ୍ଭ ହେବ। ଏଥି ପାଇଁ ବ୍ୟାପକ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ମାଘ ମାସ କୃଷ୍ଣପକ୍ଷ ଏକାଦଶୀ ତିଥିରେ ମହାପୁରୁଷ ସନ୍ଥ ଅରକ୍ଷିତ ଦାସଙ୍କ ବ୍ରହ୍ମଲୀନ ଦିବସ ଅବସରରେ ଏହି ମେଳା ଆରମ୍ଭ ହୋଇଥାଏ। ଚଳିତ ବର୍ଷ ୧୮୬ ତମ ଗୁମ୍ଫା ମେଳା ହେଉଥିବା ନେଇ ଓଳାଶୁଣୀ ଗୁମ୍ଫା ଉନ୍ନୟନ କମିଟି ପକ୍ଷରୁ ସୂଚନା ଦିଆଯାଇଛି। ସେଥିପାଇଁ ଓଳାଶୁଣୀ ପାହାଡ଼ ଶୀର୍ଷ ଦେଶରେ ଥିବା ମହାପୁରୁଷଙ୍କ ମହା ସମାଧି ମନ୍ଦିରରେ ସାଜସଜ୍ଜା ବ୍ୟାପକ ହୋଇଛି। ପାହାଡ଼ ପାଦଦେଶରେ ଅବସ୍ଥିତ ମେଳା ପଡିଆରେ ହଜାରହଜାର ଅସ୍ଥାୟୀ ଦୋକାନ ଖୋଲାଯାଇଛି। ପରମ୍ପରା ଅନୁଯାୟୀ ମେଳା ଆରମ୍ଭ ପୂର୍ବରୁ ଏଠାରେ କେଶ ଯାତ୍ରା ହୋଇଥାଏ। ସେଥିପାଇଁ ମଙ୍ଗଳବାର ସା ୭ଟାରେ ଏକ ବିମାନ ମଧ୍ୟରେ କେଶକୁ ରଖାଯାଇ ଅତାସ ବାଜି ଓ ଘଣ୍ଟ, ବାଜା ସହକାରେ ରୋଷଣି କରାଯାଇ କେଶକୁ ନିଆଯାଇଛି। ଲଳିତଗିରି ଗ୍ରାମର କଳ୍ପତରୁ ମହାରଣାଙ୍କ ବାସଭବନରେ ରହି ପୂଜା ପାଉଥିବା ଏହି କେଶ ଯାତ୍ରା ରାତ୍ରି ୧୧ଟାରେ ମହାପୁରୁଷଙ୍କ ସମାଧି ମନ୍ଦିରରେ ପହଞ୍ଚବା ପରେ ସମାଧି ପୀଠରେ ପୂଜାର୍ଚ୍ଚନା କରାଯାଇ ମନ୍ଦିରରେ ପତାକା ଲଗାଯିବ। ପରେ ମେଳା କାର୍ଯ୍ୟ ଆରମ୍ଭ ହେବ। ଦୀର୍ଘ ୧ କିଲୋମିଟର ଏହି ଯାତ୍ରାରେ ଲଲିତଗିରି ଓ ଶୁଖୁଆପଡା ଗ୍ରାମବାସୀ ସାମିଲ ହୋଇଥିଲେ। ଶୁଖୁଆପଡ଼ା ଗ୍ରାମବାସୀଙ୍କ ଦ୍ୱାରା ପ୍ରସ୍ତୁତ ମହାପୁରୁଷଙ୍କ ପ୍ରିୟଭୋଗ ପୋଡ଼ପିଠା ଭୋର ସମୟରେ ପ୍ରଥମେ ଲାଗି ହେବା ପରେ ଅନ୍ୟ ମାନସିକଧାରୀଙ୍କ ଭୋଗ ଲାଗି ହୋଇଥାଏ। ସେହିଭଳି ପ୍ରଥମେ ଶୁଖୁଆପଡ଼ା ଗ୍ରାମବାସୀ ମହାପ୍ରସାଦ ସେବନ କରିବା ପରେ ଅନ୍ୟମାନେ ମହା ପ୍ରସାଦ ପାଇ ଥାଆନ୍ତି।