ପାରଳାଖେମୁଣ୍ଡି/ମୋହନା,୨ା୧୧ (ଗିରିଧାରୀ ପରିଛା/ମନ୍ମଥ ମିଶ୍ର): ଗଜପତି ଜିଲାରେ ମରୁଡ଼ିର ପରିସ୍ଥିତି ଦେଖିବାକୁ ମିଳିଛି। ଜମି ଫାଟି ଆଁ କଲାଣି। ଚାଷୀ ଏବେ ଚିନ୍ତାରେ ମୁଣ୍ଡରେ ହାତଦେଇ ବସିଛି। ବର୍ଷାଭାବ ଯୋଗୁ ଏପରି ସ୍ଥିତି ଉପୁଜିଥିଲେ ମଧ୍ୟ ପ୍ରଶାସନର ଉଦାସୀନତା ମନୋଭାବ ପରିଲକ୍ଷିତ ହେଉଥିବା ଚାଷୀମାନେ ଅଭିଯୋଗ କରିଛନ୍ତି। ଜଳସେଚନ ବିଭାଗ ଜିଲାର ବିଭିନ୍ନ ଜଳଉତ୍ସ ଗୁଡିକର ମରାମତି ନ କରିବା ଫଳରେ ଚାଷୀ ପାଣି ନ ପାଇ ହନ୍ତସନ୍ତ ହେଉଥିବା ଅଭିଯୋଗ କରିଛନ୍ତି। ଏବେ ଧାନ ଗର୍ଭଧାରଣ ସମୟରେ ଜମି ଫାଟି ଆଁ କରିଛି। ଗତ ତିନି ମାସ ହେଲା ଅଭାବ ବୃଷ୍ଟି ଚାଷୀଙ୍କୁ ସଙ୍କଟକୁ ଠେଲିଦେଇଛି । ସବୁବେଳେ ଅକ୍ଟୋବର ମାସରେ ଶେଷ ବର୍ଷା ହୋଇଥାଏ, ଯାହା ଧାନର ଗର୍ଭଧରିବା ଠାରୁ ଅମଳ ପର୍ଯ୍ୟନ୍ତ ପାଣି ଯୋଗାଇ ଥାଏ । କିନ୍ତୁ ଚଳିତ ବର୍ଷ ଅଗଷ୍ଟ ପ୍ରଥମ ସପ୍ତାହ ପରଠାରୁ ଆଉ ବର୍ଷାର ଦେଖାନାହିଁ । ଅଧିକାଂଶ ଜମିରେ ଧାନ ଗଛ ଶୁଖି ନଷ୍ଟ ହେଇସାରିଲାଣି।
ମୋହନା ବ୍ଲକ କେଶରା ଗାଁରେ ନିଅଣ୍ଟିଆ ବର୍ଷା ଯୋଗୁଁ ହେକ୍ଟର ହେକ୍ଟର ଧାନ ଫସଲ ନଷ୍ଟ ହୋଇଯାଇଛି। କେଶରା ଗାଁର ଭଞ୍ଜ କମାର ଲ୍ୟାମ୍ପ ସଂସ୍ଥାରୁ ୩୦ ହଜାର ଟଙ୍କା ଋଣ ନେଇ ୩ ଏକର ଜମିରେ ଧାନ ଚାଷ କରିଥିଲେ। ହେଲେ ନିଅଣ୍ଟିଆ ବର୍ଷା ଯୋଗୁଁ ଜମି ଫାଟି ଆଁ କରିଥିବା ବେଳେ ଧାନ ଫସଲ ସବୁ ପୋଡ଼ି ନଷ୍ଟ ହୋଇଯାଇଛି। ଫଳରେ ବାଧ୍ୟ ହୋଇ ଧାନ କ୍ଷେତରେ ଗାଈ ଚରାଇ ଦେଇଥିଲେ। ସେହିପରି ଗାଁର ବେଞ୍ଜାମିନ ମଲ୍ଲିକଙ୍କ ୪ ଏକର, କେରାଖାଲ ଗାଁର ବୃନ୍ଦାବତୀ ନାୟକଙ୍କ ପ୍ରାୟ ୪ ଏକର ଧାନ ଫସଲ ନଷ୍ଟ ହୋଇଯାଉଛି। ବିଭିନ୍ନ ସ୍ଥାନରୁ ଧାର କରଜ କରି ଚାଷ କରିଥିଲେ ଚାଷୀ। ହେଲେ ଏବେ ରୁଣ କିଭଳି ପରିଶୋଧ କରିବେ ଓ ପରିବାର କିଭଳି ପତିପୋଷଣ କରିବେ ସେ ନେଇ ଚିନ୍ତାରେ ଚାଷୀକୁଳ।
ଜିଲାରେ ଅଗଷ୍ଟ ମାସରେ ୨୫୩.୬ ମିମି ବୃଷ୍ଟିପାତ ହେବାକୁ ଥିବାବେଳେ ହୋଇଛି ୧୬୬.୯୭ ମିମି ହୋଇଛି। ୮୬.୬୩ ମିମି କମ ବର୍ଷା ହୋଇଛି। ସେପ୍ଟେମ୍ବର ମାସରେ ୨୩୭.୯ ମିମି ବୃଷ୍ଟିପାତ ହେବା ବଦଳରେ ୧୩୬ ମିମି ବର୍ଷା ହୋଇଛି, ଯାହା ସ୍ବାଭାବିକ ଠାରୁ ୧୦୧ ମିମି କମ ବୃଷ୍ଟିପାତ। ଅକ୍ଟୋବର ମାସରେ ୧୬୮.୬ ମିମି ବଦଳରେ ୨୧.୨୬ମିମି, ଯାହା ୧୪୭.୩୪ ମିମି କମ ବୃଷ୍ଟିପାତ ହୋଇଥିବା ସୂଚନା ରହିଛି। ଜିଲାରେ ୩୯,୦୭୨ ଏକର ଜମି ଜଳସେଚିତ ଓ ୪୪,୪୨୦ ଏକର ଅଣ ଜଳସେଚିତ ଜମି ରହିଛି। ଦୀର୍ଘଦିନ ଧରି ବୃଷ୍ଟିପାତ ଅଭାବ ଯୋଗୁଁ ଜିଲାର ସମସ୍ତ ଚାଷ ଜମି ଏଥିରେ ପ୍ରଭାବିତ ହୋଇଛି। ଚଳିତ ବର୍ଷ ଜିଲାରେ ୨୬,୬୮୯ ଏକର ଜମିରେ ଧାନ ଚାଷ କରାଯାଇଛି। ଜିଲାରେ ୧୭ଟି କ୍ଷୁଦ୍ର ଜଳ ସେଚନ ପ୍ରକଳ୍ପ ଚାଷୀଙ୍କୁ ଜଳ ଯୋଗାଇବା ସହ ଆନ୍ଧ୍ର ଚାଷୀଙ୍କୁ ମଧ୍ୟ ଜଳ ଯୋଗାଇଥାଏ। ତେବେ ବର୍ତ୍ତମାନ ଅଭାବ ବୃଷ୍ଟି ଯୋଗୁ କୌଣସି ପ୍ରକଳ୍ପରେ ପାଣି ନାହିଁ। ଚାଷୀଙ୍କ ସ୍ଥିତିକୁ ଦେଖି ପାରଳାଖେମୁଣ୍ଡି ବିଧାୟକ କେ.ନାରାୟଣ ରାଓ ଗଜପତିକୁ ମରୁଡି ଘୋଷଣା କରିବା ପାଇଁ ରାଜ୍ୟ ସରକାରଙ୍କୁ ଦାବି କରିଛନ୍ତି। ଅନ୍ୟପକ୍ଷରେ ଜିଲାପାଳ ସ୍ମୃତିରଞ୍ଜନ ପ୍ରଧାନ କହିଛନ୍ତି, ଜିଲା ପ୍ରଶାସନ ପାଖରେ ଏନେଇ ଖବର ଅଛି । ସମସ୍ତ ଉଠାଜଳସେଚନ ପଏଣ୍ଟ ଓ ବିଦୁତ୍ୟ ବିଭାଗକୁ ସତର୍କ କରାଯାଇଛି। ପରିସ୍ଥିତିର ମୁକାବିଲା ପାଇଁ ପ୍ରଶାସନ ପ୍ରୟାସ ଜାରି ରଖିଛି। ତେବେ ଗତ ୧୫ବର୍ଷ ମଧ୍ୟରେ ଏଭଳି ଅବସ୍ଥା କେବେ ଦେଖାଦେଇନଥିବା ଚାଷୀ ଆର. ରମେଶ, କବିରାଜ ମାଳି, ଗୋପୀନାଥ ପାତ୍ର, ରଶ୍ମିରଞ୍ଜନ ସାହୁ ପ୍ରମୁଖ କହିଛନ୍ତି।