ରଘୁନାଥପୁର,୯ା୧୨(ଡି.ଏନ୍.ଏ.):ଦୀର୍ଘବର୍ଷର ସଂଘର୍ଷ ପରେ ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ ରେଢୁଆ ନୂଆଗଡ଼ସ୍ଥିତ ସଫଳ ଚାଷୀ ଅଶୋକ କୁମାର ବାରିକଙ୍କୁ ସଫଳତା ମିଳିଛି। ବୈଜ୍ଞାନିକ ନ ହୋଇବି ନିଜ ପ୍ରଚେଷ୍ଟାରେ ରତ୍ନମେଣ୍ଟି ଧାନ ଉଦ୍ଭାବନ କରି କେନ୍ଦ୍ର ସରକାରଙ୍କ ପ୍ଲାଣ୍ଟ ଭେରାଇଟିଜ ରେଜିଷ୍ଟ୍ରେଶନ ଡିପାର୍ଟମେଣ୍ଟ ପକ୍ଷରୁ ପ୍ରମାଣ ପତ୍ର ପାଇଛନ୍ତି। ଏକ ଗରିବ ପରିବାରରେ ଅଶୋକଙ୍କ ଜନ୍ମ ହୋଇଥିଲା। ମେଧାବୀ ହୋଇବି ଅର୍ଥ ଅଭାବରୁ ଷଷ୍ଠ ଶ୍ରେଣୀରୁ ତାଙ୍କ ପାଠପଢ଼ାରେ ଡୋରି ବାନ୍ଧି ହୋଇଯାଇଥିଲା। ଶେଷରେ ବାପାଙ୍କୁ ସାହାଯ୍ୟ କରିବାକୁ ଯାଇ ଚାଷ ପ୍ରତି ମନୋନିବେଶ କରିଥିଲେ। ଚାଷ ସମ୍ପର୍କିତ ଜ୍ଞାନ ଆହରଣ ପାଇଁ କୃଷି ଓ କୃଷକଙ୍କ ପାଇଁ କାର୍ଯ୍ୟ କରୁଥିବା ସ୍ଥାନୀୟ ଲାଲସଂସ୍ଥାରେ (ଲିଭ ଆଣ୍ଡ ଲେଟ୍ ଲିଭ)ସଦସ୍ୟ ଭାବେ ଯୋଗ ଦେଇଥିଲେ। ଉକ୍ତ ସଂସ୍ଥାକୁ ଆସୁଥିବା ଏନ୍ଆର୍ଆର୍ଆଇ ଏବଂ ଓୟୁଏଟି ବୈଜ୍ଞାନିକଙ୍କ ସଂସ୍ପର୍ଶରେ ଆସି ୨୦୦୭ରେ ନିଜେ ଚାଷ କରୁଥିବା ଜମିରୁ ଏକ ଗୁଣବତ୍ତା ପୂର୍ଣ୍ଣ ଧାନକାନ୍ଦି ଉଦ୍ଭାବନ କରିଥିଲେ। ଏହା ପରଠୁ ସାତବର୍ଷ ଧରି ଉକ୍ତ ଧାନ କାନ୍ଦିକୁ ନିଜ ଜମି ତଥା ଲାଲସଂସ୍ଥା ଫାର୍ମରେ ଚାଷ କରି ସଫଳତା ପାଇଥିଲେ। ଅନୁଷ୍ଠାନକୁ ଆସୁଥିବା ବୈଜ୍ଞାନିକମାନେ ମଧ୍ୟ ଏଥିରେ ପୂର୍ଣ୍ଣ ସହାୟତା କରିଥିଲେ। ଏହି ଧାନର ନାମ ରତ୍ନମେଣ୍ଟି ରଖାଯାଇଥିଲା।୨୦୧୪ରୁ ୧୭ ପର୍ଯ୍ୟନ୍ତ ରାଜ୍ୟର ବିଭିନ୍ନ ଜିଲାରେ ଏହି ଧାନକୁ ସଫଳତାର ସହ ଚାଷ କରାଯାଇ ଭଲ ଅମଳ ହୋଇଥିଲା। ୨୦୧୭ରେ ଓୟୁଏଟି ପକ୍ଷରୁ ରତ୍ନମେଣ୍ଟି ଧାନର ନମୁନା କେନ୍ଦ୍ର ସରକାରଙ୍କ ପ୍ଲାଣ୍ଟ ଭେରାଇଟିଜ ରେଜିଷ୍ଟ୍ରେଶନ ଡିପାର୍ଟମେଣ୍ଟକୁ ପରୀକ୍ଷା ପାଇଁ ପଠାଯାଇଥିଲା। ଶେଷରେ ଗତ ୪ ମାର୍ଚ୍ଚ ୨୦୨୨ରେ ଏଥିରେ ମୋହର ବାଜିଥିଲା। ଏସମ୍ପର୍କିତ ପ୍ରମାଣପତ୍ର ୭ ଦିନ ପୂର୍ବେ ଅଶୋକଙ୍କୁ ମିଳିଛି। ରତ୍ନମେଣ୍ଟି ଧାନ ଦେଶୀ ପ୍ରଜାତି ବିହନରୁ ସୃଷ୍ଟି। ଚାଷୀ ଏହାର ବିହନ ରଖି ୫ ରୁ ୭ ବର୍ଷ ପର୍ଯ୍ୟନ୍ତ ଚାଷ କରିପାରିବ। ଏହାର ଅବଧି ୧୫୦ ଦିନ ହୋଇଥିବା ବେଳେ ଅଧିକ ଅମଳକ୍ଷମ। ଏହି ଧାନ ରୋଗପୋକ ସହଣୀ,ଅଧିକ ଓଜନଯୁକ୍ତ ଏବଂ ଚାଉଳ ସୁସ୍ବାଦୁ ବୋଲି ଅଶୋକ ପ୍ରକାଶ କରିଛନ୍ତି। ଲାଲସଂସ୍ଥାର ଆବାହକ କ୍ଷେତ୍ରମୋହନ ବେହେରା ଏବଂ ଏନଆର୍ଆର୍ଆଇ, ଓୟୁଏଟିର ସହଯୋଗୀ ବୈଜ୍ଞାନିକ ପାଇଁ ଏହି ଧାନ ଉଦ୍ଭାବନ ସମ୍ଭବ ହୋଇପାରିଛି ବୋଲି ଅଶୋକ ପ୍ରକାଶ କରିଛନ୍ତି।