ତେଲକୋଇ,୪ା୧୧(ଡି.ଏନ.ଏ): ଧାନ ଥୋଡ଼ ଧରୁଥିବା ବେଳେ ବର୍ଷା ଏକ ପ୍ରକାର ଉଭାନ୍ ହୋଇଯାଇଛି। ଫଳରେ ଧାନଗଛ ଶୁଖି ମରିଗଲାଣି। ବର୍ଷକର ପରିଶ୍ରମ ଏବେ ମାଟିରେ ମିଶିବାକୁ ବସିଛି। ଚାଷୀ ଉପାୟଶୂନ୍ୟ ହୋଇ କ୍ଷେତରେ ଗୋରୁ ଛାଡ଼ି ଦେଇଥିବା ଦେଖିବାକୁ ମିଳିଛି। ଗୁରୁବାର ଏପରି ଦୃଶ୍ୟ କେନ୍ଦୁଝର ଜିଲାର ତେଲକୋଇ ବ୍ଲକ୍ ଛାମୁଣ୍ଡା ପଞ୍ଚାୟତ ଗୋଳାବନ୍ଧ ଗ୍ରାମରେ ଦେଖିବାକୁ ମିଳିଛି।
ସୂଚନା ମୁତାବକ, ତେଲକୋଇ ବ୍ଲକ୍ରେ ୮ ହଜାର ୭୦୦ ହେକ୍ଟର ଚାଷ ଜମି ରହିଥିବା ବେଳେ ୧୦ ପ୍ରତିଶତ ଜମିରେ ଜଳସେଚନର ବ୍ୟବସ୍ଥା ରହିଛି। ବାକି ୯୦ ପ୍ରତିଶତ ଜମି ବର୍ଷା ଜଳରେ ଚାଷ ହୋଇଥାଏ। ଚଳିତବର୍ଷ ଠିକ୍ ସମୟରେ ମୌସୁମୀ ଆସିଥିଲେ ମଧ୍ୟ ବିଳମ୍ବରେ ବର୍ଷା ହୋଇଥିଲା। ତେଣୁ ଚାଷୀମାନେ ବହୁ କଷ୍ଟରେ ତଳି ପକାଇ ଚାଷ ଜମି ରୁଆଇଥିଲେ। ପରେ ଘନଘନ ଲଘୁଚାପ ଜନିତ ବର୍ଷା ଦେଖି ଚାଷୀ ଖୁସି ହୋଇଥିଲେ। ଚଳିତ ବର୍ଷ ଭଲ ଫସଲ ମଧ୍ୟ ହୋଇଥିଲା। ମାତ୍ର ଧାନ କେଣ୍ଡା ଧରୁଥିବା ବେଳେ ବର୍ଷା ଅଭାବ ଦେଖାଦେଇଛି। ଜମି ଫାଟି ଆଁ କରିଛି, ଧାନ ଥୋଡ଼ ଶୁଖି ଗଲାଣି। ବ୍ଲକ୍ର ୨୨ ପଞ୍ଚାୟତରେ ଧାନ ଚାଷର ଅବସ୍ଥା ଦୟନୀୟ। ଚାଷଜମିରୁ ୨୦ ପ୍ରତିଶତ ଧାନ ମିଳିବା କଷ୍ଟକର। ଛାମୁଣ୍ଡା ପଞ୍ଚାୟତର ଗୋଳାବନ୍ଧ ଗାଁରେ ଚାଷୀମାନେ ଧାନ ବିଲରେ ଗୋରୁ ଛାଡ଼ି ଦେଲେଣି। ଚାଷୀ ଭଦ୍ରସେନ ମହାନ୍ତ, ଅରକ୍ଷିତ ପ୍ରଧାନ, ରମେଶ ବିଶ୍ୱାଳଙ୍କ କହିବା କଥା, ଚାଷଜମି ଫାଟି ଆଁ କରିଛି। ଧାନଗଛ ମରିଗଲାଣି। ଆଉ ଜଗି ଲାଭ କ’ଣ, ତେଣୁ ଗୋରୁ ଚଳାଇଦେବା ଭଲ। ବିଞ୍ଜବାହାଳ ଓ ଜଗମୋହନପୁର ପଞ୍ଚାୟତର ଅବସ୍ଥା ମଧ୍ୟ ସମାନ। ଏ ସମ୍ବନ୍ଧରେ ବ୍ଲକ୍ କୃଷି ଅଧିକାରୀ ପି. ହଁାସଦାଙ୍କୁ ପଚାରିବାରୁ ସେ କହିଲେ ଯେ, ୫୦ ପ୍ରତିଶତ ଚାଷଜମି ପାଣି ଅଭାବ ଯୋଗୁ ନଷ୍ଟ ହୋଇଛି। ବାକି ଜମିରେ ଅମଳ ଭଲ ହୋଇଛି। କ୍ଷୟକ୍ଷତି ତଦନ୍ତ ପରେ ସହାୟତା ଯୋଗାଇ ଦିଆଯିବ।
