ସୋନପୁର,୨୦।୩(ନିପ): ସୁବର୍ଣ୍ଣପୁର ଜିଲା ସୋନପୁର ବନାଞ୍ଚଳ ଅନ୍ତର୍ଗତ ବାଙ୍କତେନ୍ତୁଳି ଗାଁର ଚାଷୀ ଉପେନ୍ଦ୍ର ଦୀପ(୫୫)ଙ୍କୁ ଏକ ଦନ୍ତାହାତୀ ପାଦରେ ଦଳି ମାରିଦେଇଛି। ଶନିବାର ଭୋର୍ ସମୟରେ ଏହି ଘଟଣା ଘଟିଛି। ଉପେନ୍ଦ୍ର ଧାନ କ୍ଷେତକୁ ଆସିଥିବା ବେଳେ ହାତୀ ହାବୁଡ଼ରେ ପଡ଼ି ଯାଇଥିଲେ। ଏହି ହାତୀଟି ରେଢ଼ାଖୋଲ ଜଙ୍ଗଲରୁ ଦଳରୁ ଅଲଗା ହୋଇ ଚାଲିଆସିଛି । ଗତ ୪ ମାସ ହେବ ସୁବର୍ଣ୍ଣପୁର ବନଖଣ୍ଡ ଉଲୁଣ୍ଡା ବନାଞ୍ଚଳରେ ରହି ବ୍ୟାପକ କ୍ଷତି ଘଟାଉଛି । ଘରଦ୍ୱାର ଭାଙ୍ଗୁଛି । ଦନ୍ତା ଆକ୍ରମଣରେ ଗତ ୪ ତାରିଖରେ ଉଲୁଣ୍ଡା ଥାନା ପଣ୍ଡକିଟାଲ ଗ୍ରାମର ବୃଦ୍ଧ ନାରାୟଣ ଭୋଇଙ୍କ ମୃତ୍ୟୁ ହୋଇଥିଲା।