ପଦ୍ମପୁର,୨୦।୨(ଡି.ଏନ୍.ଏ.): ବରଗଡ଼ ଜିଲାରେ ଖରିଫ୍ ଧାନ ସଂଗ୍ରହ ପ୍ରକ୍ରିୟାକୁ ତିନି ମାସ ବିତି ଯାଇଛି। ମାତ୍ର ଧାନ ବିକ୍ରି ସମସ୍ୟା ତୁଟି ନାହିଁ। ଚାଷୀମାନେ ଧାନ ବିକ୍ରି କରି ସାରି ନ ଥିବାବେଳେ ବିଭିନ୍ନ ମଣ୍ଡିକୁ ବନ୍ଦ କରି ଦିଆଯାଇଛି। ଅନ୍ୟପକ୍ଷରେ ଚାଷୀଙ୍କୁ ମିଳିଥିବା ଟୋକନ ଅବଧି ମଧ୍ୟ ସରି ଯାଇଛି। ଫଳରେ ଚାଷୀମାନେ ଧାନ ବିକ୍ରି କରି ନ ପାରି ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ଏହାର ପ୍ରତିବାଦରେ ପଦ୍ମପୁର ଅଞ୍ଚଳର ଚାଷୀ ଆନ୍ଦୋଳନ ତେଜି ଉଠିଛି। ଏଠାରେ ଚାଲିଥିବା ଚାଷୀ ଆନ୍ଦୋଳନ ନବମ ଦିବସରେ ପହଞ୍ଚି ଥିବାବେଳେ ଶନିବାର ଭେଉଁରିଆ ଛକରେ ପଦ୍ମପୁର-ପାଇକମାଳ ରାସ୍ତାକୁ ଅବରୋଧ କରିଛନ୍ତି। ଏହା ସହିତ ଆନ୍ଦୋଳନ ସ୍ଥଳରେ ଫୁଡ୍ ପଲିସି କପିକୁ ପୋଡ଼ି ପ୍ରତିବାଦ କରିଛନ୍ତି। ପଦ୍ମପୁର ଆର୍ଏମ୍ସି ଅନ୍ତର୍ଗତ ବିଭିନ୍ନ ମଣ୍ଡିରେ ଲକ୍ଷାଧିକ ବସ୍ତା ଧାନ ପଡ଼ି ରହିଥିବା ବେଳେ ବାରମ୍ବାର ଦାବି ସତ୍ତ୍ବେ ତାକୁ ଉଠାଯାଉ ନାହିଁ। ଏହାର ପ୍ରତିବାଦରେ ଗତ ୧୧ ତାରିଖରୁ ରାଜ ବୋଡାସମ୍ବର କୃଷକ ସଂଗଠନ ନେତୃତ୍ୱରେ ଚାଷୀମାନେ ଧାନ ବୋଝେଇ ଟ୍ରାକ୍ଟର ସହିତ ଆନ୍ଦୋଳନ ଜାରି ରଖିଛନ୍ତି। ଏହା ସହିତ ପଦ୍ମପୁର ଉପଜିଲାପାଳ ଓ ତହସିଲ ଅଫିସ ଆଗରେ ଧାନ ଗଦା କରିବା ସହିତ ଉଭୟ ଅଫିସକୁ ଅଚଳ କରି ଦେଇଛନ୍ତି।
